قاردىڭ قالىڭ جاۋىنا بايلانىستى استانا قالاسىنىڭ كوممۋنالدىق قىزمەت مەكەمەلەرى كۇشەيتىلگەن رەجيممەن جۇمىس ىستەپ جاتىر.
قالا كوشەلەرىن تازالاۋعا 800-دەن اسا ارنايى تەحنيكا ءبىرلىگى مەن ەكى مىڭعا جۋىق جۇمىسشى جۇمىلدىرىلعان. سونىڭ ىشىندە 569 جۇمىسشى مەن 264 تەحنيكا سارىارقا اۋدانىن تازالاسا, 588 جۇمىسشى مەن 296 تەحنيكا الماتى اۋدانىن, ال 276 تەحنيكا مەن 738 جۇمىسشى ەسىل اۋدانىن تاپ-تۇيناقتاي ەتتى.
جۇمىسشىلار الدىمەن اۆتوبۋس ايالدامالارى مەن جاياۋ جۇرگىنشى جولدارى, كوپىرلەر مەن وتپەجولدار سياقتى باسقا دا ادام اياعى ۇزىلمەيتىن ورىنداردى, اۋرۋحانا, ەمحانا سىندى الەۋمەتتىك ماڭىزى بار نىسانداردىڭ كىرەبەرىستەرىن تازارتۋدان باستاۋدا. سونىمەن قاتار كوكتايعاقتا كوپشىلىكتىڭ تايىپ قۇلاپ, جاراقاتتانباۋىن الدىن الۋدى ماقسات تۇت-
قان جۇمىس توبى تۇرعىن ءۇيلەر اۋماعىنداعى تايعاناق جەرلەردى رەتكە كەلتىرۋدى نازارعا الدى. ول ءۇشىن ەلوردادا كوكتايعاققا قارسى قاجەتتى قۇرال-جابدىق قورىنىڭ جەتكىلىكتى ەكەنىن ايتادى ماماندار. ال جينالعان قار ارنايى پوليگونعا تاسىمالدانۋدا.
بۇل تۇرعىدا جەرگىلىكتى بيلىك ەلوردالىقتار مەن قالا قوناقتارىن قاۋىپسىزدىك شارالارىن قاتاڭ ساقتاۋعا, كولىك جۇرگىزۋشىلەرىن جىلدامدىقتى ارتتىرماي, جول ۇستىندە اراقاشىقتىقتى ساقتاي وتىرىپ, وقىس ارەكەت جاساماۋعا شاقىردى.
«جاياۋ جۇرگىنشىلەر ءار قادامىن اڭداپ باسىپ, جولدىڭ ەكىنشى جاعىنا تەك ارنايى بەلگى كورسەتىلگەن جەردەن عانا وتكەنى دۇرىس. كوشەدەگى تەحنيكالار جول كولىك قوزعالىسىنىڭ باياۋلاۋىنا اكەپ سوقتىرۋى مۇمكىن. سوندىقتان بۇعان تۇسىنىستىكپەن قاراپ, قالا ىشىندەگى ساپارىڭىزدى الدىن الا جوسپارلاپ شىققانىڭىز ءجون» دەيدى جەرگىلىكتى بيلىك وكىلدەرى.
نۇرداۋلەت كاكىشەۆ
