ەڭ ماڭىزدى مەرەكە

ءبىزدىڭ مەملەكەتىمىزدىڭ كۇشى – و باستان دۇرىس باعىتتا دامۋعا تاڭداۋ جاسالعاندىعىندا. قازاقستان الەمدەگى تۇراقسىزدىق ورناعان ورتادا ءوزىن ءتارتىپ پەن بىرىزدىلىكتىڭ ەتالونى رەتىندە كورسەتىپ كەلەدى. اقپارات قۇرالدارى ارقىلى كورشى ەلدەردەگى ءتۇرلى كەلەڭسىزدىكتەردىڭ بەلەڭ الىپ جاتقانىن كورىپ وتىرمىز. سوندىقتان ءبىزدىڭ وتانىمىزدا بەيبىتشىلىك پەن كەلىسىمنىڭ سالتانات قۇرۋى, سونداي مارتەبەنى ۇستاپ تۇرۋىمىز ءبىرىنشى كەزەكتە, بيىل تاريحىنا شيرەك عاسىر بولاتىن كونستيتۋتسيامىز­داعى ادام مەن ازاماتتار قۇقىعىنىڭ تەڭ ساقتالۋىنا بايلانىستى دەر ەدىم. الەمدەگى تىنىشتىق پەن كەلىسىمدى نىعايتۋعا باعىتتالعان قانشاما اۋقىمدى شارالاردىڭ ءدال ءبىزدىڭ مەملەكەتتە وتكىزىلگەنىن بىلەمىز جانە ول كەزدەيسوقتىق ەمەس. قازاقستان ءوزىن ءتۇرلى ەتنوستار مەن كونفەسسيالار مۇددەلەرىن اناعۇرلىم وڭتايلى تەڭگەرىمدە ۇستاۋ ءىسى جونىنەن الەمدىك دەڭگەيدەگى مەدياتور رەتىندە تانىتىپ, ونى كونستيتۋتسياسىندا بەكىتتى.
رۋحى جاعىنان ەركىن جانە كەڭ پەيىلدى ينگۋش حالقى ءۇشىن دە قازاقستاندا ءومىر ءسۇرۋ مەن دامۋ باعىتىندا جاسالعان جاعداي وتە ماڭىزدى ءارى باعالى. ءبىز ءوزىمىزدى بارىمەن بىردەي, تەڭ دارەجەدە سەزىنەمىز. ءبىلىم الۋدا, مەملەكەتكە قىزمەت ەتۋدە, شىعارماشىلىقپەن, سپورتپەن اينالىسۋدا دا تەڭ قۇقىلىمىز, مۇنداي قۇندىلىقتار بارشا قازاقستاندىققا بىردەي قولجەتىمدى. سونىڭ ىشىندە ءاربىرىمىز ءۇشىن ماڭىزدىسى – ءدىني نانىم-سەنىم ەركىندىگىنىڭ بولۋى.
قازاقستان – كوپۇلتتى ەل. ءبىزدىڭ قۇندىلىعىمىز دا وسىندا. بارشا قازاقستاندىقتاردى وسى ءبىر ايتۋلى مەرەكەمەن شىن جۇرەكتەن قۇتتىقتايمىن!