تاجىكستاندا بالا تۋ شەكتەلۋى مۇمكىن
دۇنيەجۇزىلىك بانك ساراپشىلارى تاجىكستاندا كەدەيشىلىكتى جەڭۋ ءۇشىن بالا تۋ كورسەتكىشىن ازايتۋ تۋرالى ۇسىنىس ءبىلدىردى.
ساراپشىلاردىڭ مالىمدەۋىنشە تاجىكستانداعى كەدەيشىلىككە, جۇمىسسىزدىققا دەموگرافيالىق ءوسىم سەبەپ بولىپ وتىر. ەلدىڭ دەنساۋلىق ساقتاۋ مينيسترلىگى بالا تۋ ءۇشىن ايەلدەرگە ءبارىن جان-جاقتى جوسپارلاۋدى كەڭەس ەتتى.
– بالا تۋ ارالىعىن 3 جىلعا دەيىن ۇزارتقانىمىز ءجون. سەبەبى ايەل اعزاسى دەمالۋ كەرەك. ال بىزدەگى ايەلدەردىڭ 6-7 پايىزى جىل سايىن بالا تابادى, – دەيدى دەنساۋلىق ساقتاۋ مينيسترلىگى جانىنداعى انا مەن بالاعا مەديتسينالىق قىزمەت كورسەتۋ دەپارتامەنتىنىڭ باسشىسى شەرالي راحماتۋللوەۆا.
بيىل تاجىكستان حالقىنىڭ سانى 9 ملن-نان اسىپ كەتتى. وسىدان بىرنەشە جىل بۇرىن تاجىكستان پرەزيدەنتى ەلدەگى رەسۋرس 10 ملن-عا جەتەتىندىگىن مالىمدەگەن بولاتىن. بۇل ەلدە بەس جىلدا تۇرعىندار سانى ءبىر ملن-عا ارتىپ وتىرادى.
نوبەل سىيلىعىنا ۇسىنىلدى
كورەي حالىق دەموكراتيالىق رەسپۋبليكاسى, وڭتۇستىك كورەيا, اقش باسشىلارى – كيم چەن ىن, مۋن چجە ين جانە دونالد ترامپ بەيبىت الەمدى قولداۋ بويىنشا نوبەل سىيلىعىنىڭ لاۋرەاتى اتانۋى مۇمكىن.
اتى اتالعان باسشىلار قازىرگى ۋاقىتتا كورەي تۇبەگىن يادرولىق قارۋدان ارىلتۋ ماسەلەسىمەن اينالىسىپ جاتىر.
Timە باسىلىمىنىڭ حابارلاۋىنشا, بۇل تىزىمگە ءوز ەلىنەن قۋىلعان كاتالونيانىڭ ەكس-باسشىسى كارلەس پۋچدەمون دا ەندى. ول بىلتىر كاتالونيانىڭ يسپانيادان ەنشىسىن الىپ, ءوز الدىنا جەكە مەملەكەت بولۋ ءۇشىن ءتۇرلى قادامدارعا بارعان. الايدا بۇل ارەكەتتى مادريد تاراپى قۇپ كورمەي, پۋچدەموندى قاماۋعا الۋدى بۇيىرعان ەدى. ارتىنان ەكس-باسشىنىڭ بەلگياعا باسساۋعالاپ كەتكەنى بەلگىلى بولدى.
سونىمەن قاتار ۇمىتكەرلەر اراسىندا ريم پاپاسىنىڭ دا اتى كورىندى. بيىل بەيبىت الەمدى قولداۋ بويىنشا 331 ۇمىتكەر ۇسىنىلىپ وتىر. ونىڭ 216-سى جەكە تۇلعا بولسا, قالعانى – ءتۇرلى ۇيىمدار.
بوكس وليمپيادادان شەتتەتىلە مە؟
حالىقارالىق بوكس قاۋىمداستىعىندا (AIBA) كۇرمەۋىن تاپپاي تۇرعان ماسەلەلەردەن كەيىن وليمپيادا ويىندارىندا بوكس سپورت ءتۇرىنىڭ قالۋى ەكىتالاي بولىپ وتىر.
وتكەن جىلدىڭ قاراشا ايىندا AIBA-نىڭ اتقارۋشى كوميتەتى چينگ-كۋو ۆۋدى بىرنەشە ماسەلەگە بايلانىستى ۇيىمنىڭ پرەزيدەنت لاۋازىمىنان ۋاقىتشا شەتتەتكەن ەدى. كوپ ۇزاماي AIBA-نى 11 جىل باسقارعان ول وتستاۆكاعا كەتكەن بولاتىن. وسى جىلدىڭ قاڭتار ايىندا گافۋر راحيموۆ ۇيىم باسشىسى مىندەتىن ۋاقىتشا اتقارۋعا كىرىسكەن.
حالىقارالىق وليمپيادا كوميتەتى (حوك) تاراتقان مالىمەتتە AIBA باسشىلىعىنداعى ماسەلەلەرگە الاڭداۋشىلىق ءبىلدىرىپ وتىرعانى حابارلاندى. بۇعان قوسا الداعى كونگرەستە بۇل ماسەلەلەر شەشىمىن تاپپاسا, AIBA-نىڭ حوك مويىنداعان حالىقارالىق ۇيىم اتانۋى قيىندايتىنىن جەتكىزدى.
