قالالىق جاستار ساياساتى ماسەلەلەرى باسقارماسىنىڭ قولداۋىمەن استاناداعى كورەي ەتنومادەني بىرلەستىگى ۇلتتىق تاعامدار جارمەڭكەسىن وتكىزدى.
«ءبىر كۇن دامدەس بولعانمەن, قىرىق كۇن سالەمدەس» دەيتىن حالىق دانالىعىمەن ۇندەس كەلەتىن ءداستۇر ءار حالىقتىڭ مادەنيەتىندە بار. وننان استام قالالىق ەتنومادەني ورتالىقتارىنىڭ جاستار قاناتىن جيناپ, اس ءمازىرىمىزدى ازىرلەپ, ءدامىن كورۋگە ارنايى شاقىرىپ وتىرمىز. مۇنداعى ماقساتىمىز – جاستاردى ءبىر داستارقان باسىندا جيناپ قانا قويماي, ادەت-عۇرىپتى, سالت-ءداستۇردى, مادەنيەتتى ناسيحاتتاۋ ارقىلى دوستىق قارىم-قاتىناستى قالىپتاستىرۋ» دەيدى كورەي ەتنومادەني بىرلەستىگىنىڭ جەتەكشىسى روزا پاك.
– ناۋرىز مەرەكەسى قارساڭىندا ءوز حالقىنىڭ ۇلتتىق تاعام تۇرلەرىن قازاق, ورىس, بولگار, قىرعىز, تاتار, ازەربايجان, كورەي, وزبەك, تۇركىمەن, تاجىك مادەني ورتالىقتارى دا ۇسىندى. ەلوردادا ءتۇرلى ەتنوس وكىلدەرىن بىرىكتىرىپ وتىرعان 29 ەتنومادەني ورتالىق جۇمىس ىستەيدى. سولاردىڭ جۇمىسىن جانداندىرۋعا جاستار قاناتى دا باستاماشى بولۋدا. ءبۇگىنگى شارادا ءار ۇلتتىڭ اس مازىرىمەن تانىسىپ, ونى قالاي ازىرلەۋدى ۇيرەنۋدىڭ ءوزى جاستاردى ءبىر-بىرىنە جاقىنداستىرادى دەپ ويلايمىن, – دەيدى «استانا جاستارى» ۇيىمىنىڭ باسشىسى قايىربولات ساحمەتوۆ.
ايگۇل ۋايسوۆا
