قازىرگى قىسىلتاياڭ كەزەڭدە ەلوردادا جاڭا وقۋ جىلىنا ازىرلىك قالاي ءجۇرىپ جاتىر؟ مەكتەپتەر تولىعىمەن دايىن با؟ وقۋشىلار مەن ۇستازدار كەرەكتى قۇرالدارمەن قامتىلعان با؟ وسى جانە ءبىلىم سالاسىنا قاتىستى باسقا دا وزەكتى ماسەلەلەر قالالىق قوعامدىق كەڭەس وتىرىسىندا تالقىلاندى. اعىمداعى جاعدايمەن نۇر-سۇلتان قالاسى ءبىلىم باسقارماسى باسشىسىنىڭ ورىنباسارى باعلان سماتاەۆا تانىستىردى.
ءبىرىنشى سىنىپقا 26 مىڭ بالا بارادى
الدىمەن بالاباقشالاردىڭ دايىندىعىنا توقتالعان بايانداماشى مەكتەپالدى دايارلىق مەكەمەلەرىنىڭ جۇمىسى باس سانيتارلىق دارىگەردىڭ قاۋلىسىنا سايكەس 17 تامىزدا «كەزەكشى توپتار» رەجيمىندە جاندانعانىن ايتىپ ءوتتى. ءدال قازىر مەملەكەتتىك جانە جەكەمەنشىك بالاباقشالاردا 503 «كەزەكشى توپ» اشىلعان. وندا بارىپ جۇرگەن بالدىرعانداردىڭ جالپى سانى – 5299.
– مەكتەپالدى دايارلىق مەكەمەلەرى جۇمىسىنىڭ الگوريتمى ازىرلەندى. بارلىق نىساندار سانيتارلىق تالاپتارعا سايكەس دايىندالدى. «كەزەكشى توپتار» جۇمىسىن ءبىلىم باسقارماسى ەرەكشە باقىلاۋدا ۇستاپ وتىر, – دەدى ب.سماتاەۆا.
بۇگىنگى تاڭدا باس قالادا 117 ورتا مەكتەپ بار. ونىڭ 91-ءى – مەملەكەتتىك, 22-ءسى – جەكەمەنشىك, 1-ەۋى – رەسپۋبليكالىق جانە 3-ەۋى – نازارباەۆ زياتكەرلىك مەكتەبى. جاڭا وقۋ جىلىندا قالا مەكتەپتەرىنە 202 مىڭ وقۋشى بارادى دەپ بولجانىپ وتىر. ءبىر اتاپ وتەرلىگى, وتكەن وقۋ جىلىندا ورتا ءبىلىم بەرۋ ورىندارىندا 182 مىڭنان اسا بالا وقىعان. ياعني وقۋشىلار سانى 20 مىڭ بالاعا ارتىپ وتىر. سونىڭ ىشىندە بيىل 1-سىنىپقا 26 مىڭ وقۋشى بارادى. قۇجاتتار egov.kz ەلەكتروندى ۇكىمەت پورتالى مەن قاعاز فورماتىندا قابىلدانىپ جاتىر. قازىرگى كۇنى 23443 ءوتىنىش كەلىپ ءتۇستى.
– جاڭا وقۋ جىلى استانانىڭ بارلىق مەكتەپتەرى مەن كوللەدجەرىندە 1 قىركۇيەك كۇنى قاشىقتان وقىتۋ فورماتىندا باستالادى. باستاۋىش سىنىپتارعا «كەزەكشى سىنىپتاردى» ەنگىزۋ جوسپارلانىپ وتىر. مۇنداي سىنىپتار 42 مىڭعا جۋىق وقۋشىنى قامتيدى دەپ وتىرمىز. «كەزەكشى سىنىپقا» بالالاردى جىبەرۋ, جىبەرمەۋ ماسەلەسىن اتا-انالارى شەشەدى. وقىتۋدىڭ ءوزى بىرنەشە توپقا بولىنەدى. ءبىر سىنىپتا وقىتىلاتىن وقۋشىلار سانى 15-تەن اسپايدى. ارينە, بارلىق سانيتارلىق تالاپتار ساقتالادى. مۇنى جاڭا وقۋ جىلىن ۇيىمداستىرۋدىڭ باستى مىندەتى دەپ بەلگىلەپ وتىرمىز. مەكتەپتەر دەزينفەكتسيالىق قۇرالدارمەن, تەپلوۆيزورلارمەن قامتىلادى, – دەدى ءبىلىم باسقارماسى باسشىسىنىڭ ورىنباسارى.
كومپيۋتەرمەن قانشالىقتى قامتىلعان؟
ونىڭ ايتۋىنشا, مۇعالىمدەر مەن وقۋشىلاردى كومپيۋتەر جانە ينتەرنەتپەن قامتاماسىز ەتۋ ءۇشىن ءتيىستى جۇمىستار قولعا الىنعان. كومپيۋتەرلەردىڭ قاجەتتىلىگىنە قاتىستى مونيتورينگ وتكىزىلدى. قازىرگى كەزدە جالپى ءبىلىم بەرۋ مەكتەپتەرىنىڭ بالانسىندا 11648 كومپيۋتەر بار. وسى جىلدىڭ ءساۋىر ايىندا – 2613, ماۋسىمدا 513 كومپيۋتەر ساتىپ الىندى.
– قازىر كومپيۋتەرلەردىڭ قاجەتتىلىگى 35707 مىڭدى قۇراپ وتىر. سونىڭ ىشىندە مۇعالىمدەرگە 437 كومپيۋتەر كەرەك. ال ينتەرنەت 22600 ادامعا, 581 مۇعالىمگە قاجەت. تامىز ايىندا جان باسىنا قارجىلاندىرۋدىڭ ەسەبىنەن 700 ميلليون تەڭگەگە 2600 كومپيۋتەر ساتىپ الۋدى جوسپارلاپ وتىرمىز. رەسپۋبليكالىق بيۋدجەتتەن 4 ميلليارد تەڭگە 26472 كومپيۋتەردى ساتىپ الۋعا ءبولىندى. 1 قىركۇيەككە دەيىن 12 مىڭ كومپيۋتەر, قالعانى 15 قىركۇيەككە دەيىن مەكتەپتەرگە جەتكىزىلەدى. سونداي-اق, قىركۇيەك ايىندا 5400 كومپيۋتەر ساتىپ الىنادى. وعان جەرگىلىكتى بيۋدجەتتەن 1 ميلليارد تەڭگە ءبولىندى. ءبىرىنشى كەزەكتە 689 جەتىم بالا, 4159 ەرەكشە قاجەتتىلىگى بار بالا, از قامتىلعان وتباسىلاردىڭ 7 مىڭنان اسا بالاسى جانە كوپبالالى وتباسىلارداعى 16287 بالا كومپيۋتەرمەن قامتىلادى, – دەدى بايانداماشى.
ونىڭ ايتۋىنشا, ينتەرنەتپەن قامتاماسىز ەتۋ ءۇشىن وسى تامىز ايىندا 22600 روۋتەر ساتىپ الىنادى. وسىمەن مۇعالىمدەر مەن وقۋشىلاردى عالامتورمەن قامتۋ ماسەلەسى 100 پايىز شەشىلەدى. جەتكىزۋشى – «Kcell» اق ينتەرنەتتى 25 تامىزعا دەيىن جەتكىزەمىز دەپ وتىر.
قازىر 160 مىڭعا جۋىق بالادا ۇيلەرىندە كومپيۋتەر بار. ال كومپيۋتەردى قاجەت ەتەتىن وقۋشىلارعا مۇنى تاراتۋ 24 تامىزدا باستالدى. بۇل – مەكتەپتەردىڭ بالانسىنداعى كومپيۋتەرلەر. ياعني جاڭا كومپيۋتەرلەردى ساتىپ الۋدى ەسەپكە العاندا, 1 قىركۇيەككە دەيىن 190 مىڭعا جۋىق بالا, 15 قىركۇيەككە دەيىن بارلىق وقۋشى قاجەتتى تەحنيكامەن قامتاماسىز ەتىلەدى.
تاماقتاندىرۋ ماسەلەسىن قاراۋ كەرەك
– جاڭا وقۋ جىلىنا وقۋلىقتارمەن قامتۋ 100 پايىزدى قۇرايدى. بارلىق وقۋلىقتار ءبىلىم جانە عىلىم مينيسترلىگى بەكىتكەن تىزىمگە سايكەس كەلەدى. قازىرگى كۇنگە بارلىق باسپادان وقۋلىقتار جەتكىزىلدى. 1-5-سىنىپ پەن 10-11-سىنىپ وقۋشىلارىنا كىتاپتار تولىعىمەن بەرىلدى, – دەدى ب.سماتاەۆا.
مۇعالىمدەردى قاشىقتان وقىتۋعا دايىنداۋ ءۇشىن نۇر-سۇلتان قالاسى ءبىلىمدى جاڭعىرتۋ ورتالىعى ونلاين-ساباقتار ۇيىمداستىردى. مۇنىمەن 12480 ۇستاز قامتىلدى. 24-28 تامىز ارالىعىندا بارلىق مۇعالىم نازارباەۆ زياتكەرلىك مەكتەپتەرى ازىرلەگەن بۇل كۋرستاردان وتەدى. ۇستازداردى وقىتۋ جازدا دا جۇرگىزىلگەن ەكەن.
باياندامادان كەيىن قالالىق قوعامدىق كەڭەس مۇشەلەرى سالاعا قاتىستى سۇراقتاردى قويدى. كەڭەس توراعاسى سانسىزباي ەسىلوۆ «كەزەكشى سىنىپتاردا» تاماقتاندىرۋدى ۇيىمداستىرۋ جايىن سۇرادى.
باسقارما باسشىسىنىڭ ورىنباسارى قالانىڭ باس سانيتارلىق دارىگەردىڭ قاۋلىسىنا سايكەس تاماقتاندىرۋ ازىرگە قاراستىرىلماعانىن جەتكىزدى. «ساباقتار 30-40 مينۋتتان بولادى. كۇنىنە 3-4 ساباقتان وتەدى. سوندىقتان مۇنىڭ اسا قاجەتتىلىگى جوق دەپ ويلايمىز» دەدى ول.
كەڭەس توراعاسى بولسا بالالاردىڭ تاڭەرتەڭ ۇيدەن تاماق ىشپەي مەكتەپكە بارۋ ادەتى بارىن, باس سانيتارلىق دارىگەرمەن اقىلداسىپ, بۇل ماسەلەنى قاراۋ كەرەكتىگىن ايتتى.
