قالامگەرلەردى قولدايدى
«نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتىڭ جازۋشىلار وداعىنىڭ توراعاسى ۇلىقبەك ەسداۋلەت باستاعان قالامگەرلەر قاۋىمىمەن كەزدەسۋىندە بىرلەسىپ اتقاراتىن ىستەر تالقىلانىپ, پارتيا مەن اتالمىش ۇيىم اراسىندا ءوزارا ىنتىماقتاستىقتى نىعايتۋ جونىندە مەموراندۋمعا قول قويىلدى.
«نۇر وتان» پارتياسى الدا جاس اقىن-جازۋشىلاردى ىنتالاندىرۋ ماقساتىندا «رۋحاني جاڭعىرۋ» باعدارلاماسى اياسىندا ادەبي بايقاۋ وتكىزبەك. سونىڭ ناتيجەسىندە 5 اتالىم بويىنشا 15 قاتىسۋشىعا جۇلدە تاپسىرۋ كوزدەلىپ وتىر. سونداي-اق جازۋشىلار وداعىمەن بىرلەسىپ «استانا» تەلەارناسىنان كورسەتىلەتىن ارنايى تەلەباعدارلاما دايىنداۋ ءىسى قولعا الىنباق. بۇل تەلەجوبا فورماتى مەن مازمۇنى جاعىنان اقىن-جازۋشىلاردىڭ زامانعا لايىق جاڭا مىنبەرى بولماق.
ءۇشىنشى جوبا – YouTube-تە ارنايى كانال اشىپ, كورەرمەندەرگە يدەولوگيالىق, تاربيەلىك سيپاتتاعى كوركەم دۇنيەلەر ۇسىنۋ. ال ءتورتىنشى جوبا – پارتيالىق باستامالار اياسىندا قايتا جاڭعىرتىلعان كىتاپحانالاردا اقىن-جازۋشىلارمەن كەزدەسۋلەر, ءتۇرلى شىعارماشىلىق كەشتەر وتكىزەتىن ارنايى كلۋبتار قۇرۋ.
«بۇل جوبالاردىڭ بارلىعىن جاس اقىن-جازۋشىلارىمىزعا بەرىلىپ وتىرعان مول مۇمكىندىك دەپ ەسەپتەيمىز. سوندىقتان وسى ءمۇمكىندىكتى ءتيىمدى پايدالانىپ, العا قويعان ماقساتتارىمىزعا جەتۋ ءۇشىن بىرلەسىپ جۇمىس ىستەيىك» دەدى م.اشىمباەۆ.