استانا قالاسىنىڭ اكىمى اسەت يسەكەشەۆ ەلوردانىڭ ەڭ دارىندى وقۋشىلارىمەن جۇزدەسىپ, ولاردىڭ ۇزدىك دەپ تانىلعان يننوۆاتسيالىق جوبالارىمەن تانىستى.
ەلوردا باسشىسىمەن كەزدەسۋگە ءوز قاتارىنىڭ عانا ەمەس, رەسپۋبليكالىق جانە شەت ەلدە وتكەن ءبىلىم بايگەلەرىندە جوعارى جەتىستىككە جەتكەن جۇيرىكتەر جينالدى.
– سىزدەردى الدا كەلە جاتقان تاۋەلسىزدىكتىڭ مەرەيلى مەرەكەسىمەن قۇتتىقتايمىن, – دەپ ءسوز باستاعان استانا باسشىسى باس قالاداعى ءبىلىم بەرۋ سالاسىنىڭ جەتىستىكتەرى جايىندا اڭگىمەلەدى.
– بۇگىنگى تاڭدا ەلوردا مەكتەپتەرىندە 129 مىڭ بالا ءبىلىم الادى. سونىڭ ىشىندە 67 مىڭ وقۋشى ءتۇرلى شارالارعا قاتىسىپ, وزدەرىنىڭ ءبىلىم دەڭگەيلەرى مەن قابىلەتتەرىن جاقسى جەتىستىكتەرمەن كورسەتىپ ءجۇر.
ارينە, بۇل – قۋانارلىق جاعداي. ويتكەنى بالالاردىڭ دەنى – ءوز بىلىمدەرىن جەتىلدىرۋگە جۇمىس ىستەيدى دەگەن ءسوز. ءبىزدىڭ وقۋشىلار 10 جىل قاتارىنان رەسپۋبليكالىق وليمپيادالاردا «ۇزدىك كوماندا» اتاعىن بەرمەي كەلەدى. بۇل – وتە جاقسى كورسەتكىش, – دەدى اسەت يسەكەشەۆ.
جالپى, ەلورداداعى ءبىلىم بەرۋ سالاسىندا ىسكە اسىپ جاتقان كوپتەگەن يگى شارالاردى اۋىز تولتىرىپ ايتۋعا بولادى.
بيىل قالالىق 324 وقۋشى حالىقارالىق وليمپيادا مەن بايقاۋلارعا, عىلىمي جوبالارعا قاتىسىپ, 267 مەدالمەن ماراپاتتالعان. وتكەن جىلى ەلورداداعى №3 جانە №15 مەكتەپتەردە «سمارت-مەكتەپ» جوباسى ىسكە اسىرىلدى. الداعى جىلى «ەلەكتروندىق كۇندەلىك» جوباسى جۇزەگە اسپاق. ول مەكتەپ وقۋشىلارىن اۋىر سومكە كوتەرۋدەن ارىلتىپ, اتا-انالاردىڭ وقۋ ۇدەرىسىنە قاتىسۋىنا مۇمكىندىك بەرەدى. قالا اكىمى ەگەمەندىك العاننان بەرى ەلىمىزدەگى ءبىلىم بەرۋ سالاسىندا كوپتەگەن جاقسى باعدارلامالار قابىلدانعانىن ايتتى. بۇگىندە وقيمىن دەگەن جاستارعا جول اشىق, شەتەلدە, زياتكەرلىك مەكتەپتەردە ءبىلىم الۋعا, عىلىممەن اينالىسۋعا بارلىق جاعداي جاسالعان. سوندىقتان جاس قۇراقتاي جەلكىلدەپ ءوسىپ كەلە جاتقان جاڭا ۇرپاق العىر, ءبىلىمدى, ولاردىڭ بولاشاعىنان كوپ ءۇمىت كۇتۋگە بولادى دەگەن ىزگى لەبىزىن ءبىلدىردى.
ەركىن پىكىرتالاس فورماتىندا وتكەن كەزدەسۋدە جەتكىنشەكتەر دە ءوز ويلارىن ورتاعا سالىپ, الداعى جوسپارلارىمەن ءبولىستى. «نۇر وردا» مەكتەبىنىڭ وقۋشىلارى روبوتوتەحنيكا سالاسىنداعى جەتىستىكتەرىن كورسەتتى. 8-سىنىپ وقۋشىلارى ءتۇس گاممالارىن سۇرىپتايتىن روبوتتاردى جانە ەكى مينۋتتا كۋبيك جينايتىن روبوت جاساپ شىعارعان. №75 مەكتەپ-گيمنازيانىڭ 9-سىنىپ وقۋشىسى سامات كامىلجاننىڭ جوباسى دا ەرەكشە, ول قوقىس وڭدەيتىن شاعىن زاۋىت جاساعان. توعىز جاسىندا الەمنىڭ 52 ەلىنەن 12 مىڭ ادام قاتىسقان نيۋ-دەليدەگى مەنتالدى اريفمەتيكادان وتكەن جارىستا جەڭىمپاز اتانعان, بۇگىندە ونعا تولعان «كالكۋلياتور بالا» ءىلياس توقتارحاننىڭ تالانتى ەلوردا باسشىسىن تاڭقالدىردى. ول اسەت ورەنتايۇلىنىڭ قويعان ەسەپ سۇراقتارىنا ءدال جاۋاپ بەرىپ, ءدان ريزا ەتتى.
وسىنداي دارىندى وقۋشىلاردىڭ ونەرىن تىڭداپ بولعاننان كەيىن استانا اكىمى ءسوزىن ودان ءارى جالعادى.
– جاڭا كورمەدە روبوتوتەحنيكا بويىنشا قىزىقتى جۇمىستاردى كورىپ,
ريزا بولدىم. ءبىزدىڭ وقۋشىلار يدەيالاردىڭ ەرەكشەلىگى جونىنەن ستۋدەنتتەردىڭ كەلەسى بۋىنىن باسىپ وزدى.
ماعان ۇزدىك ينتەللەكتۋالدىق جوبالاردى ىنتالاندىرۋ كەرەك دەگەن وي كەلدى. اكىمدىك يننوۆاتسيالار سالاسىنداعى ۇزدىك جۇمىستارعا گرانت تۇرىندە 10 ملن تەڭگە بولەتىن بولادى, – دەدى ول.
ودان كەيىن ەلوردا باسشىسى الداعى جىلى ءبىلىم بەرۋ سالاسىندا ىسكە اساتىن جوبالار تۋرالى ايتتى. «ءبىز كەلەسى جىلى 10 يننوۆاتسيالىق مەكتەپ اشۋدى جوسپارلاپ وتىرمىز. كاسىپكەرلەرمەن, ۇلتتىق كومپانيالارمەن بىرلەسىپ, بۇل مەكتەپتەردە بەلگىلى ءبىر ماماندىقتاردى قولدايتىن بولامىز. مىسالى, ول روبوتتى تەحنيكا نەمەسە اقپاراتتىق تەحنولوگيا, نە حيميا بولۋى مۇمكىن» دەدى اسەت يسەكەشەۆ.
اكىمنىڭ ايتۋىنشا, ەلوردالىق ەكى مەكتەپ «قازاتومونەركاسىپ» اق-مەن وسىنداي ۋاعدالاستىققا قول جەتكىزگەن. سونىمەن بىرگە, استانا وقۋشىلارىنىڭ عىلىمي, ونەرتاپقىشتىق قابىلەتتەرىن ودان ءارى دامىتۋ ماقساتىندا نازارباەۆ ۋنيۆەرسيتەتى مەن باسقا دا جوعارى وقۋ ورىندارى اراسىندا كەلىسىم جاسالعان.
ازامات ەسەنجول
