قر مادەنيەت جانە سپورت مينيسترلىگى ءتىل ساياساتى كوميتەتىنىڭ ۇيىمداستىرۋىمەن «قازاق ءتىلى ءالىپبيىن لاتىن گرافيكاسىنا 2025 جىلعا دەيىنگى كەزەڭ-كەزەڭىمەن كوشىرۋ جونىندەگى ءىس-شارالار جوسپارى» اياسىندا قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى ورفوگرافيالىق جۇمىس توبىنىڭ كەزەكتى وتىرىسى ونلاين جۇيەسىندە وتكىزىلدى.
ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى, فيلولوگيا عىلىمدارىنىڭ كانديداتى انار فازىلجانوۆا جاڭا ءالىپبي نەگىزىندەگى قازاق ءتىلىنىڭ ەملە ەرەجەلەرى جوباسىنا ورفوگرافيالىق توپ مۇشەلەرى مەن تاۋەلسىز ساراپشىلاردىڭ قورىتىندى ساراپتاماسى بويىنشا بايانداما جاسادى. بايانداماشى جۇمىس توبى مۇشەلەرى مەن تاۋەلسىز ساراپشىلار تاراپىنان ايتىلعان سىن-پىكىرلەرگە عىلىمي دايەكتى جاۋاپ بەرىپ, ولاردىڭ ورىندى ۇسىنىستارىنىڭ ەسكەرىلگەن تۇستارى تۋرالى باياندادى. ەملە ەرەجەلەرىنىڭ مەيلىنشە ەكشەلىپ, عالىمدار سۇزگىسىنەن سان مارتە وتكىزىلىپ وتىرعانىنىڭ ءمانى ونىڭ حالىق تۇتىنۋىنا ىڭعايلى دا جاتىق بولۋىنا ىقپال ەتۋ ەكەنىن ايتتى.
ورفوگرافيالىق جۇمىس توبى مۇشەلەرىنىڭ جانە تاۋەلسىز ساراپشىلاردىڭ ەملە ەرەجەلەرى بويىنشا بەرگەن ۇسىنىستارى, پىكىرلەرى كەڭ تۇردە تالقىلاندى.
