ديابەت ەمى تابىلا ما؟
كانادانىڭ دارىگەرلەرى اشتىق جاريالاۋ ارقىلى ەكىنشى دەڭگەيلى قانت ديابەتىنەن ارىلۋعا بولاتىنىن دالەلدەدى.
دارىگەر-عالىمدار ەكىنشى دەڭگەيلى ديابەتكە شالدىققان 40-70 جاس ارالىعىنداعى ءۇش ەر ادامعا ارنايى ەكسپەريمەنت جاساعان. تاجىريبە كەزىندە ەكى پاتسيەنت كۇنارا «ورازا» ۇستاسا, بىرەۋى ءۇش كۇننەن اش جۇرگەن. بۇل ديەتا 10 ايعا جالعاسىپتى. ناتيجەسىندە وڭ اسەرىن بەرىپ, ۇشەۋى دە ءبىر ايدان كەيىن انتيديابەتيكالىق دارىلەردەن باس تارتقان.
وسىعان دەيىن ددسۇ الەمدە 347 ملن ادام قانت ديابەتىمەن اۋىراتىنىن حابارلاعان. بولجام بويىنشا 2030 جىلعا تامان ءاربىر جەتىنشى ولىمگە وسى اۋرۋ سەبەپ بولادى ەكەن.
ميگرانتتار ايالدايتىن جەر – يسپانيا
جەرورتا تەڭىزى ارقىلى باس ساۋعالاپ باراتىن بوسقىنداردىڭ, نەگىزىنەن, ايالدايتىن جەرى – يسپانيا. وتكەن ءۇش كۇندە قۇتقارۋشىلار يسپانيا جاعالاۋلارىنان 1,8 مىڭ ميگرانتتىڭ جەتكەنىن انىقتادى.
دۇيسەنبى كۇنى گيبرالتار بۇعازىنا 357 ادامى بار 8 قايىق, البوران تەڭىزىنىڭ جاعاسىنا 303 ادام مىنگەن 6 قايىق جانە 31 جولاۋشىسى بار تاعى ءبىر قايىق جەتكەن. ال وتكەن سەنبى-جەكسەنبى كۇندەرى يسپانيانىڭ قۇتقارۋشىلارى اتالعان جاعالاۋلاردان جالپى سانى 1181 ميگرانت مىنگەن 30 قايىقتىڭ كەلگەنىن انىقتادى. وسىلايشا ءۇش كۇننىڭ ىشىندە يسپانياعا 1872 زاڭسىز ميگرانت باس ساۋعالاپ بارعان.
بيىل يسپانياعا بارعان ميگرانتتار سانى كۇرت ارتتى. جىل باسىنان بەرى جەرورتا تەڭىزى ارقىلى 38451 بوسقىن بارىپتى. بۇل وتكەن ءۇش جىلدى قوسا ەسەپتەگەننەن دە كوپ. حالىقارالىق كوشى-قون ۇيىمىنىڭ مالىمەتى بويىنشا 2018 جىلى ەۋروپا ەلدەرىنە 84,3 مىڭ ادام اتالعان تەڭىز ارقىلى جەتكەن.
جاپونيا قارسى
رەسەيدىڭ كۋريل ايماعىندا اسكەري سىناق وتكىزۋ جوسپارىنا جاپونيا تاراپى قارسىلىق تانىتىپ, ماسكەۋگە نارازىلىق ءبىلدىردى.
جاپونيا ۇكىمەتىنىڭ باس حاتشىسى ەسيحيدە سۋگانىڭ ايتۋىنشا, رەسەيدىڭ بۇل ارەكەتى توكيونىڭ ۇستانىمىنا سايكەس كەلمەيدى ءارى اسكەري كۇشەيتۋگە الىپ كەلەدى. ال «ريا نوۆوستي» اگەنتتىگى ماسكەۋدىڭ اسكەري سىناق وتكىزۋ جوسپارى تۋرالى توكيونى حاباردار ەتكەن.
وتكەن ايدا ۆلاديمير پۋتين جاپونيا پرەمەر-ءمينيسترى سيندزو ابەگە جىل سوڭىنا دەيىن بەيبىت كەلىسىم ورناتۋدى ۇسىنعان. الايدا جاپون تاراپى شەكارا داۋى شەشىلمەيىنشە مۇنداي كەلىسىمگە قول قويىلمايتىنىن جەتكىزدى.
ايتا كەتەيىك, ەكى مەملەكەت اراسىنداعى بەيبىت كەلىسىم 70 جىلدان بەرى جاسالماي كەلەدى. توكيو جاعى يتۋرۋپ, كۋناشير, شيكوتان جانە حابوماي ارالدارىن كەرى قايتارىپ العىسى كەلەدى. ال ماسكەۋ اتالعان ورىندار ەكىنشى دۇنيەجۇزىلىك سوعىستان كەيىن كسرو قۇرامىنا كىرگەنىن العا تارتادى.
