مارينا ۆولنوۆا. بۇل ەسىم جۇمىر جەرگە جايىلدى. سوناۋ سىر وڭىرىندە دۇنيەگە كەلىپ, تۇماندى البيونداعى وليمپيادادا تۇڭعىش رەت وتكىزىلگەن قىزدار اراسىنداعى بوكستا ءورشىل رۋح تانىتىپ, قانجىعاسىنا قولا مەدالدى بايلادى.
6 تامىز, 2012 جىل. بوكستان قىزدار اراسىنداعى شيرەك فينال وتكىزىلىپ, 75 كەلى سالماقتاعى مارينا ۆولنوۆا الەم چەمپيونى ۇلىبريتانيالىق ساۆاننا مارشالدى 16:12 ەسەبىمەن ۇتىپ, ايدى اسپانعا ءبىر-اق شىعاردى. نەبارى 23 جاستاعى سپورتشىنىڭ بۇل ءىرى جەتىستىگىنە قازاقستاندىقتار سۇيسىنە قول سوقتى. ەر تانىتار ەرلىكتىڭ ۇلگىسىن پاش ەتكەن جەرلەسىمىزدىڭ وسى جەڭىسىن قالاي ماقتاساق تا, جاراسىمدى. مامانداردىڭ پىكىرىنشە, كلاريسسا شيلدستەن باسىم تۇسە الماۋى بار كۇشىن الدىڭعى ايقاستاردا سارقا پايدالانعان. دەگەنمەن, ناتيجە جامان بولعان جوق.
جالپى, قىزىلوردا وبلىسىندا سپورتتى دامىتۋ ماسەلەسىنە باسا كوڭىل بولىنگەن. 5 سىنىپتا سپورت مەكتەبىنىڭ تابالدىرىعىن اتتاعان مارينانىڭ العاشقى جاتتىقتىرۋشىسى باقىتبەك قۇلباەۆ بوكس الىپپەسىن جەتىك ۇيرەتكەن ەدى. جاتتىعۋ ەرەجەسىن بۇزباعان شاكىرتىنەن جاتتىقتىرۋشىسى دا ۇلكەن ءۇمىت كۇتكەن. سول سەنىم اقتالدى. ماڭداي تەردىڭ وتەۋى قايتىپ, وليمپيادا تورىنە شىقتى.
«قولدا وسكەن تۇلپاردىڭ تاي اتى قالمايدى» دەگەن ناقىل بار. قىز بالا بولسا دا, ازاماتتىڭ ىسىنە تاتىرلىق جەڭىستى ەلىنە سىيلاعان سپورتشىنى حالقى جاقىندا اۋەجايدان كۇتىپ الدى. جەر-جەردە وتكىزىلگەن كەزدەسۋلەردەن ۋاقىت تاۋىپ, بىزگە دە سۇحبات بەردى. جەڭىسىمەن قۇتتىقتادىق. قۇرىش بىلەكتى مارينا اعىنان جارىلدى. تۋعان جەرىن ساعىنىپتى. بالالىق شاققا ساياحات جاساپ, سپورتتاعى جەتىستىگىن تىزبەكتەپ شىقتى.
– مەنىڭ بالالىق شاعىم قالىڭ قازاقتىڭ ورتاسىندا ءوتتى. قازاق تىلىندە ەركىن سويلەۋىمە سولاردىڭ ىقپالى مول بولدى. قازاقتىڭ سالت-ءداستۇرىن دە جەتىك بىلەمىن. اعايىنعا باۋىرمالدىعى, قوناقجايلىعى وزگەلەرگە ۇلگى بولارلىق. ءبىزدىڭ سىر وڭىرىندە سپورتقا ەرەكشە ماڭىز بەرىلگەنىن دە اتاپ وتكىم كەلەدى. العاشىندا دزيۋدومەن شۇعىلداندىم. بوكستى باستاۋىمنىڭ ءوزى دە قىزىق بولدى. باسىندا ءوزىمدى قورعاۋ ءۇشىن بارعانمىن. جاتتىقتىرۋشى مەنىڭ بەيىمىمدى اڭعارىپ, ۇزدىكسىز اينالىسۋىما كەڭەس بەردى. سودان, 2006 جىلدان باستاپ بوكستى جانىما سەرىك ەتتىم. تالماي ەڭبەكتەگەننىڭ ناتيجەسى بولار, 2010 جىلى بوكستان الەم چەمپيوناتىنىڭ كۇمىس جۇلدەگەرى اتاندىم. ال, لوندوندا وتەتىن وليمپياداعا ەكى جىل بويى دايىندالدىم. ءبىرىنشى كەزدەسۋدە كەنيالىق بوكسشىمەن شايقاستىم. ول دا وڭاي شاعىلاتىن جاڭعاق ەمەس. ەكىنشىسىندە, ساۆاننا مارشالمەن جەكپە-جەككە شىقتىم. قورىتىندىسى قانداي بولعانىن وزدەرىڭىز جاقسى بىلەسىزدەر. ءۇشىنشى اقتىق كەزدەسۋدە امەريكالىق بوكسشىنى الا المادىم. مەنىڭ ويىمشا, الدىڭعى ەكەۋىنە بار كۇشىمدى جىبەردىم.
بىراق, بۇل مەنى ەش جاسىتا المايدى,–دەيدى مارينا جىگەرلى ۇنمەن.
دەسەك تە, جارىس بولعاسىن بىرەۋى ۇتىلىس تاۋىپ, ەكىنشىسى جەڭىس تۇعىرىنا كوتەرىلەدى. سپورتشىنىڭ كۇش-قۋاتىن تۇلعاسىنا قاراپ باعالاۋ استە ابەستىك ەكەن. ەگەر, ونىڭ بويىندا جىگەر بولماسا, جەڭىستى ءساتتى كۇتۋ مۇلدە اقىلعا سىيىمسىز. سول ءۇشىن ادام رۋحاني جاعىنان كەمەل بولۋى قاجەت. وسىنداي پىكىردى ورتاعا سالعان مارينانىڭ تۇلا بويىنان ەرلەرگە ءتان قايسارلىقتىڭ نىشانىن اڭعاردىم.
ونىڭ ەلورداعا كەلگەنىنە ءۇش جىلدىڭ ءجۇزى اۋىپ بارادى. مۇندا جاتتىعۋ جۇمىسىن تياناقتى ورىنداۋىنا بارلىق مۇمكىندىك جاسالعان. اپتاسىنا ءۇش رەت ون شاقىرىم جەرگە جۇگىرەدى. ودان قالدى, دەنەنى شىنىقتىرۋمەن اينالىسادى. ەلدەگى اتا-اناسىنا قول ۇشىن بەرەدى. ويتكەنى, ولار ءدال قازىرگى كەزدە جۇمىسسىز. ال, ءوزى ءبىر بولمەلى قىزمەتتىك پاتەردە تۇرىپ جاتىر.
نەدە بولسا, قازاقتىڭ اتىن شىعارعان مارينانىڭ جولى بولەك. ەندىگى وتكىزىلەتىن وليمپياداعا دا بارۋعا نيەتتى. ءيا, ارمان قالا اسقاق استاناعا كەلىپ, تىنىسىن اشقان سپورت- شى قىزدىڭ الار اسۋى ءالى الدا. ءوزى ايتپاقشى, جۇرەكتىلەردى عانا سپورت تورگە شىعارادى.
*ۋىز لەبىز
پانابەك ىرىسوۆ:
مەن ونى بالا كەزىنەن بىلەمىن. سەبەبى, ءبىر كوشەدە قاتار وستىك. يىعىنا سپورتتىق سومكەسىن اسىپ الىپ, سپورت مەكتەبىنەن شىقپايتىن. اقىرى, سول ەڭبەگىنىڭ وتەۋى قايتتى. جاس تا بولسا قابىلەتى مول. الەم چەمپيونىنىڭ مىسىن باسۋ ەكىنىڭ ءبىرىنىڭ قولىنان كەلە بەرمەيدى. العا, جەرلەس, وسى باعىتىنان تايماعايسىڭ!
قايرات جالعاسباەۆ:
كەشەگى لوندوندا وتكەن جارىستا قازاقستان ەلى ون ءۇش مەدال ەنشىلەپ, 12-ورىنعا كوتەرىلدى. بۇل – تاۋەلسىزدىكتىڭ جەمىسى, بۇل – بۇرىن-سوڭدى بولماعان جەتىستىك. مەرەيىمىزدى تاسىتقان مارينا قارىنداسىمدى دا بولە-جارا ايتقىم كەلەدى. جالپى, ونىڭ استاناعا قونىس اۋدارۋى جاڭا تابىستاردىڭ قوسا كەلۋىنە ىقپال جاسادى دەپ ويلايمىن.
ءامىرحان الماعانبەتوۆ
