باس قالاعا كورىك بەرگەن ەڭسەلى ەسكەرتكىشتىڭ ءبىرى – ۇلى جىراۋ جامبىل بابامىزدىڭ مونۋمەنتى. ول كورنەكتى مەملەكەت جانە قوعام قايراتكەرى جۇمابەك تاشەنوۆ كوشەسىنىڭ بويىندا ورنالاسقان. بۇل ەسكەرتكىشتى 2008 جىلى استانانىڭ ون جىلدىق مەرەيتويىنا الماتى وبلىسى تارتۋ ەتكەن. اۆتورلارى: ءمۇسىنشى – نۇرلان دالباي مەن ارحيتەكتور – قازبەك جارىلعاپوۆ. مونۋمەنتتىڭ بيىكتىگى – 12 م, تۇعىرداعى اقىن ءمۇسىنى قولادان قۇيىلعان. وندا الىپ تۇلعانىڭ جاس استاناعا باتاسىن بەرىپ تۇرعان بەينەسى ايشىقتى بەدەرلەنگەن.
ءبىر عاسىر عۇمىر كەشكەن جىر الىبى جايىندا اۋزى دۋالى تۇلعالارىمىزدىڭ ايتقان پاراساتتى پىكىرلەرى كوپ. سونىڭ ىشىندە اسا كورنەكتى جازۋشى عابيت مۇسىرەپوۆتىڭ: «جامبىل دۇنيەگە ەكى تۋىپ كەلگەن ادام: توعىز اي, توعىز كۇندە انا قۇرساعىنان تۋدى, توقسان جاسقا كەلگەندە زامان قۇرساعىنان تاعى تۋدى. قازاقتىڭ گومەرىن تۋعىزۋ ءۇشىن زامان توقسان جىل تولعاتتى. ءبىرىنشى تۋعاندا – انا بەسىگىندە ءوستى, ەكىنشى تۋعاندا – وتان بەسىگىندە ءوستى. جامبىلدىڭ اقىندىق ونەرى ماڭگى جارقىراپ جانىپ تۇراتىن فەنيكس قۇس سەكىلدى» دەپ ايتقانىنان تاعىلىمدى وي تۇيەسىز.
