اقش ەسكى سانكتسيالارىن قولعا الدى
اق ءۇي باسشىسى دونالد ترامپ يرانعا سالعان ەسكى سانكتسيالارىن تولىقتاي قايتا قولعا الدى. اقش-تىڭ بۇل ەلگە قويعان شەكتەۋى 2015 جىلى توقتاتىلعان بولاتىن.
BBC اگەنتتىگىنىڭ حابارلاۋىنشا, ەندى يران باتىس ەلدەرىمەن بيزنەس جۇرگىزە المايدى. ناقتىراق ايتقاندا, ۆاشينگتون بۇل ەلدىڭ مۇنايىن ساتىپ الۋعا تولىقتاي تىيىم سالدى. سول سياقتى ەنەرگەتيكا سالاسىنا دا شەكتەۋ قويىلدى. ال يراننىڭ ورتالىق بانكىمەن كەلىسىم جۇرگىزگەن كەز كەلگەن شەتەلدىك كومپانيا امەريكانىڭ قاھارىنا ىلىگەتىن بولادى.
امەريكانىڭ جوسپارى بويىنشا مۇنداي حالىقارالىق تىيىمدار يراننىڭ يادرولىق باعدارلاماسىن توقتاتۋىنا, سونداي-اق سيريا پرەزيدەنتى باشار اسادتىڭ قولداۋىنان باس تارتۋىنا سەپتىگىن تيگىزەدى.
گيننەستىڭ كىتابىنا ەنگەن كيىز ءۇي
موڭعوليانىڭ شەبەرلەرى جاساعان الىپ كيىز ءۇي گيننەسستىڭ رەكوردتار كىتابىنا ەنگىزىلدى. بۇل تۋرالى montsame باسىلىمى حابارلادى.
«سەلنەن» كومپانياسىنىڭ قىزمەتكەرلەرى دايىنداعان كيىز ءۇي موڭعوليانىڭ شىعىسىنداعى دورنوگوۆ ايماعىنىڭ حاتانبۋلاگ اۋىلىندا قۇرىلعان. 36 قاناتتى كيىز ءۇيدىڭ جالپى اۋدانى 1 مىڭ شارشى مەتردى, ال بيىكتىگى 14 مەتردى قۇرايدى. ول ءبىر مەزەتتە شامامەن 500 ادامدى سىيدىرا الادى.
كوشپەندىلەر ءۇيىنىڭ باستى ەرەكشەلىگى – موڭعول xالقىنىڭ ءداستۇرلى ديزاينىمەن ساندەلگەن. ۇلكەن بولعانىنا قاراماستان, ونىڭ نەبارى ءتورت باعاناسى بار. جاڭا عيمارات شەتەلدىك تۋريستەردى تارتۋ ماقساتىندا پايدالانىلماق.
الەمدىك تۇڭعىش روبوت-تەلەجۇرگىزۋشى
قىتايدىڭ شىعىسىنداعى چجەتسزيان پروۆينتسياسىنىڭ حانچجوۋ قالاسىندا ءوتىپ جاتقان V دۇنيەجۇزىلىك World Internet Conference كونفەرەنتسياسى بارىسىندا تەلەجۇرگىزۋشى كەيپىندەگى جاساندى ينتەللەكتتىڭ قاتىسۋىمەن العاشقى جاڭالىقتاردى كورسەتتى.
«تەلەجۇرگىزۋشى» سينحۋا جاڭالىقتار اگەنتتىگى مەن قىتايدىڭ رەسمي مەدياوكىلدىگى جانە قىتايلىق Sogou.com ىزدەۋ كومپانياسىنىڭ بىرلەسكەن جوباسى اياسىندا جاسالدى. Iت سالاسىنداعى ەڭ جاڭا تەحنولوگيالار نەگىزىندە جاسالعان ەر ادام بەينەسىندەگى تەلەجۇرگىزۋشىنىڭ داۋسى دا, بەت-الپەتى مەن قيمىل-قوزعالىسى دا ادامنان اينىمايدى. «ول» قازىر ءوز بەتىنشە حابار تاراتۋعا ۇيرەنۋدە. ال ماتىندەردى كاسىبي جاڭالىق تاراتۋشى رەتىندە وقي الادى. سونداي-اق روبوت تەلەجۇرگىزۋشى رەسمي ۆەب-سايتتا جانە ءارتۇرلى الەۋمەتتىك جەلىلەردە 24 ساعات بويى ۇزدىكسىز جۇمىس ىستەۋگە قاۋقارلى.
