كەشە قوعامدىق دامۋ باسقارماسىنىڭ ۇيىمداستىرۋىمەن قالالىق ارداگەرلەر كەڭەسىنىڭ بەلسەندىلەرى قاتىسقان دوڭگەلەك ۇستەل شاراسى ءوتتى.
كۇن ءتارتىبى بويىنشا الدىمەن استانا قالالىق ارداگەرلەر كەڭەسىنىڭ ءتوراعاسى سانسىزباي ەسىلوۆ ەلوردامىزدا مايدانگەرلەر مەن زەينەتكەرلەر قاۋىمىنىڭ, ونىڭ ىشىندە اۋداندىق جانە باستاۋىش ۇيىمداردىڭ جۇرگىزىپ وتىرعان جۇمىستارىن باعالاپ, الداعى اتقارىلاتىن شارالار جايىندا بايانداپ بەردى. «ءبىزدىڭ ۇيىمنىڭ ءبىرىنشى كەزەكتەگى ماقساتى – كومەككە اسا مۇقتاج قارتتارعا قولداۋ كورسەتۋ. وسى باعىتتاعى جۇمىستى الدىمەن ءوزىمىز جانداندىرۋىمىز كەرەك. بۇل رەتتە قالا اكىمدىگى تاراپىنان, سونداي-اق دەمەۋشىلەر جاعىنان قولداۋ بەرىلىپ كەلەدى. دەگەنمەن ءوزىمىز دە بەلسەندى بولايىق» دەپ اتاپ ءوتتى سانسىزباي سەيىتجانۇلى.
بۇگىنگى تاڭدا ارداگەرلەر كەڭەسى ءداستۇر بويىنشا قازان ايىنىڭ باسىندا اتالىپ وتىلەتىن قارتتار كۇنىنە ارنالعان شارالاردى جوعارى دەڭگەيدە وتكىزۋدى جوسپارلاپ وتىر ەكەن. اتاپ ايتقاندا, اتاۋلى كۇنگە وراي ايلىق وتكىزۋ كوزدەلگەن. ونىڭ اياسىندا كومەككە مۇقتاج قارتتارعا قايىرىمدىلىق كومەك كورسەتۋ, كونتسەرتتەر, ۇرپاقتار ساباقتاستىعىن ۇلىقتايتىن شىعارماشىلىق كەزدەسۋلەر, فلەشموب ويىندارى ۇيىمداستىرىلماق.
سونىمەن قاتار, دوڭگەلەك ۇستەل بارىسىندا ارداگەرلەردى مەرزىمدى باسپاسوزگە جازدىرۋ ماسەلەسى دە قارالدى. بۇل ورايدا توراعانىڭ ورىنباسارى ە.دۇيسەنوۆ ءتيىستى باسقارمالارمەن, سونداي-اق گازەت باسشىلارىمەن كەلىسىمدەر جۇرگىزىلەتىنىن, وقۋعا نيەت بىلدىرەتىن ارداگەرلەردىڭ بارىنە گازەت جازىپ بەرۋگە كۇش سالاتىنىن جەتكىزدى.
كەڭەستىڭ مادەني-بۇقارالىق جۇمىستار جونىندەگى تۇراقتى كوميسسياسىنىڭ جەتەكشىسى ن.شيۆرينا قالا بويىنشا اتقارىلعان شارالار جايىندا بايانداپ, بەلسەندى ارداگەرلەرگە ريزاشىلىعىن ءبىلدىردى.
دوڭگەلەك ۇستەل جيىنىنان ۇققانىمىز, ەلوردالىق ارداگەرلەر قاۋىمىندا تىنىم جوق ەكەن. ءاردايىم وسىلاي بولىپ, زەينەتتىڭ قىزىعىنا بولەنىپ جۇرگەيسىزدەر, قادىرلى ارداگەر قاۋىم!
