مەملەكەت باسشىسى نۇرسۇلتان نازارباەۆ قۇرمەتتى قاراۋىلدىڭ ساپ تۇزەۋىمەن الماتىداعى داڭق مەموريالىنداعى ماڭگىلىك الاۋعا گۇل شوعىن قويىپ, ءبىر مينۋتتىق ۇنسىزدىكپەن ۇلى وتان سوعىسىندا قازا تاپقانداردىڭ رۋحىنا تاعزىم ەتتى.
ەلباسى ارداگەرلەر مەن راسىمگە قاتىسۋشىلارعا ارنالعان قۇتتىقتاۋ سوزىندە قازاقستاندىقتاردىڭ فاشيستىك باسقىنشىلاردى جەڭۋگە زور ۇلەس قوسقانىن ەرەكشە اتاپ ءوتتى.
– قازاقستان مايدانعا 1 ميلليون 800 مىڭنان استام جاۋىنگەر اتتاندىردى. سولاردىڭ جارتىسى قايتىپ ورالمادى. ولار سوعىستا ەرەن ەرلىك كورسەتتى. 500 وتانداسىمىز كەڭەس وداعىنىڭ باتىرى اتاندى. تىل ەڭبەككەرلەرى مايداندى قارۋمەن, ازىق-تۇلىكپەن جانە كەرەك-جاراقپەن قامتاماسىز ەتۋ ءۇشىن كۇندىز-ءتۇنى تىنىمسىز جۇمىس ىستەدى, – دەدى نۇرسۇلتان نازارباەۆ.
قازاقستان پرەزيدەنتى سۇراپىل سوعىستى كورمەگەن قازىرگى ۇرپاقتىڭ باقىتتى ەكەنىن ايتتى.
– ءبىزدىڭ اتالارىمىز رەۆوليۋتسيا مەن رەپرەسسيانى, ال اكەلەرىمىز ۇلى وتان سوعىسىن باستان وتكەردى. تەك ءبىزدىڭ ۇرپاق قانا بەيبىت زاماندا ءومىر سۇرۋدە. بۇعان ارداگەرلەرىمىزدىڭ قوسقان ۇلەسى زور. سىزدەرگە العىسىمىز شەكسىز! – دەدى مەملەكەت باسشىسى.
ءراسىم سوڭىندا ەلباسى سوعىس جانە ەڭبەك ارداگەرلەرىمەن بەيرەسمي تۇردە اڭگىمەلەستى.
– سىزدەر جانىمىزدا بولساڭىزدار, بىزدەر – بالالارىڭىز بەن نەمەرەلەرىڭىز ءوزىمىزدى الاڭسىز سەزىنەمىز. ەرلىكتەرىڭىزدى ۇلگى-ونەگە تۇتىپ, سىزدەردەن قايسارلىقتى, وتانىمىزدىڭ پاتريوتى بولۋدى, اتامەكەندى ءسۇيۋدى, سونداي-اق, وتانىمىز ءۇشىن قاسىق قانىمىز قالعانشا كۇرەسىپ, سۇيىكتى قازاقستانىمىز ءۇشىن جانىمىزدى قۇربان ەتۋدى ۇيرەنەمىز. قىمباتتى دوستار, بارشاڭىزدى مەرەكەلەرىڭىزبەن قۇتتىقتايمىن! سىزدەرگە زور دەنساۋلىق, تابىس جانە بار جاقسىلىقتى تىلەيمىن! – دەدى قازاقستان پرەزيدەنتى.
مايدانگەرلەر نۇرسۇلتان نازارباەۆقا ەرەكشە ءىلتيپاتى مەن قامقورلىعى ءۇشىن شىنايى ريزاشىلىقتارىن ءبىلدىردى.
