ترامپتىڭ قارقىنى قاتتى
بريۋسسەلدە بەيسەنبى كۇنى وتكەن ناتو سامميتىندە دونالد ترامپ اتالعان ۇيىمنان شىعىپ كەتەتىنىن ايتىپ, وداقتاستارىن قورقىتتى.
اقش پرەزيدەنتى مۇشە ەلدەر سولتۇستىك اليانسقا بەرەتىن قارجىلارىن كوبەيتپەسە, تاپ وسىلاي جاسايتىنىن مالىمدەدى. «ەگەر ارىپتەستەرىم تەز ارادا وزدەرىنىڭ جالپى ىشكى ونىمدەرىنىڭ 2 پايىزىن قورعانىس سالاسىنا بولمەيتىن بولسا, امەريكالىقتار وزدەرىنىڭ مۇددەلەرىنە سايكەس كەلەتىن ىستەردى جۇرگىزەتىن بولادى» دەدى ترامپ سامميتتە سويلەگەن سوزىندە.
ءسامميتتىڭ ەكىنشى كۇنىندە, باعدارلاماعا ساي, اڭگىمە ۋكراينامەن جانە گرۋزيامەن كەلىسسوزدەر جۇرگىزۋ, اۋعانستانداعى احۋالدى تالقىلاۋعا باعىتتالۋى ءتيىس ەدى. بىراق دونالد ترامپ العاشقى كۇنگىدەي تاعى دا ءسوزدى بىردەن بۇزىپ تاستاپ, ءوزىنىڭ بۇعان دەيىن ايتىپ كەلە جاتقان ماسەلەسىن قىستىرىپ جىبەردى.
بۇدان الدىن گەرمانيا تاراپى سامميتتە قورعانىسقا جۇمسالاتىن شىعىندى ۆاشينگتون تالاپ ەتكەن دەڭگەيگە جەتكىزەتىنىن مالىمدەگەن ەدى. ەندى گفر ۇكىمەتى 2024 جىلعا دەيىن جالپى ىشكى ءونىمنىڭ 1,5 پايىزىن وسى ماقساتقا جۇمسايتىن بولدى.
تالىپتەر توبەدەن ءتونىپ تۇر
اۋعانستانداعى «تاليبان» قوزعالىسىنىڭ سودىرلارى تاجىكستانمەن اراداعى شەكارا بويلارىن باسىپ الدى.
كەشە ولار شەكاراداعى حۆادجا گحار ۋەزىنىڭ شەكارا اۋماعىن باقىلاۋعا الدى. ەندى ولاردىڭ بۇل ءوڭىردىڭ بارلىق تەرريتورياسىن باسىپ الۋ قاۋپى ءتونىپ تۇر. بۇعان قوسا, قوڭسىلاس جاتقان داشتي-كالا, يانگي-كالا جانە دارگاد شاھارلارى دا تالىپتەردىڭ قاراۋىنا ءوتىپ كەتۋى مۇمكىن.
اۋعانستان ۇكىمەتى ازىرگە بۇل قارۋلى قاراقشىلاردى قايتارا الاتىنداي كۇشكە يە بولىپ وتىرعان جوق. ال «تاليبان» جاۋىنگەرلەرى تاعى قۇندىز پروۆينتسياسىنداعى تاحارمەن كورشى جاتقان داشتي-ارچي ۋەزىنىڭ پۋلي موماند قالاسىندا تۇرعان ۇكىمەت اسكەرلەرى بولىمشەسىنە شابۋىل جاسادى. ۇرىستا اۋعان ارمياسىنىڭ 32 اسكەري قىزمەتكەرى قازا تاۋىپ, 20 سارباز جارالانىپ قالدى. سودىرلار ولاردىڭ بارلىق قارۋ-جاراقتارىن, تەحنيكالارى مەن وق-دارىلەرىن وزدەرىمەن بىرگە الىپ كەتتى.
تاسقىن قۇرباندارى – 195 ادام
جاپونيانىڭ باتىس قاپتالىندا ورىن العان ءنوپىر سۋ تاسقىنىندا قازا تاپقاندار سانى 195 ادامعا جەتتى.
Kyodo اگەنتتىگىنىڭ حابارلاۋىنشا, بۇلاردان بولەك تاعى 60 ادام حابار-وشارسىز كەتكەن. قازىر ىزدەستىرۋ جۇمىستارىنا 70 مىڭنان استام ادام تارتىلعان. تاعى 6,7 مىڭ ادام باسپاناسىز قالعان.
پرەمەر-مينيستر سيندزو ابە تاسقىننان قاتتى زارداپ شەككەن وكاياما پروۆينتسياسىندا بولىپ, ونداعى ناقتىلى جاعدايمەن تانىستى. ال جۇما كۇنى كەلەسى پرەفەكتۋرا – ەحيمەگە اتتاندى.
جاپونيادا سۋ تاسقىنى 7 شىلدەدە باستالىپ, بارلىعى 15 پرەفەكتۋرانى توپان باسىپ قالدى. ناتيجەسىندە جۇزدەگەن عيمارات قيراپ, اۆتوموبيل جانە تەمىرجولدار بۇلىنشىلىككە ۇشىرادى. بيلىك قاۋىپ قىسپاعىندا قالعان 6 ملن تۇرعىندى باسقا جاققا كوشۋگە شاقىرىپ وتىر. تاسقىن سالدارىنان Mazda جانە Mitsubishi كولىك جاساۋ زاۋىتتارى جۇمىستارىن توقتاتتى.
