رەسەيلىكتەر وق جاۋدىردى
ازوۆ تەڭىزىندەگى وقيعا ماسكەۋ مەن كيەۆ اراسىن شيەلەنىستىرىپ جىبەرگەلى تۇر.
ريا اگەنتتىگىنىڭ حابارلاۋىنشا 25 قاراشا كۇنى رەسەي اسكەريلەرى شەكارادان زاڭسىز ءوتىپ كەتكەنى سەبەپتى كەرچ بۇعازىندا ۋكراينانىڭ «بەرديانسك», «نيكوپول» جانە «يانى كاپۋ» كەمەلەرىن توقتاتقان. بۇعان قوسا رەسەيلىك تاراپتىڭ وق جاۋدىرعانى دا بەلگىلى بولدى. ال ءوز كەزەگىندە ۋكراينالىقتار بۇل ايماقتان وتەتىنىن الدىن الا حابارلاعانىن ايتىپ وتىر. قاقتىعىستان ءۇش ۋكراينالىق جاراقاتتانعان.
ەندى وسى شۇعىل وقيعاعا بايلانىستى بۇۇ قاۋىپسىزدىك كەڭەسىنىڭ وتىرىسى وتكىزىلمەك.
مۇگەدەكتەرگە ارنالعان سمارتفون
براۋن ۋنيۆەرسيتەتىنىڭ عالىمدارى مي قىزمەتى ارقىلى باسقارۋعا بولاتىن سمارتفون جاساپ شىعاردى.
Digital Trends باسىلىمىنىڭ حابارلاۋىنشا جاڭا قۇرىلعى ويلاۋ جۇيەسى ارقىلى جۇمىس ىستەيدى. ول ميدىڭ بەلسەندىلىگى ارقىلى ءتيىستى تاپسىرمالار الىپ, سونى جۇزەگە اسىرادى. ماماندار تاجىريبە جۇزىندە, كالكۋلياتوردى پايدالانىپ, حابارلامالار جىبەرىپ كورگەن. سول سياقتى ونلاين-ساۋدا دا جاسالعان.
بۇل قۇرىلعى قول-اياعى جۇمىس ىستەمەيتىن, سويلەي المايتىن مۇگەدەك جاندارعا ارناپ جاسالىپ وتىر. وسى ارقىلى تسيفرلى تەحنولوگيانى كەڭىنەن پايدالانۋعا, جاقىندارىمەن تىلدەسۋگە سەپتىگى تيگىزىلمەك.
ءزىلزالادان 716 ادام زارداپ شەكتى
يراننىڭ كەرمانشاح پروۆينتسياسىندا ماگنيتۋداسى 6,3 بولاتىن جەر سىلكىنىسى تىركەلدى.
Mehr اگەنتتىگىنىڭ حابارلاۋىنشا تابيعي اپاتتان 716 ادام ءتۇرلى دەڭگەيدە جاراقات الىپ, 1 ادام قازا بولعان. زارداپ شەككەندەردىڭ باسىم بولىگى – گيليانگارب, كاسر-ە شيرين ي سار-پولە-زوحاب قالالارىنىڭ تۇرعىندارى.
ەۋروپالىق-جەرورتا تەڭىزى سەيسمولوگيالىق ورتالىعىنىڭ حابارلاۋىنشا جەراستى ءدۇمپۋىن باعداد قالاسىنان سولتۇستىك-شىعىسقا قاراي 148 شاقىرىم قاشىقتىقتان انىقتاعان. ونىڭ وشاعى 40 كم تەرەڭدىكتە ورنالاسقان.
