تۇركيادا ورتا عاسىردا سالىنعان عيمارات كوشىرىلدى
تۇركيانىڭ وڭتۇستىك-شىعىسىندا «يليسۋ» سۋ قويماسىنىڭ سالىنۋىنا بايلانىستى سول ماڭداعى مادەني مۇرالار باسقا جەرگە كوشىرىلىپ جاتىر.
سونىڭ ءبىرى – ءحىى عاسىردا سالىنعان «ارتۋكلۋ» مونشاسى. عيمارات تۇتاستاي كوشىرىلىپ, باتمان پروۆينتسياسىنداعى حاسانكەيف مادەني باعىنا جەتكىزىلگەن.
الدا تاعى جەتى تاريحي مۇرا نىسانىنىڭ ورنى وزگەرەدى. ولاردىڭ بارلىعى ءبىر جەرگە جينالىپ, حاسانكەيفتە ءتۋريزمدى دامىتۋعا ۇلەس قوسادى. تۇركيا مەملەكەتتىك سۋمەن قامتۋ جونىندەگى باسقارماسىنىڭ ديرەكتورى مۋرات ادجۋدىڭ ايتۋىنشا, 2017 جىلعى 12 مامىردا 555 جىل تۇرعان زەينەل بەي مولاسى كوشىرىلگەن.
بىشكەك قالاسىنىڭ جاڭا مەرى سايلاندى
قىرعىزستان استاناسىنىڭ جاڭا مەرى ەتىپ بىشكەك قالالىق كەڭەسىنىڭ دەپۋتاتتارى ازيز سۋراكماتوۆتى سايلادى. سۋراكماتوۆكە 45 دەپۋتاتتىڭ 43-ءى داۋىس بەرىپ, بىرەۋى قارسىلىق تانىتتى. قالا باسشىسىنا جەڭىسكە جەتۋ ءۇشىن 23 داۋىس جيناۋ كەرەك بولعان.
ازيز سۋراكماتوۆ – قادپ, «ونۋگۋ-پروگرەسس», «مەكەنىم قىرعىزستان» جانە «قىرعىزستان» سىندى بەس فراكتسيانىڭ تورتەۋى ەنەتىن بقك مۇشەلەرىنىڭ باسىم كوپشىلىگىنىڭ كواليتسياسى ۇسىنعان جالعىز ۇمىتكەر بولدى. ۇمىتكەرلەردى ۇسىنۋ قۇقىعىنا «رەسپۋبليكا-اتا-جۇرت» وپپوزيتسيالىق فراكتسياسى مەن پرەمەر-مينيستر يە بولدى. الايدا ولار بۇل مۇمكىندىكتى پايدالانبادى.
مەردى سايلاۋ كەزىندە قالا تۇرعىندارى اكىمدىك الدىندا بالاماسىز سايلاۋ ىسىنە قارسى ميتينگ وتكىزدى.
جاپونيادا اپتاپ ىستىقتان كوز جۇمعاندار كوپ
جاپونيادا اپتاپ ىستىق باسىلماي تۇر. مامىردان تامىزعا دەيىنگى ارالىقتا اۋرۋحاناعا جاتقىزىلعانداردىڭ سانى رەكوردتىق مەجەگە جەتتى.
وتكەن ءۇش اپتادا 71 266 ادام باسىنان كۇن ءوتىپ اۋرۋحاناعا جاتقىزىلعان. بۇل 2013 جىلعى رەكوردتان 15 مىڭعا ارتىق.
ءبىر اپتا بۇرىن كەم دەگەندە 39 ادام قايتىس بولىپ, 13,7 مىڭ ادام اۋرۋحاناعا تۇسكەنى حابارلانعان ەدى. قازىر ەلدەگى اۋا تەمپەراتۋراسى 34-35 گرادۋستان تومەن تۇسپەي تۇر. كەيبىر وڭىرلەردە تەرمومەتر باعانى ءتىپتى 40 گرادۋستى كورسەتىپ جاتىر. بىلتىر جاپونيادا اپتاپ ىستىقتان 44 ادامنىڭ ءومىرى قيىلىپ, ونداعان مىڭ ادام اۋرۋحاناعا جاتقىزىلعان.
دەرەككوزى: kazinform
