قازاقستان كۋبوگىنا بارلىق كوماندانىڭ ىشىنەن ىرىكتەلىپ شىققان «اتىراۋ» مەن «قايرات» تالاستى.
«استانا ارەنا» ستاديونىندا وتكەن فينالدى 4500 كورەرمەن تاماشالادى. كەزدەسۋدىڭ ءفاۆوريتى سانالعان الماتىنىڭ «قايراتى» الدىن الا ۋادە ەتكەندەي, الاڭعا تۇگەل قازاقستاندىق ويىنشىلاردى شىعاردى. سوندىقتان كوپشىلىك ەكى كوماندانىڭ شامالارى دەڭگەيلەس دەۋگە بولادى دەپ باعا بەردى.
العاشقى مينۋتتاردا ويىن قارقىنى باسەڭدەۋ بولدى. ەكى كوماندا ءبىر-ءبىرىنىڭ اڭىسىن اڭدىپ ءبىراز ءجۇردى. بىراق فرانتيشەك كۋبيك ءوز ايىپ الاڭىندا ابايسىز ويناپ, دوپقا قولىن تيگىزىپ الدى. ءسويتىپ «اتىراۋ» قاقپاسىنا پەنالتي بەلگىلەندى. الايدا ون ءبىر مەترلىك نۇكتەدەن باۋىرجان يسلامحان ءمۇلت كەتتى. قاقپاشى ۆلاديمير لوگينوۆسكي دوپتىڭ باعىتىنداعى بۇرىشقا ءدال جانتايا قالدى. ءبىر قاۋىپتىڭ بەتىن قايتارعان اتىراۋلىقتاردىڭ قامالىن «قايرات» اراعا ون مينۋت ۋاقىت سالىپ, ءبارىبىر بۇزىپ كەتتى. كوزگە تۇسكەن – الەكساندر سوكولەنكو.
ەكىنشى تايمدا ەكى جاق تا العا ۇمتىلىپ, شابۋىلعا دەم بەرگەنىمەن ەسەپ وزگەرىسسىز قالدى. «اتىراۋ» قىسىم كورسەتىپ, بەلسەندىلىك تانىتىپ, تىرىسىپ-اق باققانىمەن, تارازى باسىن تەڭەستىرىپ ۇلگەرمەدى.
ءسويتىپ «قايرات» توعىزىنشى رەت قازاقستان كۋبوگىنىڭ يەگەرى اتاندى.
وسىدان ءبىر كۇننەن كەيىن «قايرات» جاڭا باس باپكەرىن تانىستىردى. ەندى الماتىلىق كوماندانى بەلارۋس مامانى الەكسەي شپيلەۆسكي جاتتىقتىرادى. ول باپكەرلىك قىزمەتىن نەمىستىڭ «شتۋتگارت» كومانداسىنىڭ اكادەمياسىندا باستادى. 2013-2018 جىلدار ارالىعىندا «رب لەيپتسيگ» اكادەمياسىندا باپكەرلىك قىزمەت اتقاردى. سوڭعى رەت برەست قالاسىنىڭ «دينامو» كلۋبىنىڭ تىزگىنىن ۇستادى.
دامير قوجامقۇل
