بىرنەشە كۇن بولدى, جۇمىسقا كەلە جاتىپ ءا.جانگەلدين كوشەسىندەگى «ايان» دۇكەنىنىڭ الدىنان وسىنداي كەزەكتى كورىپ ءجۇرمىن. سوناۋ 90-شى جىلدارداعى كەزەك (ازىق-تۇلىك تاپشىلىعى شارىقتاعان كەز ەدى) قايتىپ ورالعانداي.
بۇگىن شۇباتىلعان كەزەكتە تۇرعانداردىڭ بىرىنەن: «بۇل نەنىڭ كەزەگى؟» دەپ سۇرادىم. «قانت قوي! ءبىر كەلىسى 300 تەڭگەدەن ساتىلىپ جاتىر. بىراق ءبىر قولعا 2 كەلى عانا بەرەدى. ونى ساتىپ الۋ ءۇشىن تاڭعى ساعات 4-تەن باستاپ كەزەك الۋىڭ كەرەك. سونىڭ وزىندە جۇرتتىڭ جارتىسىنا جەتپەيدى. دۇكەن اكىمشىلىگى قانتتى ەركىن ساتىلىمعا شىعارماي, وسىلاي تاڭەرتەڭ 1 ساعات ساتادى» دەدى شەتكەرى تۇرعان ءبىر قازاق جىگىتى.
قۇمشەكەردىڭ تاپشىلىعى قاراپايىم تۇتىنۋشىنى دا, ەل بيلىگىن دە الاڭداتىپ وتىر. «مەن نە دەيمىن, دومبىرام نە دەيدى» دەگەندەي, جۇرتتى دۇرلىكتىرمەۋدىڭ ورنىنا اۋىل شارۋاشىلىعى ءمينيسترىنىڭ ورىنباسارى جەڭىس وسەرباي ەلىمىزدە 26,9 مىڭ توننا قانت قالدى دەپ «وتقا ماي قۇيدى». ءونىمدى ىشكى تۇتىنۋدىڭ ءبىر ايلىق كولەمى 59-60 مىڭ توننا ەكەن. وسىنى بىلگەن الاياق الىپساتارلار جۇرت شارق ۇرىپ ىزدەپ جۇرگەن قانتتىڭ ءبىر كەلىسىن 900 تەڭگەدەن ساتىپ, ارام جولمەن قالتاسىن قامپيتۋعا كىرىستى. قانتتىڭ كەزەگى قىپ-قىزىل توبەلەسكە اينالعانىن دا جاسىرمايمىز. 14 شىلدەدەگى ۇكىمەتتىڭ القالى جيىنىندا بۇل ۋشىققان ماسەلەگە مەملەكەت باسشىسى قاسىم-جومارت توقاەۆتىڭ ءوزى ارالاسىپ, قانتقا قاتىستى توبەلەسكە «ۇيات!» دەپ باعا بەردى.
بىراق ودان ۇيالىپ وتىرعان ۇكىمەتتى دە, شيەلەنىسكەن احۋالدى ءوز قاراقان باسىنىڭ پايداسىنا شەشۋگە جانتالاسىپ جاتقان الىپساتاردى دا كورمەدىك. دۇكەن سورەلەرىندە ۇساق قانت جوق. كەيبىر ءىرى ساۋدا نۇكتەلەرى قانتتى بەلگىلى ءبىر ۋاقىتتا عانا, شاعىن ورتالاردا ساتىلىمعا شىعارۋدا. ماسەلەنى شەشەدى دەگەن پرەمەر-مينيستر ءاليحان سمايىلوۆ ۇكىمەتتىڭ وتىرىسىندا: «بىزدە قانتتىڭ قورى 100 مىڭ توننادان اسادى. اي سايىن 60 مىڭ توننا تۇتىناتىن بولساق, قانت جەتكىلىكتى دەگەن ءسوز. قانتتىڭ ەلدەگى ورتاشا قۇنى 480-490 تەڭگەنى قۇرايدى. بىراق كەيبىر «ۇيلەردىڭ جانىنداعى» دۇكەندەردە ول 800 تەڭگەگە ساتىلۋدا. بۇل ماسەلەمەن اينالىسۋ كەرەك!» دەپ شەن-شەكپەندىلەرگە تاپسىرما بەرۋمەن شەكتەلىپ وتىر. ال ەلورداداعى دۇكەندەردە قانتتىڭ كەزەگى كۇن سايىن ۇزارىپ بارادى. سوندا بۇل كەزەك قاشانعا دەيىن جالعاسادى؟
