ەل مەرەيى – ەكسپو
باس شاھاردا بولاتىن بەدەلدى شارا – «ەكسپو-2017» كورمەسىنە اركىم وزىنشە ۇلەس قوسۋعا دايىندىقتى باستاپ كەتتى.
اتاپ ايتقاندا, استانالىق ايەلدەر قاۋىمى ەكسپو قارساڭىندا ەكولوگيانى جاقسارتۋعا قانداي شارالار قاجەتتىگى تۋرالى ويلارىن جاسىل تەحنولوگيالاردىڭ ۇلتتىق اكادەمياسىندا وتكەن دوڭگەلەك ۇستەل بارىسىندا ورتاعا سالدى. ال استانا قالاسىن «EXPO- 2017» حالىقارالىق مامانداندىرىلعان كورمەسىنە دايىنداۋدا استانا كونۆەنشن بيۋروسى اۋقىمدى جۇمىستاردى باستاپ كەتتى.
ەلدىڭ مەرەيىن اسىراتىن جاھاندىق كورمەدە قانداي جوبالار الدىمەن قولعا الىنۋ كەرەكتىگىن ايتقان قىز-كەلىنشەكتەر سۋ, جارىق جانە جىلۋ كوزدەرىن ۇنەمدەۋدىڭ ءتيىمدى تاسىلدەرى تۋرالى دا جان-جاقتى تالقىلادى. اسىرەسە, «اقبوتا» قوعامدىق كورىنىڭ ديرەكتورى تاتيانا نەمتساننىڭ بۇگىندە وزدەرى تۇراتىن مەكەندە ىسكە اسىرىلىپ جاتقان جاسىل جوبالار جايلى ايتقان اڭگىمەسى كوپشىلىكتىڭ كوڭىلىنەن شىعىپ, قوناقتار تاراپىنان ۇلكەن قىزىعۋشىلىق تۋعىزدى.
– قازىرگى تاڭدا اقمولا وبلىسى ارشالى اۋدانى ارناساي اۋىلىندا الەۋمەتتىك نىسانداردىڭ بيۋدجەتتىك جۇكتەمەلەرىن ازايتۋ ماقساتىندا كوپتەگەن ىلكىمدى شارالار قولعا الىنعان. مۇندا جاسىل تەحنولوگيانىڭ كومەگىمەن بيۋدجەت قارجىسىن 1,5 ميلليون تەڭگەگە دەيىن ۇنەمدەيتىن ورتا مەكتەپ بار. سونداي-اق, 168 اۋلادا تامشىلاي سۋارۋ جۇيەسى ورناتىلعان. مۇنىمەن قوسا, جىلىجايدىڭ 4 ءتۇرى – كۇن بيوۆەگەتاريى, فيتوديودتى جىلىجاي, كوشەتحانا جانە پيراميدالىق جىلىجاي جۇمىس ىستەيدى. اۋىلداعى 100 ايەل ورگانيكالىق كوكونىس وسىرۋمەن شۇعىلدانادى, – دەدى ول.
ال «ەكسپو-2017» حالىقارالىق مامانداندىرىلعان كورمەسىنە دايىندىق بارىسىنداعى استانا كونۆەنشن بيۋروسى جيىنىنا قاتىسۋعا التاي ايماعىنىڭ جانە بارناۋل قالاسىندا ورنالاسقان تۋريستىك كومپانيالاردىڭ جەتەكشىلەرى كەلدى. كەلگەن قوناقتار قالانىڭ كورىكتى جەرلەرىن ارالاپ, قوناقۇيلەردىڭ قىزمەت كورسەتۋ ساپاسىمەن تانىستى.
ۇيىمنىڭ قولعا العان باعىتى – حالىقارالىق بايلانىستى دامىتۋ. قازىرگى ۋاقىتتا استانا قالاسى شەتەلدىك 28 مەملەكەتپەن, سونىڭ ىشىندە 26 استا-نامەن ۇزاق مەرزىمدى كەلىسىمگە كەلۋ تۋرالى مەموراندۋمعا قول جەتكىزگەن. وسىعان بايلانىستى ءتۋريزمدى دامىتۋ ماقساتىندا بيىل استانا قالاسىندا جەتەكشى تۋروپەراتورلاردىڭ, بلوگەرلەر مەن شەتەلدىك باق وكىلدەرىنىڭ قاتىسۋىمەن اقپاراتتىق تۋرلار ۇيىمداستىرىلۋدا. بۇل – ەكىنشى رەت وتكىزىلىپ وتىرعان شارا. رەسەيدەن كەلگەن قوناقتار Recommended by EXPO باعدارلاماسى بويىنشا ەلوردانىڭ تۋريستىك الەۋەتىمەن تانىسىپ قانا قويماي, ەكسپو كورمەسىنىڭ قۇرىلىسىن دا تاماشالادى.
گۇلميرا ايماعانبەت,
بوتاگوز ماراتقىزى