ەجەلگى قۇرلىقتىڭ ءىزى تابىلدى
حالىقارالىق گەوفيزيكتەر توبى انتاركتيكاداعى مۇز استىنان ەجەلگى قۇرلىقتىڭ ءىزىن انىقتادى. بۇل تۋرالى Live Science باسىلىمى حابارلادى.
عالىمدار 2003-2013 جىلدار ارالىعىندا ەۋروپا عارىش اگەنتتىگىنە تيەسىلى سپۋتنيكتىڭ مالىمەتتەرى نەگىزىندە جەر ليتوسفەراسىنىڭ 3D كارتاسىن جاسادى. «شىعىس انتاركتيكادا 160 ميلليون جىل بۇرىن قوسىلعان انتاركتيكالىق قىرتىستىڭ جانە وزگە دە قۇرلىقتاردىڭ ۇقساستىعى مەن ايىرماشىلىقتارىن انىقتايتىن گەولوگيالىق ەرەكشەلىكتەردىڭ موزايكاسىن بايقادىق» دەپ ءمالىم ەتتى زەرتتەۋشىلەردىڭ ءبىرى فاۋستو فەرراچچولي.
سونىمەن بىرگە عالامشارىمىزدىڭ گراۆيتاتسياسى تۋرالى مالىمەتتەر ماماندارعا مۇز استىنداعى جاسىرىن تەكتونيكالىق تاقتايشالاردىڭ تاريحىن كورۋگە كومەكتەستى.
سولتۇستىك كورەيا يادرولىق قارۋىن جاسىرىپ وتىر ما؟
ۆاشينگتوننىڭ ستراتەگيالىق جانە حالىقارالىق زەرتتەۋلەر ورتالىعىنىڭ بايانداماسىندا سولتۇستىك كورەيادا 13 جاسىرىن راكەتالىق بازانىڭ انىقتالعانى حابارلاندى.
Reuters باسىلىمىنىڭ مالىمەتى بويىنشا, كورەي ەلىندە باس-اياعى 20 جاسىرىن بازا بار. ال اتالعان ورتالىقتىڭ ساراپشىسى دجوزەف بەرمۋدەس ءوز سوزىندە اقش-پەن جۇرگىزىپ جاتقان كەلىسسوزدەرىنە قاراماستان كحدر بيلىگى نىسانداردى قوسۋلى كۇيدە ۇستاپ وتىر.
باياندامادا جاسىرىن بازالار شالعاي جاتقان تاۋلى ايماقتاردا ورنالاسقانى ايتىلادى. مىنە, ءدال وسىندا ءتۇرلى قاشىقتىقتاعى بالليستيكالىق راكەتالار جاسىرىلعان بولۋى مۇمكىن. ونىڭ ەڭ ءىرىسى اقش جەرىنە دەيىن جەتۋى مۇمكىن.
ەكى ەل اراسىنداعى كەلىسىم بويىنشا كورەي تۇبەگى جويقىن قارۋدان تازارتىلۋى ءتيىس ەدى.
اسكەري روبوتتاردى سىنايدى
ۇلىبريتانيادا ادامدار مەن روبوتتاردىڭ بىرلەسكەن اسكەري دايىندىعى ءجۇرىپ جاتىر.
«Autonomous Warrior» جوباسى اياسىندا الداعى ءتورت اپتا بويى وتەتىن بۇل شارادا روبوتتاندىرىلعان اسكەري تەحنيكانىڭ الۋان ءتۇرى سىنالماق. اتالمىش جوبانىڭ ارقاسىندا ەل ۇكىمەتى روبوتتاردىڭ ءبىر-بىرىمەن تىزە قوسىپ ارەكەت ەتە الۋعا يكەمىن عانا بايقاعالى وتىرعان جوق, سونداي-اق ولاردى بىرىككەن كورولدىكتىڭ اسكەري بولىمشەلەرىمەن بىرىكتىرۋ جولدارىن دا ىزدەستىرمەكشى. «دايىندىق بارىسىندا روبوتتاردىڭ باقىلاۋ, الىستان نىسانانى ءدال كوزدەۋ, جەدەلدىلىك جانە اسكەري وتريادتاردى قارۋ-جاراقپەن قامتاماسىز ەتۋ سەكىلدى قابىلەتتەرى ولشەنەدى» دەيدى مەملەكەتتىڭ قورعانىس مينيسترلىگى وكىلدەرى.
