قىتايدا وقۋدىڭ قىزىعارلىق تۇسى كوپ

جاقىندا س.سەيفۋللين اتىنداعى قازاق اگروتەحنيكالىق ۋنيۆەر­سيتەتىندە «قحر وقۋىنىڭ كورمەسى» ءوتتى.

شاراعا قازاقستانداعى قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى لە يۋچەن, قحر شاكىرتاقىسىن ءبولۋ جونىندەگى كەڭەستىڭ (China Scholarship Council) باس حاتشىسى تساو شەحاي قاتىستى.

ۋنيۆەرسيتەت رەكتورى ا. كۇرىش­باەۆ ءوز سوزىندە وقۋ ورنى جانىنان 2010 جىلى قۇرىلعان قىتاي ءبىلىم جانە عىلىم ورتالىعىنىڭ جۇمىس بارىسى تۋرالى ايتا كەلىپ, شىڭجاڭداعى اگرارلىق ۋنيۆەرسيتەتپەن ارىپتەستىك بايلانىس ورنا­تقان اتالمىش ورتالىق زەرتتەۋ جۇمىستارىن ۇيىمداستىرۋدا, ءبىلىم بەرۋ سالاسىندا ءبىراز ءىستى قولعا العانىن جەتكىزدى. ورتالىق اشىلعالى بەرى 58 ادام قىتاي ءتىلىن مەڭگەرىپ شىقسا, ولاردىڭ ىشىندە 4 ماگيسترانت جانە 10 ستۋدەنت قحر-دا بىلىمدەرىن شىڭداپ قايتۋ مۇمكىندىگىنە يە بولدى. ون ەكى ستۋدەنت شانحاي قالاسىنداعى جازعى مەكتەپتەردە تاجىريبەدەن ءوتتى. سونىمەن قاتار, س.سەيفۋللين اتىنداعى قازاتۋ-دىڭ 70 ۇستازى كۇنشىعىس ەلىندە قىسقا مەرزىمدى بىلىكتىلىكتى كوتەرۋ باعدارلاماسىن يگەردى.

قاتىسۋشىلار قىتايدىڭ «Beihang University», «Beijing Jiaotong University», «Harbin Normal University», «Changchun University of Science and Technology», «East China Normal University», «Shanghai International Studies University», «Shanghai University of Traditional Chinese Medicine» سىندى 17 وقۋ ورنىنىڭ باكالاۆريات, ماگيستراتۋرا, PhD دەڭگەيىنە شاكىرتاقى تاعايىنداۋ باعدارلاماسىمەن تانىسۋعا مۇمكىن­دىك الدى.