قىتاي «جاساندى كۇن» جاسايدى
قىتايلىق «جاساندى كۇن» دەگەن اتاۋعا يە بولعان پلازما 100 ميلليون تسەلسي گرادۋسقا دەيىن قىزدىرىلىپ, سىناقتان ءوتتى.
Hi-news باسىلىمى ونىڭ جۇمىسىمەن قىتاي عىلىم اكادەمياسىنىڭ پلازما فيزيكاسى ينستيتۋتىنىڭ عالىمدارى اينالىسقانىن حابارلادى. سونىمەن قاتار اپپاراتتى قۇرۋعا 35 مەملەكەتتىڭ ماماندارى قاتىستى. سىناق ناتيجەسى بويىنشا بولاشاق ستاتسيونارلىق تەرمويادرولىق رەاكتوردى قۇرۋ ءۇشىن قاجەتتى فيزيكالىق جاعدايلاردى الۋعا بولاتىنى انىقتالدى. قازىرگى ۋاقىتتا عالىمدار «جاساندى كۇندى» جاساپ قانا قويماي, ەنەرگيانى ساقتاۋدىڭ جاڭا جولدارىن دا قاراستىرىپ جاتىر.
ەكولوگياسى ەرەكشە قالا
اقش-تىڭ فلوريدا شتاتىندا ەرەكشە قالا بار. Deutsche Welle باسىلىمىنىڭ حابارلاۋىنشا,
بەبكوك-رەنچ تۇرعىندارى كۇن ەنەرگياسى ارقىلى عانا كۇن كورەدى.
مۇندا قازىرگى ۋاقىتتا 20 مىڭعا جۋىق ءۇي بار. بۇعان قوسا بەبكوك-رەنچتىڭ ەكولوگياسىنا زيان كەلمەس ءۇشىن ەلەكترلى كولىكتەن وزگەسىنىڭ جۇرۋىنە تىيىم سالىنعان. ال العاشقى تۇرعىندارى وسى جىلدىڭ قاڭتار ايىندا كوشىپ بارىپتى. اقش-تا شۋاقتى قالانى سالۋ وڭايعا تۇسپەپتى. كەتكەن شىعىننىڭ ورنى تولاتىنىنا كوپشىلىك كۇمانمەن قاراعان. قازىر ءبارى جوسپار بويىنشا جۇزەگە اسىپ جاتىر. ال وسى جىلدىڭ سوڭىنا دەيىن مۇندا 50 مىڭعا جۋىق ادام كوشىپ كەلەدى دەپ بولجانىپ وتىر.
كوسوۆو ساۋدا سوعىسىن جاريالادى
كوسوۆو سەربيا مەن بوسنيا جانە گەرتسەگوۆيناعا قارسى ساۋدا سوعىسىن جاريالاپ, وسى ەلدەردىڭ بارلىق تاۋارلارىنا 100 پايىز كەدەندىك باج سالىعىن ەنگىزدى.
كەدەندىك باجداردى كوتەرۋ تۋرالى شەشىم كوسوۆو بيلىگى ينتەرپولدىڭ باس اسسامبلەياسىنىڭ ساتسىزدىككە ۇشىراعان ساتىنەن بىرنەشە ساعاتتان كەيىن شىقتى. كوسوۆونىڭ ۇيىمعا كىرۋىنە بۇل ەلدىڭ تاۋەلسىزدىگىن مويىنداماعان مەملەكەتتەر كەدەرگى كەلتىردى. بۇعان ءتىپتى باتىستىڭ قولداۋى دا كومەكتەسپەدى. كوسوۆتار 68 ەلدىڭ داۋىسىن جيناعانمەن, بۇل دا جەتكىلىكسىز بولدى. «سەربيا مەن بوسنيا جانە گەرتسەگوۆيناعا عانا ەمەس, باج سالىعى كوسوۆوعا جامان كوزقاراستاعى كەز كەلگەن مەملەكەت ءۇشىن دە وسىنداي كولەمدە بولادى» دەپ مالىمدەدى وسى ەلدىڭ سىرتقى ىستەر ءمينيسترى بەدجەت پاتسولي.
