«حان-شاتىر» ساۋدا ويىن-ساۋىق ورتالىعىندا ەلىمىزدىڭ باس شىرشاسىنىڭ شامدارى سالتاناتتى تۇردە جاعىلدى. استانا اكىمى اسەت يسەكەشەۆتىڭ قاتىسۋىمەن وتكەن ءىس-شارا جىل سايىن ءداستۇرلى تۇردە وتەدى.
شارا بارىسىندا مەرەكەلىك باعدارلامالار كوپشىلىككە ۇسىنىلىپ, جاڭا جىل قارساڭىنداعى وتشاشۋ بولدى. سونداي-اق, سالتاناتتى شارا اياسىندا ەلىمىزدەگى ەڭ ءىرى مۇز قالاشىعىنىڭ اشىلۋ سالتاناتى ءوتتى.
استانادا تەك قانا باس شىرشا ەمەس, سونىمەن قاتار وزگە دە شىرشالاردىڭ شامدارى ءبىر مەزگىلدە جاندى. ناقتىراق ايتساق, استانا تسيركى مەن ورتالىق ساياباق, «بايتەرەك» مونۋمەنتى مەن «استانا بالەت» عيماراتىنىڭ الدىندا ورنالاسقان شىرشالارعا شىراي كىردى. سونداي-اق, جاڭا جىلدىڭ باستى سيمۆولى «الاۋ» مۇزايدىن سارايى مەن ورتالىق الاڭدا, ەسىل اۋدانى اكىمدىگى مەن استانا اۋەجايىنىڭ جانىندا ورنالاسقان.
بيىلعى باس شىرشانىڭ كوركىن 300 000 شامدار تىزبەگى مەن 2000 قىزىلدى-جاسىلدى شامدار كەلتىرىپ تۇر. بۇدان بولەك جاڭا جىلدىڭ سيمۆولى 500 قار ۇشقىنىمەن جانە 3000 ءتۇرلى-ءتۇستى شارمەن بەزەندىرىلگەن. ال جارىقتاندىرۋدا الداعى «ەكسپو-2017» حالىقارالىق مامانداندىرىلعان كورمەسىنىڭ نەگىزگى تۇستەرى – كوك, قىزىل جانە جاسىل ءتۇستەر قولدانىلعان.
اسەم شىرشانىڭ قالانىڭ قاق ورتاسىنان بوي كوتەرىلۋى استانالىقتار مەن قوناقتاردىڭ كوڭىلىن كوتەردى. كوپشىلىكتى بارىنەن بۇرىن مۇز قالاشىعىنىڭ اشىلىپ, پايدالانۋعا بەرىلگەنى ريزا ەتتى. ويتكەنى اتالعان قالاشىققا بالالار تۇرماق ەرەسەكتەردىڭ ءوزى ەرتەگىلەر ەلىنە ساياحاتتاعانداي قىزىعىپ جاتتى. ەلوردا تۇرعىندارى مەن قوناقتارى كەز كەلگەن ۋاقىتتا قالاشىققا كەلىپ تاماشالاي الادى. ءتىپتى, دەمالىس جانە مەرەكە كۇندەرى قوناقتارعا ارنالعان باعدارلاما ازىرلەنىپ, قالا تۇرعىندارىنىڭ كوڭىلىن كوتەرۋ جوسپارلانىپ وتىر. ماسەلەن, مۇندا كونتسەرتتەر, ەستافەتالار مەن ءتۇرلى فلەشموبتاردان تۇراتىن Astana Winter Fest شاراسى وتكىزىلمەك.
سەرىك قۇدايبەرگەنۇلى
