باق اراسىنداعى ءباسى بيىك باسەكە – س.بەردىقۇلوۆ ءتۋرنيرى. 30 ماۋسىم كۇنى قالام ۇستاعان تىلشىلەردىڭ شاعىن فۋتبول شەڭبەرىندە باسىن قوسقان دوپ دوداسىندا «Elorda Aqparat» كومانداسى كۇمىس جۇلدەگەر اتاندى.
بەلگىلى سپورت ءجۋرناليسى سەيداحمەت بەردىقۇلوۆتى ەسكە الۋعا ارنالعان, «جۋرناليستەردىڭ چەمپيوندار ليگاسى» اتانىپ كەتكەن بۇل دودادا استانانىڭ عانا ەمەس, ايماقتاردىڭ تىسقاققان كوماندالارى اتىن وزدىرۋعا بارىن سالادى. بارلىعى 19 كوماندا باق سىنادى. ولار ءتورت توپقا ءبولىنىپ, ىرىكتەلدى.
«س» توبىندا سىنالعان «Elorda Aqparat» العاشقى ويىندا «ايتىسكەرلەرگە» ەسە جىبەرىپ العانىمەن (3:1), قالعان ويىنداردا ۇپايىن تۇگەندەپ ۇلگەردى. «قازاق سپورتى» باسىلىمىن قاپى قالدىرىپ (2:0), توپتىڭ جەڭىمپازى قىزىلوردانىڭ «اقمەشىتىمەن» تەڭ ءتۇسىپ (1:1), سوڭعى شەشۋشى ويىندا الماتى وبلىسىنىڭ «جەتىسۋ باق» قۇراماسىن تىزە بۇكتىرىپ (3:0) پلەي-وفف كەزەڭىنە ءوتتى.
1/8 فينالدا «ا» توبىنان ءبىرىنشى ورىنمەن سۋىرىلىپ شىققان «Qazaqstan» رترك قۇراماسىمەن كەزدەستى. نەگىزگى ۋاقىت تەڭ اياقتالىپ, ماتچ تاعدىرى پەنالتي سەرياسىندا شەشىلدى. مۇندا «Elorda Aqparat» كومانداسىنىڭ باعى باسىم بولدى.
شيرەك فينالدا تالدىقورعاننىڭ «تۇرانى» تاپ كەلىپ, ويىن 1:1 ەسەبىمەن ءبىتتى. فيناليست 5 مەترلىك نۇكتەدەن انىقتالدى. ەلوردالىقتاردىڭ تاعى دا ەڭسەسى تىك شىقتى.
ال فينالدا ءبىر توپتا تايتالاسىپ, ءبىر-ءبىرىن الا الماعان «اقمەشىتپەن» باس جۇلدەنى ساراپقا سالدى. ەلوردالىقتار ەسەپتى ءبىرىنشى بوپ اشقانىمەن, ەكىنشى تايمدا باسىمدىقتى بەرىپ قويدى. ويىن 3:1 ەسەبىمەن قىزىلوردالىقتاردىڭ پايداسىنا اياقتالدى.
سونىمەن, تۋرنير جەڭىمپازى «اقمەشىت» بولسا, ەكىنشى ورىندا – «Elorda Aqparat», ۇزدىك ۇشتىكتى «تۇران» كومانداسى تۇيىندەدى.
بۇعان قوسا, «ۇزدىك شابۋىلشى» اتاعىن «اقمەشىت» كومانداسىنىڭ ويىنشىسى ادىلبەك جاقانوۆ يەلەنىپ, تۇران كومانداسىنىڭ ويىنشىسى ازامات يمامبەتوۆ «ۇزدىك قورعاۋشى» اتاندى. ال «Elorda Aqparat» كومانداسىنىڭ ءبىرىنشى ءنومىرى ازامات نۇرماتوۆ «ۇزدىك قاقپاشى», «حابار 24» تەلەارناسىنان جاسۇلان قاسىمبەركەباي «ۇزدىك ويىنشى» بولدى.
