دومبىرا اسەرلى انگە سالادى
«ناعىز قازاق – قازاق ەمەس, ناعىز قازاق – دومبىرا» دەپ قادىر اقىن ايتقانداي, 14 قازان كۇنى كونگرەسس-حولدا وتەتىن «اسەرلى ءان سال, دومبىرا» كونتسەرتىندە حالقىمىزدىڭ بۇل ءتول اسپابى ارقىلى ۇلتىمىزدىڭ جانى كورىنبەك. تاماشا كەشتىڭ ۇيىمداستىرۋشىسى – استانا قالاسى مەملەكەتتىك اكادەميالىق فيلارمونياسى.
كونتسەرتكە «سارىارقا» ۇلت اسپاپتار ءانسامبلى قاتىسادى. قر ەڭبەك سىڭىرگەن قايراتكەرى نۇرلان حامزين جەتەكشىلىك ەتەتىن ۇجىم دومبىرانىڭ كۇمبىرلەگەن ۇنىمەن عانا ەمەس, قوبىز, سىبىزعى, شاڭقوبىز, سازسىرناي, جەتىگەن, ادىرنا, شەرتەر سىندى قازاقتىڭ كونە اسپاپتارى مەن دابىل, داۋىلپاز, قوڭىراۋ, اساتاياق, تۇياقتاس سىندى ۇرمالى اسپاپتاردىڭ جانە پريما قوبىزدىڭ, دومبىرا-كونتراباستىڭ, باياننىڭ, بلوك-فلەيتانىڭ دىبىسىمەن قۇلاق قۇرىشىن قاندىرادى.
«شالقىما» حالىقتىق بي ءانسامبلىنىڭ رەپەرتۋارىنداعى «شاتتىق», «كەرىم-اي», «شولپى», «اققۋ قىزدار», «شالقىما», «قوسالقا», «كەلىنشەك», «قۋانىش», «اتا تولعاۋ», «ىڭعايتوك» «اققۋ», «ءبيشى قايىڭ», «ايجان قىز», «ساعىم», «ءىنجۋ مارجان» سياقتى ۇلتتىق بيلەردى كورەسىزدەر.
ال قر ەڭبەك سىڭىرگەن قايراتكەرلەرى سەكەن تۇرىسبەك, ايگۇل قوسانوۆا, ايگۇل ۇلكەنباەۆا, گۇلزيرا بوكەيحان, قر جاستار وداعى سىيلىعىنىڭ لاۋرەاتى نۇراي تاناباەۆ, رەسپۋبليكالىق جانە حالىقارالىق بايقاۋلاردىڭ لاۋرەاتتارى پەريزات تۇراروۆا, جازگۇل داڭىلباەۆا, دانيار مۇقان, راحات بەگاسىلوۆ, كۇنسۇلۋ تۇرلىبەكوۆا, تەلمان نۇرتاي, ارايلىم راحىمقىزى, بايان مۇساەۆا سىندى حالىق ءانى ءبولىمىنىڭ جەكە ورىنداۋشىلارى قازاقتىڭ ءانى مەن كۇيىمەن سۋسىنداتادى. كەش 19.00-دە باستالادى.
امانعالي قالجانوۆ