1 قىركۇيەكتە ەلورداداعى 105 مەكتەپتە العاشقى قوڭىراۋ سوعىلىپ, 160 مىڭ وقۋشى ءۇشىن ساباق باستالدى. ولاردىڭ 18 مىڭى مەكتەپكە العاش رەت باردى. ال باس قالادا جاڭادان بوي كوتەرگەن №85 مەكتەپ-ليتسەيىنە مەملەكەت باسشىسى نۇرسۇلتان نازارباەۆتىڭ ءوزى بارىپ, بالالاردى ءبىلىم كۇنىمەن قۇتتىقتادى.
– ءبىلىم كۇنى استاناداعى 1200 ورىنعا شاقتالعان جاڭا ءبىلىم وشاعى اشىلدى. بۇگىندە رەسپۋبليكا بويىنشا 181 مەكتەپ سالىنىپ جاتىر. 23 مەكتەپتىڭ قۇرىلىسى اياقتالىپ, العاشقى وقۋشىلارىن قابىلدادى. قازاقستان بويىنشا 7 مىڭنان استام ءبىلىم ورداسى 3 ميلليون وقۋشىعا ەسىك اشتى. سونىڭ 350 مىڭى مەكتەپ تابالدىرىعىن العاش رەت اتتايدى, – دەدى قازاقستان پرەزيدەنتى.
ەلباسى XXI عاسىرداعى جوعارى تەحنولوگيالىق الەمدە ءىلىم-ءبىلىم يننوۆاتسيانىڭ كىلتى جانە ەلىمىزدىڭ دامۋىنىڭ باستى رەسۋرسى سانالاتىنىن ايتىپ, مەملەكەتىمىز ءبىلىم بەرۋ سالاسىنا زور ءمان بەرىپ وتىرعانىنا توقتالدى.
مەملەكەت باسشىسى فۋنكتسيونالدىق ساۋاتتىلىقتى دامىتۋعا باعىتتالعان ورتا ءبىلىمنىڭ جاڭارتىلعان مازمۇنىنا كوشۋ قاجەتتىلىگىن اتاپ ءوتىپ, وقۋشىلاردىڭ قازىرگى جاعدايدا العان بىلىمدەرى مەن ماشىقتارىن تاجىريبەدە قولدانا الۋعا ءتيىس ەكەنىنە نازار اۋداردى. بۇل ۇستازداردىڭ بىلىكتىلىگى مەن كاسىبيلىگىنىڭ جوعارى دەڭگەيدە بولۋىن تالاپ ەتەدى.
– مەملەكەت پەداگوگتاردى دايارلاۋ, ءبىلىم سالاسىنداعى ەڭبەكاقى جۇيەسىن جەتىلدىرۋ جونىندە جۇيەلى جۇمىس جۇرگىزىپ كەلەدى. وسى وقۋ جىلىنان باستاپ اتتەستاتسيادان وتكەن مۇعالىمدەردىڭ جالاقىسى جاڭا جۇيە بويىنشا 30-50 پايىزعا ارتادى, – دەدى ەل پرەزيدەنتى.
نۇرسۇلتان نازارباەۆ زاماناۋي تەحنولوگيا ءداۋىرى مەن قازاقستاننىڭ ءۇشىنشى جاڭعىرۋىنىڭ تالاپتارى
بالالارعا ساپالى ءبىلىم بەرىپ, ولاردىڭ تالداۋ جانە كرەاتيۆتى دامۋ قابىلەتىن قالىپتاستىرۋ ءۇشىن جاڭا مىندەتتەر قوياتىنىن اتاپ ءوتىپ, وقۋشىلاردىڭ اقپاراتتىق تەحنولوگيا مەن شەت تىلدەرىن ەركىن مەڭگەرۋى قاجەت ەكەنىنە نازار اۋداردى.
ەلورداداعى جاڭا ءبىلىم مەكەمەسىندە 48 كابينەت بار. جاراتىلىستانۋ-ماتەماتيكا باعىتىنداعى №85 مەكتەپ-ليتسەيدىڭ وقىتۋ پروتسەسى مەملەكەتتىك ءبىلىم ستاندارتىنىڭ تالاپتارىنا ساي يننوۆاتسيالىق تەحنولوگيالاردى پايدالانۋ ارقىلى مەملەكەتتىك جانە ورىس تىلدەرىندە جۇرگىزىلەتىن بولادى.
