قاسيەتتى رامازان ايىندا بارشا ادامزات بالاسى قۇدىرەتتى اللاح تاعالاعا عيبادات قۇلشىلىقتارىن جاساپ پەندەشىلىكپەن بولعان ءىس-ارەكەتتەرىنە كەشىرىم تىلەپ جاتادى. مۇسىلماننىڭ بەس پارىزىن مۇلتىكسىز ورىنداۋعا نيەت ەتىپ, بەس ۋاقىت نامازىن قالت جىبەرمەي وقىپ دۇعا تىلەيتىن دە وسى, ايلاردىڭ سۇلتانى – رامازان ايى. بۇل ايدا كۇللى مۇسىلمان بالاسى يگىلىكتى, ىزگى ءىس امالدار جاساپ, پەندەشىلىكپەن بولعان ءىس ارەكەتتەرىنە اللادان دۇعا تىلەپ, يماندىلىق قۇلشىلىقتارىن ارتتىرا بەرەدى. اللا رازى بولسىن.
پايعامبارىمىز مۇحاممەد (س.ع.س.) قۇران وقىڭدار, ويتكەنى, قيامەت كۇنى ول ءوز يەلەرىنە (ونى وقىعان كىسىلەرگە) شاپاعاتشى بولىپ كەلەدى دەسە, تاعى ءبىر حاديستەردە قۇران قارايعان جۇرەكتەرگە نۇر بەرەدى, اللامەن سويلەسكىسى كەلگەن ادام قۇران وقىسىن دەيدى.
ۇلىق پايعامبارىمىز, قۇران كارىمدى كىمدە-كىم ءوزى ۇيرەنىپ جانە ونى بىرەۋگە ۇيرەتسە, ول ەڭ جاقسى ادام بولادى دەسە, اللا كىتابىنان ءبىر ءارىپ وقىعانعا ءبىر جاقسىلىق بار دەپ تاعى دا ساۋاپتى ىستەرگە ۇمتىلۋعا جول كورسەتەدى. اللادان پەندەسىنە ۋاحي ەتىلگەن قۇران كارىمدەگى 114-سۇرەلەر مەن 6666-اياتتاردى تالداپ, راۋايات ەتىلگەن حاديستەردى ناسيحاتتاپ, حالىققا ۋاعىزداۋدا, حالىقتىڭ ساناسىنا جەتكىزىپ بەرۋدەگى جۇمىستار سادۋاقاس قاجى عىلماني مەشىتى يمامدارىنىڭ تەرەڭ ءدىني بىلىمدىلىگىن كورسەتەدى.
وسى رامازان ايىنداعى مۇسىلماندار اۋىز ورازالارىن اشىپ بولعاننان كەيىن سادۋاقاس قاجى عىلماني مەشىتىندە تۇنگىلىك ۋاقىتتا وقىلاتىن تاراۋيح نامازىن قاري تۋرسۋنوۆ ابدۋلعاففار ماحمۋدجانۇلى وقيدى. ءبىر قاراعاندا قاراپايىم جان كورىنگەنىمەن قۇراندى قىراعاتتاپ دۇرىس وقۋ جاعىنان اسا دارىندى اللانىڭ شىن سۇيگەن پەندەسى كوپ ءدىني ءىلىم جيناعان, وقىعان-توقىعانى كوپ جاس قاريلەردىڭ ءبىرى دەۋگە ابدەن بولادى. اللا رازى بولسىن.
اللاح تاعالا پەندەلەرىنە سەندەر ءتۇسىنسىن دەپ, ءبىز قۇراندى اراب تىلىندە تۇسىردىك ء(جۇسىپ سۇرەسى, 2 ايات) دەيدى. جاس بالاعا كوپشىلىك الدىنا شىعىپ شاريعات زاڭىنا ساي اللاح تاعالاعا قۇلشىلىق جاساۋى, بۇكىل قۇراندى جاتقا وقۋى كىم-كىمدى بولماسىن قايران قالدىرادى. يسلام دىنىندە قۇران كارىمدى باستان-اياق جاتقا ايتاتىندار «قاري» دەپ اتالادى. ۇلىق پايعامبارىمىزدىڭ ءتىرى كەزىندە دە قۇران كارىمدى جۇزدەگەن ساحابالار تولىق جاتتاپ الىپ, ونى وقۋدىڭ ءتارتىبىن دە جەتە مەڭگەرگەن بولاتىن. ولار: وسمان يبن اففان (ر.ل.ع.), الي يبن ءابۋ تاليب (ر.ل.ع.), ءابۋ يبن كاب (ر.ل.ع.), يبن ماسۋد (ر.ل.ع.), زايد يبن ءسابيت (ر.ل.ع.), ءابۋ مۋسا ءال-اشاري (ر.ل.ع.), ءابۋ دارداۋن (ر.ل.ع.), مۋاز يبن ءجابال (ر.ل.ع.), ءابۋ زايد (ر.ل.ع.), ءابۋ حۋزايفانىڭ قىزمەتشىسى سوليم (ر.ل.ع.), ۋتبا يبن امير (ر.ل.ع.) جانە ت.ب. اللا رازى بولسىن.
قاري تۋرسۋنوۆ ابدۋلعاففار ماحمۋدجانۇلىنىڭ 9 جاسار شاكىرتى بار. ول دا قاسيەتتى قۇران سۇرەلەرىن جاتقا بىلەتىن ەلىمىزدىڭ ەڭ جاس قاريى – مىرزاگەلديەۆ ءيمانالى بەيبىتۇلى. نەبارى 2-ءشى سىنىپتى بيىل بىتىرگەن ءيمانالى وڭتۇستىك قازاقستان وبلىسى, شىمكەنت قالاسىندا 2003 جىلى دۇنيەگە كەلگەن. 9 جاستاعى جاس قاري 5 جاسىنان باستاپ ارابشا حات تانىعان, مەكتەپتە وقۋ وزاتى. سوناۋ الىستاعى كيەلى وڭتۇستىك وڭىرىنەن استاناداعى سادۋاقاس قاجى عىلماني مەشىتىنە ءدىني ءبىلىمىن جەتىلدىرۋگە مەكتەپ دەمالىسى كەزىندە بيىل ارنايى كەلگەن ەكەن. قوسىمشا قاۋاممادين ءال-يتحاني ءال-فارابي ءات تۋركىستاني قاريلار ورتالىعىنداعى ءدىني مەدرەسەدە دە ءبىلىمىن ۇشتاپ جۇرگەن تالانتتى جاستاردىڭ ءبىرى جانە بىرەگەيى دەسەك, ارتىق ايتقاندىق ەمەس. مەشىتتەگى كۇندەلىكتى تاراۋيح نامازىنان سوڭ وقىلاتىن قۇراندا, جينالعان جاماعات وسى يمانالىگە ۇيىدى. كۇندەلىكتى مەشىتتىڭ جاماعاتتارى يمامدار اراسىنان كورمەي قالسا ءبىر-بىرىنەن سۇراپ, كۇبىرلەپ ىزدەپ قالاتىن كەزدەرى دە بولادى. جالپى جاماعات كۇندەلىكتى 20 راكاعات تاراۋيح نامازىنان سوڭ ءيمانالىنىڭ قۇران وقۋىن اسىعا كۇتىپ وتىرادى. تالانتتى جاستىڭ داۋىسىنىڭ قوڭىر ۇندىلىگى مەن مايدا تىلدەرىنىڭ سۇيكىمدىلىگى مەشىتكە جينالعان جاماعاتتى ەلىتىپ اكەتەدى. ءوزى قاتارلى بالالاردىڭ الدى, ورتا جاستاعى ەگدە تارتقان اللانىڭ پەندەلەرىنە جاقسى مىسال بولا بىلەتىن وسىنداي وزىق ويلى جاستار ەلىمىزدە كوبەيە بەرسىن. ءامين.
سۇندەت كاريموۆ,
تەحنيكا عىلىمدارىنىڭ كانديداتى
