بۇرناعى كۇنى جوو اراسىنداعى شاحماتتان الەمنىڭ ءتورت دۇركىن چەمپيونى, حالىقارالىق گروسسمەيستەر دينارا سادۋاقاسوۆا كۋبوگى ءۇشىن شاحمات جارىسى باستالدى. وسى ورايدا تۋرنيردە ديناراعا وقىرماننىڭ ون سۇراعىن قويۋدىڭ ءساتى ءتۇستى.
– نەبارى جيىرما جاستا ءوز اتىڭىزدا تۋرنير وتكىزۋ ءسىز ءۇشىن ماقتان, ابىروي بولار. بۇل ءتۋرنيردىڭ ماقساتى قانداي؟
داۋرەن نۇرعاليەۆ, ستۋدەنت
– راسىمەن دە, بۇل جارىس مەن ءۇشىن اسا ماڭىزدى. يگى ىسكە اكىمدىكتەن باستاپ, قازاقستاننىڭ شاحمات فەدەراتسياسى قولداۋ كورسەتتى. تۋرنير جىل سايىن وتكىزىلىپ, جاقسى داستۇرگە اينالسا ەكەن دەيمىن. جارىسقا ەلوردانىڭ وقۋ ورىندارىمەن قاتار, الماتى جانە قاراعاندى قالالارىنىڭ ەڭ ۇزدىك ويىنشىلارى قاتىسىپ جاتىر. ەلىمىزدە شاحماتقا دەگەن قىزىعۋشىلىق جوعارى. قازىر اتا-انالار بالالارىن كىشكەنتايىنان ۇيىرمەگە جازدىرتادى. الايدا بۇل سپورت تۇرىمەن تەك بالاقايلار عانا ەمەس, جاستار دا, ۇلكەندەر دە اينالىسسا دەيمىن. مىنە, ۇيىمداستىرىلعان ءتۋرنيردىڭ باستى ماقساتى دا سول – ەلىمىزدەگى شاحماتتىڭ بەدەلىن كوتەرىپ, ونى سانگە اينالدىرۋ.
– ءسىز شاحماتقا 24 ساعاتىڭىزدىڭ قانشا ۋاقىتىن جۇمسايسىز؟
ەليزات, مەكتەپ وقۋشىسى
– بەس جاستان باستاپ شاحماتپەن اۋەستەنە باستادىم. ال 11 جاسىمدا العاش رەت 12 جاسقا دەيىنگى قىزدار اراسىنداعى شاحماتتان الەم چەمپيوناتىندا كۇمىس جۇلدەگەر اتاندىم. سول ساتتە بۇدان ۇلكەن جەتىستىكتەرگە جەتۋگە بولاتىنىن ءتۇسىندىم. ءومىرىمدى شاحماتسىز ەلەستەتە المايتىنداي بولدىم. سوندىقتان باپكەر مەن كەڭەسشىلەردەن بولەك, ءوزىم ۇيدە دە دايىندالامىن. شاحماتقا قاتىستى كىتاپ وقىپ, ءبىلىمىمدى تولىقتىرامىن. ونلاين ويىن ويناپ, جاتتىعۋلار جاسايمىن. كۇن سايىن كاسىبي مامان رەتىندە ءوزىمدى جەتىلدىرەمىن.
– جانكۇيەرلەرىڭىزدى قانداي جاڭالىقپەن قۋانتا الاسىز؟
المات, 24 جاستا
– جۋىردا عانا جابىق الاڭداعى ازيا ويىندارىنا قاتىسىپ كەلدىم. وسىنداي دارەجەدەگى باسەكەگە العاش رەت قاتىسۋىم. ازيالىق ويىندارعا ۆەتنام, ءۇندىستان, يندونەزيا, فيليپپين, يران, قىتاي قۇرامالارى سياقتى قۇرلىقتىڭ ۇزدىكتەر جينالدى. ايەلدەر اراسىندا وتكىزىلگەن كلاسسيكالىق ويىندا قولا جۇلدەنى يەلەنىپ, ەلىمىزدىڭ قورجىنىن تاعى ءبىر مەدالمەن تولىقتىردىم. بۇل – ەڭ سوڭعى تۋرنيردە قازىرگى الەم چەمپيونى قىتايلىق تان جانگيمەن تەڭ تۇسكەننىڭ ناتيجەسى. جەكە باسىم ءۇش مەدال جەڭىپ الدىم, ال كوماندالىق ەسەپتە التىندى يەلەندىك. جارىستا ءوزىڭدى كورسەتۋ قيىنعا سوقتى, سەبەبى كۇن سايىن ەكى تۋر وينادىق. تاڭعى ساعات توعىزدان باستاپ, كەشكە دەيىن شاحمات ۇستەلىندە تاپجىلماي وتىرىپ, 4 كۇننىڭ ىشىندە 7 تۋر وتكىزدىك.
– جالقاۋلىق دەگەن ادامعا ءتان قاسيەت قوي, كەيدە سۇيىكتى ىسىڭنەن جالىعىپ, بارلىعىن تاستاپ كەتكىڭىز كەلمەي مە؟ كۇيزەلىسكە ۇشىراعان كەزدە ونى قالاي جەڭەسىز؟
ءماريا, ماگيسترانت
– جوق, ءوز باسىم سارى ۋايىمعا ەشقاشان تۇسپەپپىن. شارشاعانىمدى دۇرىس باسا بىلگەندىكتەن بولار, بالكىم. پارتيادان كەيىن ءان تىڭداپ, كينو كورىپ, دوستارىم مەن جاقىندارىممەن سىرلاسۋدى ۇناتامىن. وسىنىڭ ءوزى مەنى راحاتقا بولەپ, جان تىنىشتىعىن سىيلايدى.
– جارىستارعا دايىندىق جۇمىستارى قالاي جۇرەدى؟
اينۇر, مەكتەپ وقۋشىسى
– ادەتتەگىدەي, شاحمات ويناپ جاتتىعامىن. ودان بولەك, باسسەينگە بارىپ, سۋدا شامامەن 1 شاقىرىم ءجۇزىپ وتەمىن. شاحمات – بۇل دا سپورتتىڭ ءتۇرى, سوندىقتان بويدى سەرگەك ۇستاۋ كەرەك. جاتتىعۋ زالىنا بارىپ, اپكەممەن ۇلكەن تەننيس ويناي باستادىم, ال دوستارىممەن كونكي تەبەمىز. استانادا ۆەلوسيپەد تەۋىپ, سەرۋەندەگەندى تاعى ۇناتامىن. ەلورداعا ءار كەلگەن سايىن قالانىڭ قالاي قۇلپىرىپ, تۇرلەنگەنىن بايقايمىن.
– شاحماتتان قانداي پايدا كوردىڭىز؟ ءومىرىڭىزدى وزگەرتتى مە؟
توميريس ماراتقىزى, ساتۋشى
– شاحماتپەن كاسىبي دەڭگەيدە اينالىسۋ مىندەت ەمەس. كەز كەلگەن ادام شاحمات ويناسا, ومىردە بەرەر پايداسىن وزدەرى كورۋشى ەدى. ويىن لوگيكالىق ويلاۋ مەن تالدامالىق قاسيەتتەردى دامىتىپ, جان-جاقتى ويلاۋعا ۇيرەتەدى. شاحماتتىڭ ارقاسىندا ادامنىڭ ەرىك-جىگەرى, مىنەز-قۇلقى قالىپتاسادى. ماڭىزدى شەشىمدەر قابىلداعاندا كومەكتەسىپ, جوسپارلارىمدى رەتتەۋگە كومەكتەسەدى. شاحماتتىڭ كومەگىمەن بارىنە ۇلگەرۋدى ۇيرەندىم.
– قاي جەردە ءبىلىم الىپ جاتىرسىز؟
كۇلزيا ماحمۇتقىزى, زەينەتكەر
– رەسەيدىڭ ءبىر جوعارى وقۋ ورنىندا گەولوگيالىق بارلاۋ ماماندىعى بويىنشا ءبىلىم الۋدامىن. مەنىڭ اتام پروفەسسور, گەولوگ بولعان كىسى. شاحماتپەن كاسىبي اينالىسۋعا بەل بۋعاننان كەيىن, قاشىقتىقتان وقۋ مەن ءۇشىن اسا ىڭعايلى. وقۋىمدى دا, سۇيىكتى ءىسىمدى دە, قوعامدىق جۇمىستاردى دا قاتار الىپ جۇرۋگە تىرىسامىن.
– قازاقستان تمد مەملەكەتتەرى اراسىندا شاحماتتان ۇزدىك قۇراما دەپ ايتا الاسىز با؟ ەلىمىزدە ەر-ازاماتتاردان گورى قىزداردىڭ وسى سپورت تۇرىندە جاقسى ناتيجە كورسەتۋىنىڭ سىرى نەدە؟
نارعىز, زاڭگەر
– ءبىزدىڭ ەلىمىزدە شاحمات ەندى-ەندى اياقتان تۇرىپ كەلەدى. سونىڭ وزىندە جاقسى ناتيجە بار. جاسوسپىرىمدەر اراسىندا شاحماتتان الەم بىرىنشىلىگىندە التىندى الدىق. دۇنيەجۇزىلىك شاحمات وليمپيادالارىندا دا لايىقتى ويناپ ءجۇرمىز. 2014 جىلى ءبىزدىڭ ايەلدەر قۇراماسى التىنشى ورىندى يەلەندى. ءار وڭىردە جىلدان جىلعا شاحمات ورتالىقتارى اشىلىپ, شاحمات مەكتەپ باعدارلاماسىنا ءپان بولىپ ەنگىزىلىپ جاتىر. بىلتىر شاحماتقا اۋەس بالالاردىڭ اكە-شەشەلەرىنىڭ وتىنىشىمەن شاحمات اكادەمياسىن اشتىق. ونىڭ ەكىنشى فيليالىن دا اشۋ جوسپاردا بار.
ال ەر-ازاماتتارعا كەلەتىن بولساق, بارلىعى – ۋاقىتتىڭ ەنشىسىندە. ءبىزدىڭ جىگىتتەرىمىز دە ازيا ويىندارىنىڭ بليتس پارتياسىندا قولا مەدالدى قانجىعاسىنا بايلادى.
– الدا قانداي جارىستارعا قاتىسپاقشىسىز؟
جاقسىگەلدى ابدراحمانوۆ, كاسىپكەر
– الداعى جوسپار دەپ وسى ايدىڭ ورتاسىنان باستالاتىن حالىقارالىق جارىستارعا قاتىسۋدى ايتۋعا بولادى. وعان دايىندىق جۇمىستارى ءجۇرىپ جاتىر.
– ەگەر سىزگە كەز كەلگەن شاحماتشىمەن ويناۋعا مۇمكىندىك بەرىلسە, كىممەن كەزدەسەر ەدىڭىز؟
قانات, 18 جاستا
– ەگەر كوزى ءتىرى بولسا, كەڭەس زامانىنداعى ەڭ وزىق شاحماتشىلاردىڭ ءبىرى ميحايل تالمەن ويناۋشى ەدىم. ول كوپشىلىكتىڭ جادىندا ەرەكشە ويىندارى مەن قىزىقتى ادىستەرىمەن ەستە قالدى. فيشەرمەن ءبىر پارتيادان باس تارتپاس ەدىم. قازىر ەسىمى دۇركىرەپ تۇرعان الەم چەمپيونى نورۆەگيالىق ماگنۋس كارلسەنمەن ويناسام, تارتىستى ويىن بولاتىنىنا سەنىمدىمىن. مەنىڭ ارمانىم – ەرلەر اراسىندا ەليتانىڭ قۇرامىنا ىلىگۋ. ول ءۇشىن, ەڭ الدىمەن, مەن ەرلەر اراسىندا گروسسمەيستەر اتانۋ كەرەكپىن. اقىرىن ءجۇرىپ, انىق باسىپ, دىتتەگەن ارمانىما ۇمتىلىپ جاتىرمىن.
گۇلدانا تالعاتقىزى
