بۇگىنگى قازاقستان – ەكونوميكاسى وركەندەگەن كەمەل ەل. الايدا, ول ءدال وسى كۇيىندە الەم نازارىنا ىلىگىپ, دۇشپان كۇيىنىپ, دوس سۇيىنەتىندەي جاعدايعا بىردەن جەتە قويعان جوق. ونىڭ جان-جاقتى قارىشتاپ قارقىن الىپ, ورلەپ, كەمەلدەنۋىندە حالقىن جاسامپاز ىستەرگە باستاي بىلگەن تۋ ۇستاعان قايراتكەر تۇلعانىڭ كورەگەن دە سارابدال ساياساتى جاتىر.
نۇرسۇلتان نازارباەۆ 1989 جىلى قازاقستان كومپارتياسى ورتالىق كوميتەتىنىڭ ءبىرىنشى حاتشىلىعىنا كەلگەندە ەلدىڭ جاعدايى قانداي ەدى؟ سىرتقا شيكىزات بەرۋدەن جۇدەپ-جاداعان ەكونوميكا مەن جالعان ۋادەدەن جالىعىپ, ەرتەڭى نە بولارىن بولجاپ بىلمەيتىن بۇقارانىڭ بولاشاققا سەنىمدەرى ءتىپتى ءالسىز-تۇعىن. ول وسى كۇيزەلە باستاعان حالىقتىڭ كەۋدەسىنە «اۋەلى – ەكونوميكا, سوسىن ساياسات» دەپ ءۇمىت وتىن جاقتى. مەملەكەتتىڭ تىزگىنىن تاريحتىڭ الماعايىپ, سىناقتى كەزەڭىندە قولىنا الا تۇرىپ, تىعىرىقتان دامۋدىڭ داڭعىلىنا باستايتىن تىڭ جولمەن تۇرەن تارتتى.
ەندى, مىنە, جىگىت جاسى – جيىرما بەس جىلعا تاتيتىن از عانا ۋاقىتتىڭ ىشىندە ەلىمىز كەڭەستىك كوماندالىق جۇيەدەن نارىقتىق ەكونوميكاعا ءبىرجولا كوشىپ, وزگەلەرگە مۇلدە ۇقسامايتىن باعىت ۇستادى. سول كەزدىڭ وزىندە-اق قازاقستان پرەزيدەنتى تاۋەلسىز مەملەكەتتەر دوستاستىعى ەلدەرىندەگى ەڭ كورنەكتى ساياسي جەتەكشىلەردىڭ ءبىرى ەكەندىگى مويىندالا باستادى.
«ءبىز كەزىندە ءوزىمىز تاڭداعان جولمەن, دامۋدىڭ قازاقستاندىق جولىمەن جۇردىك. الەمدىك تاجىريبەنى زەرتتەپ, تالداي وتىرىپ, ەۆوليۋتسيالىق جولدى تاڭدادىق. ءبىز دەموكراتيانى قارقىندى ەنگىزۋگە قارسىمىز. ءبىز ەشكىمدى كوشىرۋگە تىرىسپايمىز. ەلىمىزگە جانە ءوز حالقىمىزعا قاجەت جۇمىستاردى تىندىرامىز. بۇل ءبىزدىڭ قولىمىزدان كەلەدى» دەگەن سوزىندە تۇردى ەلباسى.
ورتالىق ازياعا تارتىلعان ينۆەستيتسيالاردىڭ سەكسەن پايىزى ءبىزدىڭ ەلدىڭ ۇلەسىنە ءتيدى. بۇعان قوسا تاعى ءبىر ستراتەگيالىق بولجامپازدىق 1997 جىلدىڭ قازان ايىندا قازاقستاننىڭ ءوز دامۋىنىڭ 2030 جىلدارعا دەيىنگى ۇزاق مەرزىمدىك ستراتەگياسىن قابىلداۋى ەدى. بىزدەر ءسويتىپ, كەشەگى كەڭەستىك ەلدەردىڭ اراسىندا ءبىرىنشى بولىپ, الەمدىك تاجىريبەدە مويىندالعان, مەملەكەتتىك باسقارۋ مەن ۇيلەستىرۋدىڭ دارا جوسپارىن جاسادىق.
ءبىزدىڭ پرەزيدەنت ەكونوميكانىڭ تۇراقتى دامۋىن, اسىرەسە, جەكە كاسىپكەرلىكتىڭ قامتاماسىز ەتەتىنىن ءاۋ باستا-اق ءبىلدى. سوندىقتان, ءوزىن-ءوزى جۇمىسپەن قامتيتىندارعا جۇمىس ىستەۋگە قولايلى جاعداي جاساۋ قاجەتتىگىنە ءمان بەرىلدى. بيزنەسكە كورسەتىلگەن جان-جاقتى قولداۋدىڭ ارقاسىندا ەلدەگى شاعىن جانە ورتا بيزنەستىڭ ءورىسى كەڭىدى.
ال, وتكەن جىلى «قازاقستان – 2050» ستراتەگياسى» قابىلدانىپ, قالىپتاسقان مەملەكەتتىڭ جاڭا ساياسي باعىتى بەلگىلەندى.
مەملەكەتتىڭ قوعامدىق-ساياسي احۋالىنىڭ تۇراقتىلىعىن قالىپتاستىرۋدا بۇرىن-سوڭدى بولماعان جەتىستىككە جەتتىك.
پرەزيدەنتتىڭ ەل تاۋەلسىزدىگىنەن كەيىنگى ەڭ ءبىر باتىل شەشىمى – استانانى ارقا توسىنە كوشىرۋى. ەركە ەسىلدىڭ جاعاسىنا قونىس اۋدارعان ەلورداعا باق پەن داۋلەت تىلەگەن ەلباسى: «بۇل بولاشاعىمىزعا كەرەك, قىزىعىن كەلەر ۇرپاقتار كورەدى» دەگەن ەدى. مىنە, وسى اق جولتاي ارمان جۇزەگە اسا باستادى. استانانىڭ ون التى جىلدىعىن تويلاعالى وتىرمىز.
كەزىندە بەلگىلى پۋبيتسيست-جازۋشى سارىباس اقتاەۆ قازاقستان پرەزيدەنتىنىڭ حالقى ءۇشىن, ەلى ءۇشىن جاساعان ۇشان-تەڭىز ەڭبەگىن ساراپتاي كەلىپ: «حالقىم, ەلباسى – بىرەۋ, ءبىز وعان تىرەۋ بولايىق!» دەگەن ەدى.
وسى ءسوزدىڭ ءمانىن بۇگىنگى جاستار دا تەرەڭ ۇعىنا ءبىلىپ, ىرگەسىن مەملەكەت باسشىسىنىڭ ءوزى قالاعان استانانىڭ دىڭگەگى مىقتى, مارتەبەسى بيىك بولعاي دەيمىز!
تاڭاتار تولەۋعاليەۆ
