كەشە استانا اكىمى اسەت يسەكەشەۆ ەلوردادا تۇراتىن 1986 جىلعى جەلتوقسان وقيعاسىنا قاتىسۋشىلاردى قابىلداپ, «جەلتوقساننىڭ 30 جىلدىعى» ەستەلىك مەدالىن تابىستادى. جىلى جۇزدەسۋدە قالا باسشىسى جينالعانداردى حالقىمىز ءۇشىن قاستەرلى مەرەكە – ەل تاۋەلسىزدىگىنىڭ 25 جىلدىعىمەن قۇتتىقتاپ, مەرەيتوي اياسىندا وتەتىن شارالارعا قاتىسۋعا شاقىردى.
– تاۋەلسىزدىك – سان عاسىرلار بويى ازاتتىق جولىندا كۇرەسكەن حالقىمىزدىڭ باسىنا قونعان باق. ەلىمىز شيرەك عاسىردا اياعىنان تىك تۇرىپ, وزگە ەلدەرمەن تەرەزەسى تەڭ مەملەكەت رەتىندە قالىپتاستى. تاۋەلسىزدىكتىڭ حالقىمىزعا بەرگەن ەرەكشە سىيى – بارشا قازاقستان حالقىنىڭ ماقتانىشىنا اينالعان ەلباسىمىزدىڭ ءتول تۋىندىسى – ەڭسەلى ەلوردا ەكەنى داۋسىز. استانا قىسقا ۋاقىتتىڭ ىشىندە الەمدەگى ەڭ ۇزدىك, قارقىندى دامىعان قالانىڭ بىرىنە اينالدى. ەلباسىمىزدىڭ ساليقالى ساياساتىنىڭ ارقاسىندا ەل ەكونوميكاسى نىعايىپ, حالىقتىڭ جاعدايى جاقسارىپ كەلەدى.
وسىنىڭ ءبارى – تاۋەلسىزدىكتىڭ يگىلىگى. مەملەكەت باسشىسى الدىمىزعا جاڭا مىندەتتەردى قويدى. ءبىز ءماڭگىلىك ەلگە اينالىپ, الەمنىڭ دامىعان 30 ەلىنىڭ قاتارىنان ورىن الۋعا ءتيىستىمىز, – دەگەن اسەت يسەكەشەۆ تاۋەلسىزدىك مەرەيتويىنىڭ قارساڭىنداعى بۇل كەزدەسۋ وعان قاتىسىپ وتىرعان بارشا ادامنىڭ ەسىندە ماڭگىگە ساقتالاتىنىن ايتىپ, بيىل جەلتوقسان وقيعاسىنا قاتىسۋشىلاردىڭ بارلىعىنا 70 مىڭ تەڭگە كولەمىندە ءبىر رەتتىك تولەم جاسالاتىنىن اتاپ ءوتتى.
ەستەلىك مەدالىمەن جالپى العاندا 18 ادام ماراپاتتالدى. سولاردىڭ ءبىرى – قر پارلامەنتى ءماجىلىسىنىڭ اپپارات باسشىسىنىڭ ورىنباسارى سابىر قاسىموۆ جەلتوقساندىقتاردىڭ اتىنان قالا اكىمىنە العىسىن جەتكىزە كەلە: «جەلتوقسان وقيعاسىنا قاتىسۋشىلار ءاۋ باستان قازاقستاننىڭ پاتريوتتارى بولىپ جارالدى. وتانشىلدىق وتى بويىمىزدان ەشقاشان وشپەيدى. ەلباسىنىڭ ءتول پەرزەنتى – استانانى كوركەيتۋ بويىنشا قالا باسشىلىعىنىڭ جۇمىسىنا ارقاشاندا قولعابىسىمىزدى تيگىزۋگە دايارمىز. جاقىندا حالىقارالىق كونفەرەنتسيانى وتكىزدىك. سوعان قولداۋ ءبىلدىرىپ, كومەك كورسەتكەن ەلوردا اكىمدىگىنە مىڭ دا ءبىر العىس» دەدى.
ونىڭ ءسوزىن قوستاعان «ناعىز جەلتوقسان» قوعامدىق قورىنىڭ پرەزيدەنتى قۇرمانعازى راحمەتوۆ اتالمىش قور ون جىلدان بەرى جۇمىس ىستەپ كەلە جاتقانىن ايتىپ, جاستاردىڭ تاربيەسىنە اتسالىسۋعا دايىن ەكەندىكتەرىن جەتكىزدى.
امانعالي قالجانوۆ
