ەلباسى شىڭدالعان شاڭىراق
وسى اپتادا مەملەكەت باسشىسى نۇرسۇلتان نازارباەۆ قاراعاندى وبلىسىنا جۇمىس ساپارىمەن باردى. ساپار بارىسىندا بىرقاتار ونەركاسىپ ورىندارىن ارالاپ, ءوڭىردىڭ ينفراقۇرىلىمدىق دامۋ جوسپارىمەن تانىستى. ەڭ اۋەلى پرەزيدەنت «Maker» جشس-ءنىڭ قاراعاندى قۇيۋ-ماشينا جاساۋ زاۋىتىنا, «قاراعاندى فارماتسەۆتيكا كەشەنى» جشس-ىنە بارىپ, كاسىپورىنداردىڭ تىنىس-تىرشىلىگىن ءوز كوزىمەن كوردى.
«قازاقمىس» كورپوراتسياسىنىڭ جۇمىسشىلارىمەن, قاراعاندى مەملەكەتتىك تەحنيكا ۋنيۆەرسيتەتىنىڭ ستۋدەنتتەرىمەن جۇزدەستى. ودان ءارى ەلباسى وبلىستىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى. ەلباسى ءوزى جاس كەزىندە ەڭبەك ەتكەن كاسىپورىن – «ارسەلورميتتال تەمىرتاۋ» اكتسيونەرلىك قوعامىنا بارىپ, جۇمىسشىلارمەن كەزدەستى.
نۇرسۇلتان نازارباەۆ قارا مەتالل پروكاتىن شىعاراتىن ءوزى ەڭبەك جولىن باستاپ, شىڭدالعان كاسىپورىندى ارالاپ كوردى. ەلباسى سۇرىپتى پروكات ءوندىرۋ تەحنولوگياسىمەن جانە مەتاللۋرگيا كومبيناتىن ودان ءارى دامىتۋ جوسپارىمەن تانىستى. سونىمەن قاتار, مەملەكەت باسشىسىنا جەو-1 جانە جەو-2 ورتالىقتارىن قايتا جوندەۋ جوسپارى, سونداي-اق ءوڭىردىڭ ەكولوگيالىق قاۋىپسىزدىگىن قامتاماسىز ەتۋگە قاتىستى شەشىمدەر تۋرالى باياندالدى. ەلباسى كاسىپورىننىڭ ەڭبەككەرلەرىمەن كەزدەسىپ, اڭگىمەلەستى. «قازىر زاۋىت اۋماعىندا بويىمدى ەرەكشە ءبىر سەزىم باۋراپ الدى. مەن مۇندا العاش رەت 1958 جىلى كىرگەن ەدىم. ول كەزدە بۇل جەردە ەشتەڭە بولعان جوق. بارلىعى مەنىڭ كوز الدىمدا سالىندى» دەپ قازاقستان پرەزيدەنتى ەسكە الدى. نۇرسۇلتان نازارباەۆ كومبينات مەتاللۋرگتارى مەن ەڭبەككەرلەرىنىڭ جۇمىسى اۋىر ەكەنىن اتاپ ءوتىپ, تەمىرتاۋ قالاسى مەن زاۋىتقا قاتىستى جاعدايدى ۇنەمى ءوز باقىلاۋىندا ۇستايتىنىن ايتتى.
سونداي-اق ەلباسى «اق ساراي» نەكە سارايىنا باس سۇعىپ, جاس جۇبايلاردىڭ قۋانىشىنا ورتاقتاستى. تەمىرتاۋ قالاسىنداعى مادەنيەت جانە دەمالىس ساياباعىن ارالاپ, وتكەن عاسىرداعى 50-60 جىلدار تاريحىن بەينەلەيتىن تەاترلاندىرىلعان قويىلىمدى تاماشالادى.