استانا قالاسى اكىمدىگىنىڭ جانىنداعى كوميسسيانىڭ شەشىمى بويىنشا گرانتتار 47 تۇلەككە بەرىلدى. ولاردىڭ اراسىندا اتا-اناسىنىڭ قامقورلىعىنسىز قالعان, تۋعانىنان جارىمجان, كوپبالالى وتباسىنان شىققان تالاپكەرلەر بار.
گرانتتار قازىرگى كۇنگى سۇرانىسى جوعارى – تەحنيكالىق, پەداگوگيكالىق, مەديتسينالىق ماماندىقتارعا بەرىلدى. ءبىر ايتا كەتەرلىگى, بيىلعى وقۋ جىلىندا جوو-لاردا جاڭا ماماندىق پايدا بولدى, ياعني 3D تاڭباسىن جوبالاۋشى, كومپيۋتەرلىك جۇيەنىڭ تالداۋشىسى جانە ازىرلەۋشىسى, web-ديزاينەر جانە لاندشافت ديزاينەرى.
– وسىنداي جەتىستىككە جەتكەندەرىڭىز ءۇشىن قۋانىشتىمىز. ءبىز ءۇشىن ءبارىڭىز جەڭىمپاز بولىپ ەسەپتەلەسىزدەر. وزدەرىڭىزدەي بويىندا كۇش-جىگەرى, رۋحى جوعارى, بولاشاققا دەگەن سەنىمى مول جاستار ەلىمىزدىڭ كوركەيۋىنە ۇلەس قوسا الادى. بۇل جەڭىستەرىڭىزدىڭ باستاۋى عانا بولىپ ەسەپتەلەدى. الدارىڭىزدا ۇلكەن ءومىر كۇتىپ تۇر. بارعان ورتالارىڭىزدا كوشباسشى بولۋعا ۇمتىلىڭىزدار, – دەپ ءسوزىنىڭ باسىن قۇتتىقتاۋمەن باستادى قالا اكىمى اسەت يسەكەشەۆ. ءسوز اراسىندا ول تەحنولوگيانى, عىلىمدى دامىتۋعا ۇلكەن مۇمكىندىك بەرىلىپ تۇرعانىن تىلگە تيەك ەتىپ ءوتتى.
گرانتقا يە بولعان 47 وقۋشىنىڭ 17-ءسى س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە, 14-ءى قازاق ەكونوميكا, قارجى جانە حالىقارالىق ساۋدا ۋنيۆەرسيتەتىندە, 7-ەۋى «استانا» مەديتسينا ۋنيۆەرسيتەتىندە وقىماق. سول سياقتى 4 تۇلەككە قازاق تەحنولوگيا ۋنيۆەرسيتەتىنە جانە ەۋرازيا گۋمانيتارلىق ينستيتۋتىنا گرانت بەرىلسە, 1 وقۋشىعا تۇران استانا وقۋ ورنىنىڭ ەسىگى ايقارا اشىلدى.
– استاناداعى وقۋ ورىندارىندا تەگىن وقۋ – مەملەكەت تاراپىنان جاستارعا جاسالىپ جاتقان يگى باستامالاردىڭ ءبىرى. ۇنەمى ىزدەنىستە بولىپ, ءبىر ورىندا تۇرىپ قالماۋى كەرەك. بۇگىنگى دامىعان زاماندا كوشتەن قالىپ قويعان ادامنىڭ باسەكەگە شىداس بەرۋى ەكىتالاي. سىزدەردىڭ قازاقستاننىڭ ءبىلىمدى ازاماتى بولۋعا ۇمتىلاتىندارىڭىزعا سەنىمدىمىن, – دەپ ءسوزىن جالعادى اسەت يسەكەشەۆ.
بيىل قالا باسشىلىعى ۇلەستىرگەن گرانتتارعا 58,8 ملن تەڭگە قاراستىرىلىپ وتىر. ءداستۇرلى تۇردە جۇزەگە اسىپ جاتقان باستاما اياسىندا قازىرگى ۋاقىتتا ەلوردادا 125 ستۋدەنت ءبىلىم الىپ جاتىر.
ايان ءابدۋالي
