«ناز» مەملەكەتتىك بي تەاترى جەڭىس مەرەكەسىنىڭ 73-جىلدىعى مەن حالىق قاھارمانى, ايگىلى پارتيزان قاسىم قايسەنوۆتىڭ 100 جىلدىعىنا ارناپ, قالا تۇرعىندارىنا مەرەكەلىك كونتسەرت قويدى.
يگىلىكتى شارا كوكتال تۇرعىن الابىنداعى وتان سوعىسىنىڭ ارداگەرلەرىنە ارنالعان ەسكەرتكىشكە گۇل شوعىن قويۋدان باستالدى. سودان كەيىن سوعىستا قازا بولعان جاۋىنگەرلەردى ەسكە الۋ ءۇشىن ءبىر مينۋت ۇنسىزدىك جاريالاندى.
العاشقى ءسوزدى العان تىل ارداگەرى يۆان بۋرتوۆوي جينالعانداردى مەرەكەمەن قۇتتىقتاپ, سوناۋ سۇراپىل جىلداردا جاستايىنان ەڭبەككە ارالاسىپ, جەڭىستى جاقىنداتۋعا ۇلەس قوسقاندىعىن جىلى سەزىممەن ەسكە الدى. سوتسياليستىك ەڭبەك ەرى ساعيلا ەسەنجولوۆا – بۇل قاندى قىرعىننىڭ ەلىمىزگە اكەلگەن زاردابى جايىندا اڭگىمەلەپ, جاستارعا بەيبىت كۇننىڭ وڭايلىقپەن كەلمەگەنىن ايتتى.
«ناز» تەاترىنىڭ ونەرپازدارى جۇرتشىلىققا مايدان دالاسىندا ورىندالعان اندەردى تامىلجىتىپ شىرقادى. ۇلتتىق بي ونەرىنىڭ ءىنجۋ-مارجاندارىن كورسەتتى. قىسقاسى, ارداگەرلەر مەن تۇرعىنداردىڭ كوڭىلدەرىن كوتەرىپ, ولارعا مەرەكەلىك كوڭىل-كۇي سىيلادى.
ال وسى ەلدى مەكەندە ورنالاسقان №3 كوپشىلىك كىتاپحانادا «ۇلى ەرلىككە تاعزىم» اتتى كىتاپ كورمەسى ۇيىمداستىرىلدى.
