استانا قالاسى قوعامدىق دامۋ ىستەرى باسقارماسى «رۋحاني جاڭعىرۋ» باعدارلاماسى اياسىندا استانانىڭ 20 جىلدىق مەرەيتويىنا ارناپ ۇيىمداستىرعان جاس اقىندار ءمۇشايراسىنىڭ جەڭىمپازدارى ماراپاتتالدى. سالتاناتتى شاراعا پارلامەنت ءماجىلىسىنىڭ دەپۋتاتتارى, قوعام قايراتكەرلەرى, بەلگىلى قالامگەرلەر قاتىستى.
بيىلعى مۇشايراعا «استانا – جاستار جۇرەگىندە», «استانا – جيىرماداعى جاس قالا» جانە «ەركىن تاقىرىپ» تاقىرىپتارى بويىنشا ءتورت جۇزگە جۋىق اقىن ولەڭدەرىڭ تاپسىردى.
«ءمۇشايرا جاس تالانتتاردى انىقتاپ, ولاردىڭ شىعارماشىلىعىن قولداۋ, دامىتۋ ماقساتىندا بيىل ءۇشىنشى مارتە وتكىزىلدى. ءبىز جىل سايىن بۇل جوبانىڭ دەڭگەيىن ارتتىرۋعا تىرىسامىز. اقىندار سايىسىنا قازاقستاننىڭ تۇكپىر-تۇكپىرىنەن كەلگەن اقىندار قاتىستى. سوندىقتان ءبىز ارقايسىسىنىڭ شىعارماشىلىعىن باعالاۋ ءۇشىن 10 جۇلدەگەردى انىقتادىق» دەدى استانا قالاسى قوعامدىق دامۋ ىستەرى باسقارماسىنىڭ باسشىسى دانيار ەسين.
شىعىس قازاقستان وبلىسىنان كەلگەن ءدانيا ساتبەكقىزى ءمۇشايرا جەڭىمپازى بولىپ تانىلدى. وعان 300 مىڭ تەڭگە اقشالاي سىياقى بەرىلدى. ەكىنشى ورىندى ەنشىلەگەن ورازاي جەڭىسۇلى مەن اباي وراز 200 مىڭ تەڭگەنى يەلەندى. ءۇشىنشى ورىننىڭ يەگەرلەرى اقىلجان ناعاشىباي, مەدەت بوجان جانە ايگەرىم كوكەەۆاعا 100 مىڭ تەڭگە تاپسىرىلدى. «ەڭ ۇزدىك 4 اقىن» اتالىمىنىڭ جەڭىمپازدارى 50 مىڭ تەڭگەلىك سەرتيفيكاتتارعا يە بولدى. «مەن ءۇشىن ءتورت ءجۇز اقىننىڭ اراسىندا جەڭىمپاز بولۋ – ۇلكەن باقىت. بۇل كۇتپەگەن جاعداي بولدى. مۇشايراعا قاتىساتىنىم تۋرالى شەشىمدى اياق استىنان قابىلدادىم. ۇستازىم, وت اۋىزدى, وراق ءتىلدى اقىن ايبەك قاليەۆ شاقىرىپ, وسىنداي جارىس وتەتىنىن ايتتى. ول كەزدە ءوتىنىم بەرۋ مەرزىمىنىڭ اياقتالۋىنا ەكى كۇن قالعان بولاتىن. ولەڭدەرىمدى ەكى كۇننىڭ ىشىندە جازدىم» دەدى بايقاۋدىڭ جەڭىمپازى ءدانيا ساتبەكقىزى.
ءمۇشايرادا توپ جارعان ەڭ ۇزدىك 30 اقىننىڭ ولەڭدەرى كىتاپ بولىپ باسىلىپ شىقتى.
