اقش پەن كحدر كەلىسىمگە كەلدى
ماۋسىمنىڭ 12-سىندە اقش پەن كحدر ليدەرلەرىنىڭ كوپشىلىك كۇتكەن كەزدەسۋى بولىپ ءوتتى.
كەزدەسۋدىڭ قورىتىندىسى بويىنشا دونالد ترامپ پەن كيم چەن ىن ۆاشينگتوننىڭ سولتۇستىك كورەيا قاۋىپسىزدىگىنە كەپىل بەرەتىنى, ال كورەيلەر ءوز كەزەگىندە ءوزىنىڭ يادرولىق قارۋىن جويىپ جىبەرەتىنى تۋرالى قۇجاتقا قول قويدى.
بىراق سوعان قاراماستان, كحدر جاعىنىڭ قازىر قارۋلارىن بىردەن قۇرتىپ جىبەرە سالمايتىنى بەلگىلى. مۇنىڭ سامميتتەن كەيىن اق ءۇيدىڭ قوجايىنى دا ايتتى. ول, سونىمەن قاتار, سولتۇستىك كورەياعا تاڭىلىپ وتىرعان سانكتسيانىڭ ءازىر الىنبايتىنىن مالىمدەدى. «مۇنىڭ ءبارى العاشقى قادام عانا. كورەي تۇبەگىندەگى ەكى ەلدى جارقىن بولاشاققا باستايتىن كۇندەر ءالى الدا» دەدى ترامپ.
بۇعان قوسا, كەزدەسۋ بارىسىندا ەكى ليدەردىڭ ءبىر-بىرلەرىن ءوز ەلدەرىنە قوناققا شاقىرعانى دا بەلگىلى بولدى.
«تاليباندار» تالابى – تىكەلەي تىلدەسۋ
اۋعانستانداعى «تاليبان» قوزعالىسىنىڭ كوسەمى حايباتۋللا احۋندزادا اقش-تى بەيبىت كەلىسىمدى باستاۋعا شاقىردى.
ول وسى ارقىلى اۋعانستاندا كوپ جىلدان بەرى جالعاسىپ كەلە جاتقان مەملەكەت پەن قوزعالىس اراسىنداعى تەكەتىرەسكە نۇكتە قويۋعا بولاتىنىن مالىمدەدى.
«ەگەر امەريكانىڭ رەسمي تۇلعالارى جانجالدى بەيبىت جولمەن بىتىرۋگە سەنەتىنى راس بولسا, دەرەۋ بىزبەن تىكەلەي تىلدەسۋ جۇرگىزىلەتىن كەلىسسوز ۇستەلىنە وتىرۋعا ءتيىس, – دەدى «تاليبان» باسشىسى. – بۇل تاراپتا امەريكالىق جوعارى لاۋازىمدى شەنەۋنىكتەر تاراپىنان جىبەرىلىپ كەلە جاتقان ەڭ ۇلكەن قاتەلىك ولاردىڭ بارلىق ۋاقىتتا كۇش كورسەتىپ, قىسىم جاساۋدىڭ ءاردايىم وڭ ناتيجە اكەلە بەرمەيتىنىن ەسكەرمەي كەلەدى».
تاليبتەر كوسەمى سونداي-اق «اۋعانستاندى قۇتقارىپ قالۋدىڭ جالعىز جولى – اقش پەن ناتو-نىڭ وپەراتسياسىنا قاتىسۋشى ەلدەر اسكەرلەرىن بۇل جەردەن جەدەل الىپ كەتۋ» ەكەنىن اشىپ ايتتى. «بىزگە جاسالعان شەشىمدى قولداۋ سول بولادى» دەدى احۋنزادا. ول اۋعان حالقىنا زالال اكەلىپ وتىرعان قيراتۋ تىرلىكتەرىن توقتاتۋدىڭ بىردەن-ءبىر جولى بەيبىت كەلىسىم ەكەنىن اتاپ ءوتتى.
اۋعانستان پرەزيدەنتى 7 ماۋسىمدا رامازان ايى اياقتالعاننان كەيىن «تاليبان» قوزعالىسىمەن بىرجاقتى بىتىمگە كەلۋ ەنگىزىلەتىنىن جاريالاعان ەدى.
ماكەدونيانىڭ جاڭا اتاۋى انىقتالدى
بۇرناعى كۇنى سكوپە مەن افينا ماكەدونيا رەسپۋبليكاسىنىڭ رەسمي اتاۋى قالاي بولۋى كەرەكتىگى جونىندە كەلىسىمگە كەلدى.
بۇل تۋرالى ماكەدونيانىڭ پرەمەر-ءمينيسترى زوران زاەۆ ءباسپاسوز ءماسليحاتىندا مالىمدەدى. «ءبىز تاريحي كەلىسىمگە قول جەتكىزدىك… ەندى «سولتۇستىك ماكەدونيا رەسپۋبليكاسى» دەگەن اتاۋ بارلىق تىلدەرگە اۋدارىلادى» دەپ اتاپ ءوتتى ول. زاەۆ سونىمەن بىرگە وسىنداي بىرجاقتى كەلىسىمگە كەلۋدىڭ ەلدىڭ كەلەشەكتەگى دامۋىنا دا كەپىلدىك بەرەتىنىن ايتتى.
«وسى تالاس ماسەلەسىن شەشە وتىرىپ, ءبىز ەكى دوستاس ەلدىڭ اراسىنداعى قارىم-قاتىناستى جاقسارتا ءتۇسۋدىڭ جولدارىن دا قاراستىردىق. ءبىزدىڭ ازاماتتارىمىز ءۇشىن ەكونوميكالىق جاڭالىقتار اشىپ بەرۋ – ەندى ءوز قولىمىزدا. ءبىز ەلدى وقشاۋلاندىرۋدان الىپ شىعۋ ءۇشىن كوپ جىلدار بويعى تالاستىڭ جايىن ەكى جاق ءۇشىن وڭتايلى شەشە الدىق».
ماسەلە مىنادا, ماكەدونيا اتتى تاريحي جەر گرەكيادا دا بار. ونداعى تۇرعىندار اتاقتى الەكساندر ماكەدونسكيدىڭ دۇنيەگە كەلگەن وتانىن جۇرتتىڭ شاتاستىرىپ الماۋى ءۇشىن بۇرىنعى يۋگوسلاۆيا قۇرامىنان ءبولىنىپ شىققان ەلدىڭ بۇلايشا اتالماۋىن تالاپ ەتىپ كەلگەن بولاتىن.
