قۇرىلىس ماۋسىمى باستالعالى قالادا جولداردى جوندەۋ بويىنشا اۋقىمدى جۇمىستار جۇرگىزىلۋدە. بيىل 115 كوشە سالىنىپ, جوندەلەدى.
ونىڭ 60-ى – ەلدى مەكەندەردە. مىسالى, كوكتال-1-دە – 17 كوشە, وندىرىستە – 9 كوشە, اگروقالاشىقتا – 8 كوشە, سونداي-اق كيرپيچنىي, تەمىرجولشىلار, وڭتۇستىك-شىعىس, شۇبار ەلدى مەكەندەرى جول جۇمىستارىمەن قامتىلدى. بۇل تۋرالى قالا باسشىسى التاي كولگىنوۆ ءمالىم ەتتى.
«بۇگىن بىرقاتار كوشەنىڭ, ونىڭ ىشىندە №27 كوشەنىڭ (ش.بەيسەكوۆا كوشەسىنەن تۇران داڭعىلىنا دەيىنگى ۋچاسكەدە) قۇرىلىس بارىسىمەن تانىستىم. وسى ۋچاسكەدە بيىل 8 جولاقتى قوزعالىستى ماگيسترالدى كوشەنىڭ قۇرىلىسىن اياقتايمىز. ۇزىندىعى 3 شاقىرىم بولاتىن بۇل كوشە اۋداندى ينجەنەرلىك جەلىلەرمەن جانە كىرمە جولدارمەن قامتاماسىز ەتۋگە مۇمكىندىك بەرەدى. بولاشاقتا ايتماتوۆ كوشەسىنىڭ قۇرىلىسى اياقتالعاننان كەيىن (ە10 كوشەسىنەن ۇلى دالا داڭعىلىنا دەيىنگى ۋچاسكەدە) تۇران داڭعىلىنىڭ (سارايشىق كوشەسىنەن ۇلى دالا داڭعىلىنا دەيىن), مۇحامەدحانوۆ كوشەسىنىڭ (تۇران داڭعىلىنان ايتماتوۆ كوشەسىنە دەيىن), ە10 كوشەسىنىڭ (ايتماتوۆ كوشەسىنەن تۇران داڭعىلىنا دەيىن) جۇكتەمەسىن تۇسىرەمىز» دەپ جازدى اكىم ينستاگرامداعى پاراقشاسىندا.
سونداي-اق قالا باسشىسى ە52, ە41 (بەكتۇروۆ جانە تولە بي اۋداندارى) كوشەلەرىنىڭ قۇرىلىس بارىسىمەن تانىستى. «وسى كوشەلەر بويىنشا بىزگە تۇرعىندار كوپتەگەن ساۋالدار قويدى. كوشەلەردىڭ قۇرىلىسى اتالعان اۋدانداردىڭ دامۋىنا قوسىمشا سەرپىن بەرەدى, سونداي-اق قالا تۇرعىندارىنىڭ ءومىر ءسۇرۋ ساپاسى ارتادى. جول جۇمىستارى ەلوردانىڭ بارلىق اۋدانىن قامتىدى. ەكى جىل ىشىندە 300-گە جۋىق كوشە جوندەلدى. مىسالى, وتكەن جىلى 170-تەن استام كوشە, ونىڭ ىشىندە ەلدى مەكەندەردە 100 كوشە جوندەلدى. «جۇمىسپەن قامتۋدىڭ جول كارتاسى» باعدارلاماسى بويىنشا جوندەۋ جۇمىستارىن جۇرگىزۋ سالاسىندا 4 مىڭنان استام جۇمىس ورنى قۇرىلدى» دەپ ءتۇسىندىردى ا. كولگىنوۆ.
