ءزىلزالادان 16 ادام زارداپ شەكتى
جاپونيانىڭ حوككايدو ارالىندا ماگنيتۋداسى 6,7-گە تەڭ ءزىلزالا بولىپ, قازا بولعاندار سانى 16 ادامعا جەتتى. بۇعان قوسا 300-دەن استام تۇرعىن ءتۇرلى دەڭگەيدە جاراقات السا, جەرگىلىكتى قۇتقارۋ ورگاندارى 26 ادامنىڭ ءىز-ءتۇزسىز جوعالىپ كەتكەنىن حابارلادى.
NTV (Nihon Television Network) تەلەكومپانياسى تابيعي اپاتتىڭ ەپيتسەنترى يبۋرا اۋدانىندا, وشاعى 37 شاقىرىم تەرەڭدىكتە ورنالاسقانىن جەتكىزدى. ال اتسۋما ەلدى مەكەنىندە جەر سىلكىنىسىنىڭ كۇشى 7 بالعا دەيىن جەتكەنى انىقتالدى. سونىمەن قاتار اپات كەزىندە بىرنەشە مارتە سەل بولىپتى.
حوكايدو جەرىندە ەلەكتر جۇيەسى ىستەن شىعىپ, ءۇش ميلليونعا جۋىق ءۇي جارىقسىز قالدى. ايماقتا جارىق جۇيەسىن قالپىنا كەلتىرۋ ءۇشىن ءبىر اپتاداي ۋاقىت كەتپەك. سول سياقتى ارالدا جاڭادان اشىلعان اەروپورت تا ۋاقىتشا جۇمىس ىستەمەي تۇر.
قازىرگى ۋاقىتتا اپات ورنىندا 20 مىڭنان استام ادام قۇتقارۋ جۇمىستارىنا جۇمىلدىرىلدى.
قۇپيا زيرات تابىلدى
مەكسيكانىڭ ۆەراكرۋس شتاتىنىڭ پروكۋرورى حورحە ۋينكلەر وتكەن بەيسەنبى كۇنى جاسىرىن تۇردە كومىلگەن 166 ادامنىڭ باس سۇيەگى تابىلعانىن مالىمدەدى.
پروكۋروردىڭ ايتۋىنشا, بۇل مالىمەت بەلگىسىز بىرەۋلەر ارقىلى جەتكەن. وسىدان كەيىن جەرگىلىكتى بيلىك شتات اۋماعىندا تەكسەرىس جۇمىستارىن جۇرگىزىپ, قۇپيا زيراتتىڭ ورنىن انىقتاعان.
– باس-اياعى 32 ورىندا ىزدەۋ جۇمىستارى جۇرگىزىلدى. ناتيجەسىندە, تابىلعان باس سۇيەكتەرگە قاراپ, 166 ادامنىڭ كومىلگەنىن انىقتالدى, – دەپ حابارلادى ۋينكلەر ءباسپاسوز ءماسليحاتىندا.
بۇدان بولەك, 200-گە جۋىق كيىم, 114 ادامنىڭ جەكە قۇجاتى, سونداي-اق بىرنەشە زات تابىلدى. ساراپشىلاردىڭ مالىمەتى بويىنشا, 166 ادام كەم دەگەندە ەكى جىل بۇرىن كومىلگەن ەكەن.
ءبىر ايتارلىعى, مۇنداي جايت مەكسيكادا جاڭالىق ەمەس كورىنەدى. وسىعان دەيىن جاسىرىن زيراتتار حاليسكو, گەررەرو, مورەلوس شتاتتارىنان دا تابىلىپتى.
Toyota 1 ملن كولىكتى قايتارادى
Toyota اۆتوكومپانياسى ءورت شىعۋ قاۋپى بار كولىكتەردى كەرى قايتارماق. CNN باسىلىمى الەم بويىنشا اقاۋلى اۆتوموبيلدەردىڭ 1 ميلليون داناسى تارالىپ ۇلگەرگەنىن حابارلادى.
وعان 2015-2018 جىلدارى شىققان Prius جانە C-HR SUV ماركالى كولىكتەر ەنگەن. بۇل ماشينالاردىڭ باسىم بولىگى جاپونيادا تارالسا, 200 مىڭى اقش-تا, ال قالعانى ەۋروپا مەن وزگە دە مەملەكەتتەردە ساتىلىپتى.
كومپانيا وكىلدەرىنىڭ مالىمدەۋىنشە, اقاۋ اۆتوكولىك قۋاتىن باسقاراتىن بلوكپەن بايلانىستى سىمداردا كورىنەدى. سەبەبى سىمداردا جىلۋ كورسەتكىشى ارتاتىن بولسا, ماشينا ورتكە ورانۋى مۇمكىن.
بۇل Toyota كومپانياسىندا العاش كەزدەسىپ وتىرعان پروبلەما ەمەس, 2016 جىلى تەجەگىشتەگى اقاۋلارعا بايلانىستى 1,7 ملن ءاۆتوموبيلدى كەرى قايتارىپ العان ەكەن.
ايان ءابدۋالي
