ەكسپو كورمەسى كەزىندە «نۇر الەم» پاۆيلونىنا كىرىپ ۇلگەرمەگەن استانالىقتار مەن قالا قوناقتارىنا تاعى ءبىر مۇمكىندىك! 11 قاراشادان باستاپ ەكسپو قالاشىعىنىڭ تۋريستىك ايماعى بارشا قوناقتارعا ەسىگىن ايقارا اشپاق.
ەكس-كورمە اۋماعىنا كىرۋ تەگىن
بولاشاقتىڭ مۋزەيى «نۇر الەم» پلازاسىنا دەمالىس كۇندەرى, ياعني, 11-12 قاراشا كۇنى كىرۋ تەگىن بولماق. بۇل شەشىم تۋرالى ءباسپاسوز ماجىلىسىندە «استانا ەكسپو-2017» ۇلتتىق كومپانياسىنىڭ كوممەرتسيالاۋ دەپارتامەنتىنىڭ ديرەكتورى داۋلەت ەركىمباەۆ مالىمدەدى. ال بيلەتتەر 14 قاراشادان باستاپ جاپپاي ساتىلىمعا تۇسەدى. بيلەتتەردى رەسمي سايتتان جانە قالاشىققا كىرەبەرىستە ورنالاسقان كاسسالاردان ساتىپ الۋعا بولادى.
«نۇر الەممەن» قاتار تۋريستەر ەكى قازاقستاندىق تاقىرىپتىق پاۆيلوندى, ۇزدىك تاجىريبەلەر ايماعىن, شىعارماشىلىق ەنەرگيا ورتالىعىنا مەن ەنەرگيا حولىنا كىرۋگە مۇمكىندىك الادى. كومپانيانىڭ ديرەكتسياسى قوناقتارعا كىشىگىرىم سىي ازىرلەپ وتىر. پاۆيلوندارداعى ەكسپوزيتسيالار بۇرىن-سوڭدى بولماعان ۆيرتۋالدى الەمنىڭ مودەلدەرىمەن تولىقتىرىلادى. «پاۆيلونداردىڭ مازمۇندىق جاعى اركىمدى تاڭعالدىراتىنى انىق» دەدى كونتەنت جانە ءىس-شارالاردى ۇيىمداستىرۋ دەپارتامەنتىنىڭ ديرەكتورى مارات وماروۆ.
باعا ساياساتىنا توقتالىپ وتسەك, اۋماققا كىرۋ ءۇشىن 1500 تەڭگە جۇمسايسىز. ايتا كەتۋ كەرەك, ەل ازاماتتارى ءۇشىن ارنايى جەڭىلدىكتەر دە قاراستىرىلعان. بارلىق ۇلى وتان سوعىسىنىڭ ارداگەرلەرى, مۇمكىندىگى شەكتەۋلى ازاماتتار مەن 6 جاسقا دەيىنگى بۇلدىرشىندەر كەشەنگە تەگىن كىرە الادى. ال ستۋدەنتتەرگە بيلەت قۇنى 800 تەڭگە بولسا, مەكتەپ وقۋشىلارى مەن كوپبالالى انالارعا 50 پايىزدىق جەڭىلدىك جاسالىپ, بيلەت قۇنى 500 تەڭگەگە تەڭ بولماق.
قالاشىق اپتاسىنا التى كۇن جۇمىس ىستەيدى, ال دۇيسەنبى دەمالىس كۇنى بولىپ بەلگىلەندى. سەيسەنبى مەن جۇما ارالىعىندا 10:00-20:00-گە دەيىن جۇمىس ىستەسە, سەنبى-جەكسەنبى كۇندەرى 10:00-21:00-گە دەيىن كەلۋشىلەرگە اشىق. ايتا كەتەيىك, كورمە اۋماعىندا 23 تاماقتانۋ نىسانى جۇمىس ىستەيتىن بولادى.
ەكسپو قالاشىعىنا بارلىق ادام تەگىن كىرىپ شىعا الادى. وعان باتىس جاقتان – MEGA Silk Way ساۋدا ورتالىعىنان, ال سولتۇستىكتەن – تۇراق ايماعىنان كىرۋگە بولادى. ەكسپو اۋماعىنا ءوز كولىگىمەن كەلەتىندەر ءۇشىن دە جاعىمدى جاڭالىق بار. تۇراقتا ايالداۋ العاشقى ءۇش ساعات – تەگىن, كەيىن ءاربىر ساعات ءۇشىن 100 تەڭگە تولەيسىز.
قىس قىزىعى – ەكسپو الاڭىندا
بيىلعى جاڭا جىل استانالىقتاردىڭ جادىندا ماڭگىلىككە ساقتالادى دەگەن بولجام بار. سەبەبى ادەتتە «حان شاتىردىڭ» اينالاسىندا وتەتىن شاھاردىڭ باس شىرشاسىنىڭ شامىن جاعۋ ءراسىمى بۇل جولى ەكسپو اۋماعىنا اۋىستىرىلدى. وعان قوسا «نۇر الەمنىڭ» ىرگەسىندە مۇز ايدىنى تۇرعىزىلدى. جالپى اۋماعى 3500 شارشى مەتردى قۇرايتىن كونكي تەبۋ ستاديونى وزگەلەردەن وزگەشە بولماق. وسىلاي دەپ سەندىرگەن كوممەرتسيالاۋ ديرەكتسياسىنىڭ باستىعى داۋلەت ەركىمباەۆ «ءبىر ايتارىم, مۇنداي مۇز ايدىن ءالى ەلىمىزدە بولعان ەمەس» دەدى. قالالىق اكىمدىكپەن كەلىسىلگەندەي, «حان شاتىر» اۋماعىندا ورنالاسقان مۇز قالاشىعى جاڭاجىلدىق شىرشامەن بىرگە ەكسپو قالاشىعىنا كوشىرىلەدى.
«مۇز ايدىنى 11 قاراشادا اشىلادى. ال مۇز قالاشىعىن سالۋ ءۇشىن قىس تۇسكەنىن كۇتۋ كەرەك. بۇل دەگەنىمىز قالاشىق شامامەن جەلتوقساننىڭ باسىنان باستاپ جۇمىس ىستەيدى» دەدى داۋلەت ەركىمباەۆ. ەكسپو اۋماعىنا كىرۋ تەگىن بولعاندىقتان, جاڭاجىلدىق شىرشا مەن مۇز قالاشىعىنا كەز كەلگەن ادام ەمىن-ەركىن كىرە الادى. ال مۇز ايدىندا كونكي تەبۋ اقىلى, الايدا باعاسى اقىلعا قونىمدى. «مۇز ايدىنىنا كىرۋ قۇنى 1000 تەڭگە بولادى, ءبىر سەانس شامامەن 4 ساعاتقا سوزىلادى. كونكيلەردى جالعا الۋ قۇنى دا وسىنشاما كولەمىندە» دەدى ۇيىمداستىرۋشىلار. جەڭىلدىك رەتىندە 6 جاسقا دەيىنگى بالالار تەگىن كىرسە, مەكتەپ وقۋشىلارى مەن زەينەتكەرلەر بيلەتتىڭ 50 پايىزىن عانا تولەيدى.
كورمە نىساندارىنىڭ كەيىنگى قىزمەتى
«ەكسپو-2017» تۋريستىك ايماعىنىڭ اشىلۋىنا وراي ءباسپاسوز ماجىلىسىندە كورمە مۇراسى رەتىندە قالعان نىسانداردىڭ كەيىنگى قىزمەتى تۋرالى ايتىلدى.
ەكسپو كورمەسىنىڭ نەگىزگى نىسانى «نۇر الەم» سفەراسى مۇراجايعا اينالاتىنى بەلگىلى. ال ونىڭ جانىنداعى ەكى تاقىرىپتىق پاۆيلون دا ءتۇرلى ەنەرگيا كوزدەرىن تانىستىراتىن بولادى. بارلىق حالىقارالىق پاۆيلونداردىڭ عيماراتى «استانا» حالىقارالىق قارجى ورتالىعىنا بەرىلەدى. ورتالىق كەلەر 2018 جىلى اشىلىپ, بۇكىل ورتالىق ازيانىڭ قارجىلىق حابىنا اينالماق. «Job World» – ادام رەسۋرستارىن دامىتۋ بويىنشا ءبىلىم بەرۋ ورتالىعى اقش پەن وڭتۇستىك كورەيانىڭ ۇزدىك تاجىريبەلەرىن قولدانباق. جوبا جاسوسپىرىمدەرگە جوعارى تەحنولوگيالى سالالارداعى ماماندىقتاردى تاڭداۋعا كومەكتەسەدى. وقۋشىلاردى كاسىبي داعدىعا ماشىقتاپ, العان ءبىلىمدى شىنايى ومىردە قولدانۋعا ۇيرەتەدى. ارت-ورتالىعى زاماناۋي ونەر سالاسىنداعى تىڭ يدەيالاردى زەرتتەۋگە ارنالادى. ونىڭ نەگىزگى ەكى مىندەتى – ونەرگە باۋلۋ جانە ءبىلىم بەرۋ. ەنەرگيا حولى رەسمي جانە ارنايى ءىس-شارالاردى وتكىزۋ ورنى رەتىندە پايدالانىلادى. عيماراتتىڭ زالى 868 كورەرمەنگە ارنالعان. كونگرەسس ورتالىعى – اۋقىمدى مادەني شارالار مەن ىسكەرلىك كەزدەسۋلەردى وتكىزۋگە ارنالعان ەلىمىزدىڭ ەڭ ءىرى عيماراتى. بۇرىنعى ۇزدىك تاجىريبەلەر ورتالىعىندا جاسىل تەحنولوگيالاردى جانە ينۆەستيتسيالىق جوبالاردى دامىتۋ بويىنشا حالىقارالىق ورتالىق اشىلادى. ورتالىق جاسىل تەحنولوگيالار مەن يننوۆاتسيالاردى جاساۋ مەن ەنگىزۋدىڭ حالىقارالىق ورتالىعىنا اينالادى دەگەن ءۇمىت بار. ال IT-تەحنوپاركى اقپاراتتىق تەحنولوگيالاردىڭ ماماندارى مەن ينۆەستورلاردى تارتۋعا باعىتتالعان الاڭدى قۇرۋعا مۇمكىندىك بەرەدى. وندا ستارتاپتارعا جانە الەمگە ايگىلى IT-سالاسىنىڭ ۇزدىكتەرىنە يننوۆاتسيالىق ەكوجۇيە قاراستىرىلادى.
سونداي-اق «ەكسپو-2017» كورمەسىنەن كەيىن بوساتىلعان نىسانداردى جالعا الۋدىڭ قۇنى جاريالاندى. كومپانياداعىلار قازىرگى تاڭدا كورمە كەزىندە ءتورت حالىقارالىق پاۆيلون ورنالاسقان ايماقتاردى قايتا جوندەۋ ءجۇرىپ جاتقانىن جەتكىزدى. «ولاردى حالىقارالىق قارجى ورتالىعى مەن وزگە كاسىپورىندارىنا بەرۋ كوزدەلگەنى و باستان ايتىلعان ەدى. ەكسپو-نىڭ مەديا ورتالىعى, ۇيىمداستىرۋشىلار كەڭسەسى سياقتى بىرقاتار عيماراتتار جالعا بەرىلەدى. سونداي-اق كەشەن اۋماعىندا پاۆيلوندارعا پايدالانۋعا بەرىلگەن كەيبىر نىساندار بوساتىلىپ جاتىر. ولاردى دا ءبىزدىڭ كومپانيانىڭ ساياسي ۇستانىمىنا كەلەتىن ءتۇرلى كومپانيالارعا جالعا بەرەتىن بولامىز. نىسانداردى شامامەن ءبىر شارشى مەترى ءۇشىن 6700 تەڭگەگە وتكىزەمىز» دەدى داۋلەت ەركىمباەۆ.
گۇلدانا تالعاتقىزى
