ترامپ قىرىمدى مويىنداي ما؟
اقش پرەزيدەنتى دونالد ترامپ ءوزىنىڭ قىرىمنىڭ رەسەيدىكى ەكەنىن مويىنداۋى مۇمكىن ەكەنىن ايتتى.
اق ءۇيدىڭ قوجاسى ۋكرايناعا قاراستى تۇبەكتىڭ رەسەيگە قاراپ كەتۋىنە وزىنە دەيىنگى پرەزيدەنت باراك وبامانىڭ كىنالى ەكەنىن مالىمدەي وتىرىپ, ءوزى قىرىمنىڭ ەندى رەسەي قۇرامىندا ەكەنىن مويىنداپ قالۋى مۇمكىن ەكەنىن اۋىزعا الدى.
«كورەرمىز» دەدى ول قىرىمنىڭ مارتەبەسى تۋرالى قويىلعان سۇراققا جاۋاپ بەرىپ تۇرىپ.
ۋكراينانىڭ تۇبەكتەن ايىرىلىپ قالۋىنا باراك وبامانى ايىپتى دەپ تاپقان ترامپ ءتۇبەكتىڭ قايتارىلۋى قيىن ەكەنىن دە ءبىلدىردى. ول جۋرناليستەرمەن كەزدەسۋ كەزىندە رەسەيگە قارسى سانكتسيالار جونىندە دە وي قوزعادى. سوزىندە ونىڭ الىنۋى ىقتيمال ەكەنىن جوققا شىعارمادى. «ءبىز رەسەيدىڭ نە ىستەيتىنىنە قارايمىز» دەدى ول.
نەگىزى, دونالد ترامپ پەن ۆلاديمير پۋتين 16 شىلدە كۇنى حەلسينكيدە كەزدەسەتىن بولىپ وتىر.
كانادا اقش-قا قارسى سانكتسيا ەنگىزدى
كانادا ءوزى ءۇشىن بۇرىن-سوڭدى بولماعان قادامعا بارىپ, اقش-تان اكەلىنگەن ازىق-تۇلىك ونىمدەرىنەن 1 شىلدەدەن باستاپ باج سالىعىن سالدى.
ۇيەڭكى جاپىراقتى ەلدىڭ قارجى مينيسترلىگى جاريالاعان مالىمدەمەدە ماسەلە قۇراما شتاتتاردان جىلىنا كەلەتىن شامامەن 12,6 ملرد اقش دوللارى مولشەرىندەگى يمپورتقا سالىناتىن باج سالىعى تۋرالى بولىپ وتىرعانى ايتىلعان. كانادا مۇنى دونالد ترامپ اكىمشىلىگىنىڭ بولات پەن قالايىعا سالعان سالىعىنا جاۋاپ رەتىندە جاساپ وتىر.
اقش باج سالىعىن ترامپتىڭ سايلاۋ الدىندا بەرگەن ۋادەلەرىن جۇزەگە اسىرۋ ەسەبىندە ەنگىزگەن ەدى. ول ەلگە كەلەتىن بۇكىل تەمىر, بولات جانە ونىڭ قۇيماسى سياقتى مەتالداردىڭ 25 پايىزىن قامتيدى. بۇلاردىڭ قاتارىنا تۇربا, رەلس, سىم سەكىلدى زاتتار دا كىرىپ كەتتى. باج سالىعى بۇدان باسقا قالايىدان جاسالاتىن كوپتەگەن ونىمدەردىڭ 10 پايىزىن شارپىدى. ال ازىق-تۇلىك ونىمدەرى اراسىندا ۆيسكي, يوگۋرت, كوفە, ۇيەڭكى شىرىنى, قۇلپىناي دجەمى, پيتستسا, قيار, قىشا, مايونەز, سورپا, شوكولاد, سيىر ەتىنەن جاسالعان دايىن استار بار. تىزىمگە بارلىعى 128 اتاۋلى زات ەنگىزىلگەن.
«كانادادا وسىدان باسقا جول قالعان جوق» دەدى ەلدىڭ سىرتقى ىستەر ءمينيسترىنىڭ ورىنباسارى حريستيا فريلاند.
استروناۆتارعا روبوت سەرىك بولادى
«ۇشقىش مي» حالىقارالىق عارىش ستانتسياسىنا اقش-تىڭ فلوريدا شتاتىنداعى كاناۆەرال مۇيىسىنەن اتتاندى. ونى وربيتالىق بەكەتكە SpaceX كومپانياسىنىڭ Dragon كەمەسى جەتكىزەدى.
اق ءتۇستى دومالاق روبوت جالعىز ەمەس – ستانتسيادا ونىڭ گەرمانيالىق استروناۆت دوسى بار. ستارتتان كەيىن 10 مينۋت وتكەندە, Dragon كاپسۋلاسى Falcon 9 راكەتاسىنىڭ ەكىنشى ساتىسىنان ءساتتى اجىرادى. جوسپار بويىنشا, عارىش كەمەسى دىتتەگەن جەرىنە شىلدەنىڭ 2-دە جەتۋى كەرەك. ونىڭ بورتىنا ستانتسيانىڭ روبوتتالعان شىنتاعىنا جالعايتىن قوسىمشا قول, وسىمدىكتەر بويىنداعى سترەستى ولشەيتىن قۇرال جانە راكتى ەمدەۋ تۋرالى جاڭا زەرتتەۋ ماتەريالدارى تيەلگەن.
بۇعان دەيىن يلون ماسكتىڭ اەروعارىشتىق SpaceX كومپانياسى
ناسا-مەن 1,6 ميلليارد دوللاردىڭ كەلىسىم شارتىنا قول قويدى. سول قۇجاتقا سايكەس, Dragon حالىقارالىق عارىش ستانتسياسىنا وسىمەن 15-ءشى رەت جۇك اكەتىپ وتىر. بۇل جولى وعان 2700 كەلى زات تيەلگەن.
