سينگاپۋر – ەڭ قولايلى قالا
Expat Explorer جاريالاعان جىل سايىنعى ساۋالناما قورىتىندىسى بويىنشا سينگاپۋر ەكسپاتتار ءۇشىن ۇزدىك ەل اتاندى.
ساراپشىلار ءوز رەيتينگىندە تابىس دەڭگەيىن, ءومىر ءسۇرۋ ساپاسىن ەسكەرگەن. قورىتىندىسىندا سينگاپۋر ەڭ جوعارى ورىنعا كوتەرىلدى. ودان كەيىنگى تىزىمدە جاڭا زەلانديا مەن گەرمانيا كەلەدى. كانادا مەن باحرەينگە دە بەستىكتەن ورىن تابىلدى. رەيتينگتە ەڭ جوعارى جالاقى الاتىن ەلدەردىڭ كوشباسشىسى شۆەيتساريا بولىپ وتىر. بۇل ەلدە جۇمىس ىستەۋگە كەلگەن شەتەلدىكتەرگە جىلىنا 202 مىڭ دوللاردان تولەيدى. ونىڭ ىزىندە اقش (185,1 مىڭ دوللار), گونكونگ (178,7 مىڭ دوللار) كەلەدى.
تاڭعاجايىپ كولىكتەر
فرانتسيا استاناسى پاريجدەگى اۆتوسالونداردىڭ بىرىندە بولاشاقتىڭ كولىكتەرى تانىستىرىلدى.
جۇرت نازارىنا ۇشاتىن كولىك, جۇرگىزۋشىسىز قوزعالاتىن اۆتوبۋس پەن تاكسي سەكىلدى بۇرىن-سوڭدى قولدانىستا بولماعان كولىكتەر ۇسىنىلدى. مامانداردىڭ ايتۋىنشا, الداعى ۋاقىتتا بۇل كولىكتەر كوپشىلىكتىڭ قىزىعۋشىلىعىن تۋدىرىپ, سۇرانىسقا يە بولادى. قازىردىڭ وزىندە بىرنەشە كومپانيانىڭ تاپسىرىس بەرگەنى حابارلاندى. پاريجدەگى جەرگىلىكتى تاكسي قىزمەتتەرىنىڭ ءبىرى كليەنتتەردى تاسىمالداۋ ءۇشىن وسى مودەلدەردى ەنگىزۋدى جوسپارلاپ وتىر. كەلەر جىلى دۋبايدا جۇرگىزۋشىسىز باسقارىلاتىن 25 اۆتوبۋس قولدانىسقا ەنگىزىلمەك.
پلاستيك ىدىسقا تىيىم سالىنادى
ەۋروپارلامەنت پلاستيكتەن جاسالعان بۇيىمدارعا, اسىرەسە ىدىس-اياقتارعا تىيىم سالۋدى تالقىلادى.
پلاستيكالىق اسحانا قۇرالدارى جانە تەڭىز قوقىسىنىڭ 70 پايىزىن قۇرايتىن وزگە دە زاتتارعا ەۋروپا وداعى نارىعىندا 2021 جىلدان باستاپ تىيىم سالۋ جوسپارلانىپ وتىر. ال بالاماسى جوق ىدىستاردى پايدالانۋعا 2025 جىلعا قاراي شەكتەۋ قويىلماق. مۇنداي بۇيىمداردىڭ ىشىندە تاماق, دەسەرت جانە بالمۇزداق سالۋعا ارنالعان كونتەينەرلەر بار. وسىنداي تىيىم تەمەكى ونىمدەرىنىڭ قالدىقتارىنا دا قاتىستى بولادى. بۇل ۇسىنىستار 22-25 قازاندا ەۋروپارلامەنتتىڭ پلەنارلىق سەسسياسىنا داۋىس بەرۋگە ۇسىنىلادى.
