كيم چەن ىن قىتايعا نەگە باردى؟
كحدر ليدەرى كيم چەن ىن سەيسەنبى كۇنى قىتايعا ەكى كۇندىك رەسمي ساپارمەن كەلدى.
بۇل ونىڭ سوڭعى ءۇش ايدا بەيجىڭگە ءۇشىنشى مارتە جاساعان ساپارى ەكەن. بىراق بۇعان دەيىنگى ەكى رەتىندە سولتۇستىك كورەيا باسشىسى ەلگە قايتىپ ورال عاننان كەيىن عانا ونىڭ ساپارى تۋرالى حابار تاراتىلىپ كەلگەن ەدى. ال بۇل جولى بەلگىسىز ءبىر سەبەپتەرمەن وقيعا جايىندا جارىسا حابار بەرىلە باستادى. بۇقارالىق اقپارات قۇرالدارىنىڭ مالىمەتىنشە, ساپاردىڭ ماق ساتى 12 ماۋسىمدا سينگاپۋردە وتكەن اقش جانە كحدر باسشىلارىنىڭ تاريحي ءسامميتىنىڭ قورىتىندىلارى, سونداي-اق كورەي تۇبەگىن قارۋسىزداندىرۋدىڭ كەلەشەگى جايىندا قحر توراعاسى سي تسزينپينمەن پىكىر الماسۋ بولىپ وتىر. «تاراپتار كحدر جانە اقش باسشىلارىنىڭ تاريحي سامميتىنەن كەيىنگى ناتيجەلەر, باعالار, پىكىرلەر مەن پوزيتسيالار تۋرالى ءوزارا پىكىر الماستى. ولار كورەي تۇبەگىن قارۋسىزداندىرۋ جونىندەگى ماسەلەلەر بويىنشا وزدەرىن قىزىقتىراتىن جايتتار جونىندە وي ءبولىستى. ال كەزدەسۋدىڭ قورىتىندىسىندا ەكى ەل ليدەرلەرىنىڭ قانداي ناقتى تۇجىرىمعا كەلگەندەرى ازىرگە بەلگىسىز.
اقش تاعى ءبىر ۇيىمنان باس تارتتى
امەريكا قۇراما شتاتتارى تاعى ءبىر جاھاندىق ۇيىم – بۇۇ-نىڭ ادام قۇقىعى جونىندەگى كەڭەسىنەن شىعادى.
بۇل تۋرالى كەشە اقش-تىڭ بۇۇ جانىنداعى ۋاكىلەتتى وكىلى نيككي حەيلي مەملەكەتتىك حاتشى مايك پومپەومەن بىرگە وتكىزگەن ءباسپاسوز ءماسليحاتىندا ايتىپ بەردى. «ءبىز ءوز ۇستانىمىمىز ادام قۇقىعىن قورعاۋدى كەلەمەجگە اينالدىرىپ وتىرعان ۇيىمنىڭ ەكىجۇزدىلىگىمەن ۇيلەسپەيتىن بولعاندىقتان, وسىنداي قادامعا بارىپ وتىرمىز» دەپ اتاپ ءوتتى ول. حەيلي حانىم اقشتىڭ بۇعان قاراماستان, ادام قۇقىعىن ساقتاۋ جونىندەگى باعىتىنان اينىمايتىنىن قوسا كەلىپ, بەلگىلى ءبىر جاعدايلاردا وسى ماسەلەگە بايلانىستى ادام قۇقىعى جونىندەگى كەڭەس پەن بىرگە جۇمىس ىستەۋ مۇمكىندىگىن جوققا شىعارمادى. «ءبىز ادام قۇقىعىن قورعاۋ جونىندەگى كەڭەستى رەفورمالاۋ كەرەكتىگىن بەلسەنە كوتەرە بەرەمىز» دەدى ول. ال پومپەو بۇۇ-نىڭ اتالمىش كەڭەسى ادام قۇقىعىن قورعامايدى, ونى قايتا بۇركەمەلەيدى دەگەندى ايتتى. ونىڭ پىكىرىنشە, «ەكىجۇزدى» كەڭەس «ادام قۇقىعى بۇزىلدى» دەگەن جەلەۋمەن بۇعان ءتىپتى قاتىسى جوق ەلدەردى ايىپتاۋدان ايىلىن جيمايدى. اقش-تىڭ بۇل قادامىن يزرايلدەن باسقا ەشكىم قولداپ وتىرعان جوق.
كانادا ەسىرتكىگە ەرىك بەردى
كانادا سەناتى ەلدە ماريحۋانانى ساتۋ مەن قولدانۋعا رۇقسات ەتىلەتىن زاڭ قابىلدادى.
ەسىرتكىنىڭ ءبىر ءتۇرىن پايدالانۋدى زاڭداستىرىپ بەرىپ وتىرعان زاڭدى قولداپ 52 سەناتور داۋىس بەرسە, 29 دەپۋتات بۇعان قارسى شىقتى. ەندى جاڭا زاڭنىڭ جوباسىنا سايكەس, ەلدىڭ كامەلەتكە جەتكەن كەز كەلگەن ازاماتى 30 گرامم ەسىرتكى ساتىپ الۋعا نەمەسە ءۇيىنىڭ جانىنان ءتورت تۇپكە دەيىن ناشا ەگۋگە قۇقىلى. تەك الكوگول مەن تەمەكى ساتاتىن جەردە عانا ماريحۋانانى تاراتۋعا رۇقسات جوق. زاڭ ەكى ايدان كەيىن كۇشىنە ەنەدى. سوعان دەيىن ەلدەگى ءار پروۆينتسيا ءوز جەرىندە سورا ەگۋدى رەتتەپ وتىراتىن ەرەجە جاساپ الا الادى. كانادانىڭ دەنساۋلىق ساقتاۋ ءمينيسترى دجينەتت پەتيتپاس تەيلور حانىمنىڭ ايتۋىنشا, ەل اقىلدى دا ءادىل ساياسات داۋىرىنە كوشىپ كەلەدى.
سەرىك ءپىرنازار
