مەملەكەت باسشىسى «وتار» 40-شى اسكەري بازاسىنا كەلگەننەن كەيىن وعان پاراد قولباسشىسى – قازاقستان رەسپۋبليكاسىنىڭ قارۋلى كۇشتەرى قۇرلىق اسكەرلەرىنىڭ باس قولباسشىسى, گەنەرال-مايور مۇرات بەكتانوۆ اسكەري پارادتى وتكىزۋگە جانە اۋماقتىق اسكەرلەر قۇرامالارىنا جاۋىنگەرلىك تۋلاردى تاپسىرۋ راسىمىنە دايىن ەكەندىگى جونىندە باياندادى.
قازاقستان پرەزيدەنتى ارداگەرلەرگە, ساربازدار مەن وفيتسەرلەرگە ارنالعان سوزىندە قارۋلى كۇشتەر قاۋىپسىزدىگىمىزدىڭ باستى كەپىلى, وتانىمىزدىڭ بەيبىت ءومىرى مەن ەگەمەندىگىمىزدىڭ بەرىك تىرەگى بولىپ سانالاتىنىن اتاپ ءوتتى.
– قازاقستاننىڭ اسكەري قىزمەتشىلەرى – بارلىق ءداۋىردىڭ تاريحىنداعى ەڭ سۇراپىل سوعىستا ءفاشيزمدى جەڭگەن باتىر بابالارىمىزدىڭ جاۋىنگەرلىك ەرلىكتەرى مەن داڭقىن جالعاستىراتىن لايىقتى ۇرپاق. ءبىز ولاردىڭ تۋعان جەرىمىزدىڭ وركەندەۋى مەن بەيبىت ءومىرىمىزدى ساقتاۋ ءۇشىن كورسەتكەن كوزسىز باتىرلىعى مەن وشپەس ەرلىگىن ءاردايىم جادىمىزدا ساقتايمىز, – دەدى نۇرسۇلتان نازارباەۆ.
مەملەكەت باسشىسى ەلىمىزدىڭ دايەكتى ءارى بەيبىتسۇيگىش ساياسات جۇرگىزىپ وتىرعانىن اتاپ ءوتتى. بۇل ورايدا قازاقستان اسكەرى تاۋەلسىزدىگىمىزدى كۇزەتىپ, ۇجىمدىق قاۋىپسىزدىك شارت ۇيىمى اياسىندا ۇجىمدىق قاۋىپسىزدىكتى قامتاماسىز ەتۋگە تابىستى اتسالىسىپ جاتىر, سونداي-اق بىرىككەن ۇلتتار ۇيىمى شەڭبەرىندە ماڭىزدى بىتىمگەرشىلىك فۋنكتسيالاردى لايىقتى اتقارىپ كەلەدى.
ەلباسى مەملەكەت تاراپىنان ارميامىزعا مەيلىنشە قولداۋ كورسەتىلىپ, ونىڭ الەۋەتىن نىعايتۋعا زور ءمان بەرىلەتىنىن, قازاقستان 2030 جىلعا قاراي زاماناۋي, موبيلدى ءارى جوعارى كاسىبي ارميا جاساقتاۋ جونىندە ماقسات قويىپ وتىرعانىن اتاپ ءوتتى.
– بۇل ءۇشىن 2020 جىلدان باستاپ قورعانىس سالاسىنا قاجەتتى قاراجات بولىنەتىن بولادى. قاۋىپسىزدىككە تونەتىن جاڭا سىن-قاتەرلەرگە وراي ءتيىمدى ارەكەت ەتۋ ءۇشىن ارنايى وپەراتسيالاردىڭ جوعارى ءموبيلدى كۇشتەرى مەن اۋماقتىق اسكەرلەر قۇرىلىپ, قورعانىس جۇيەسىنە بىرىكتىرىلدى. جاڭا ءبولىمدەر بۇگىن تابىس ەتىلگەن جاۋىنگەرلىك تۋلاردى لايىقتى الىپ جۇرەتىنىنە سەنىمدىمىن, – دەدى قازاقستان پرەزيدەنتى.
اۋماقتىق قورعانىس بريگادالارىنىڭ جاۋىنگەرلىك تۋلارىن وبلىستاردىڭ, استانا جانە الماتى قالالارىنىڭ اكىمدەرىنە تاپسىرۋ راسىمىنەن كەيىن ارناۋلى وپەراتسيالار كۇشتەرىنىڭ, مەملەكەتتىك كۇزەت قىزمەتىنىڭ, ۇلتتىق ۇلاننىڭ, اسكەري-تەڭىز كۇشتەرىنىڭ ارناۋلى ماقساتتاعى وتريادىنىڭ, سونداي-اق, اۋماقتىق اسكەرلەردىڭ اسكەري قىزمەتشىلەرىنىڭ شەرۋگە قاتىسۋشى قۇرامدارى ساپ تۇزەپ ءوتتى.
زاڭسىز قارۋلى قۇرىلىمداردىڭ شارتتى بازاسىن جويۋ جونىندەگى تاكتيكالىق ەپيزودتاردى ورىنداۋ بارىسىندا «توچكا-ۋ» تاكتيكالىق زىمىران كەشەنى, «گراد» جانە «پريما» دۇركىندەتىپ وتشاشۋ زىمىران جۇيەسى, مستا-ب جانە د-30 زەڭبىرەكتەرى, «سولنتسەپەك» اۋىر وتشاشقىش زىمىران جۇيەسى, «شتۋرم-س» تانكىگە قارسى زىمىران كەشەنى جانە راكەتا اسكەرلەرى مەن ارتيللەريانىڭ باسقا دا قارۋ تۇرلەرىنىڭ مۇمكىندىكتەرى كورسەتىلدى. قۇرلىق اسكەرلەرى جانە اۋە قورعانىسى كۇشتەرىنىڭ اسكەرلەرى زىمىران اتىپ, بومبا لاقتىردى, سونداي-اق بارلىق قارۋ تۇرىنەن وق اتتى. اسكەري-اۋە كۇشتەرىنىڭ مايداندىق جانە اسكەري اۆياتسياسىنىڭ ۇشاقتارى مەن تىكۇشاقتارى اسپاندا اۋە شايقاسىن كورسەتتى. «جەتىسۋ بارىسى» ۇشقىشتار توبى جوعارى دەڭگەيدە شەبەرلىك تانىتتى.
اسكەري پارادقا 3 مىڭعا جۋىق جاۋىنگەر قاتىسىپ, 300 اسكەري تەحنيكا مەن قارۋ-جاراق, 40 ۇشۋ اپپاراتى جۇمىلدىرىلدى.
سوڭىندا مەملەكەت باسشىسى اسكەري تەحنيكا مەن قارۋ-جاراقتىڭ زاماناۋي ۇلگىلەرىمەن تانىستى, سونداي-اق دالالىق جەردەگى ۇرىستا كورسەتكەن شەبەرلىكتەرى, وق اتۋ ساتىندەگى مەرگەندىكتەرى جانە جاۋىنگەرلىك دايىندىقتارى ءۇشىن پارادقا قاتىسۋشىلاردىڭ بارىنە العىس ءبىلدىردى.
– اسكەري پاراد سىزدەردىڭ جاۋىنگەرلىك شەبەرلىك دەڭگەيلەرىڭىزدى جانە دالاداعى جاتتىعۋلارعا بەيىمدەلگەندەرىڭىزدى ناقتى كورسەتتى. پاراد قازاقستان رەسپۋبليكاسى قارۋلى كۇشتەرىنىڭ جاۋىنگەرلىك دايىندىعى مەن كاسىبيلىك دەڭگەيىنىڭ ودان ءارى ارتا تۇسۋىنە سەپتىگىن تيگىزەدى دەپ سەنەمىن. بارشاڭىزدى وتان قورعاۋشى كۇنىمەن جانە جەڭىس كۇنىمەن قۇتتىقتايمىن, – دەدى نۇرسۇلتان نازارباەۆ.
www.akorda.kz
