ورتالىق كوممۋنيكاتسيالار قىزمەتىندە قر تۇتىنۋشىلار قۇقىقتارىن قورعاۋ جونىندەگى اگەنتتىگى توراعاسىنىڭ مىندەتىن اتقارۋشى – باس سانيتارلىق دارىگەر جانداربەك بەكشيننىڭ قاتىسۋىمەن بريفينگ ءوتتى.
بريفينگتە ەلىمىزدەگى تۇراقتى سانيتاريالىق-ەپيدەميالىق جاعدايدى قامتاماسىز ەتۋ بويىنشا اگەنتتىكتىڭ قابىلداعان الدىن الۋ شارالاردىڭ بارىسى قوزعالدى. باس سانيتارلىق دارىگەردىڭ ايتۋىنشا, وسىعان دەيىن ەلىمىزدەگى سانيتاريالىق-ەپيدەميولوگيالىق قىزمەتتىڭ باقىلاۋىندا بولعان 123 مىڭنان استام نىساننىڭ 60 پايىزى ەپيدەميولوگيالىق تاۋەكەلى جوعارى ەمەس نىساندار بولىپ تابىلادى ەكەن. ەندى, ەلباسىنىڭ تاپسىرماسىنا سايكەس, مۇنداي نىساندارعا تەكسەرۋ جۇرگىزۋ توقتاتىلىپ, ەسكەرتۋ سيپاتىنا كوشىرىلگەنىن ءمالىم ەتتى. الداعى ۋاقىتتا ۆەدومستۆو تاراپىنان بولاتىن جوسپارلى تەكسەرۋلەر تەك قاۋىپتىلىگى مەن تاۋەكەلى جوعارى جانە ورتاشا نىسانداردا عانا ساقتالاتىن بولادى. ونىڭ ناتيجەسىندە سانيتاريالىق-ەپيدەميولوگيالىق قاداعالاۋ سالاسىنداعى تەكسەرىستەر ءۇش ەسەگە دەيىن تومەندەيدى.
جانداربەك بەكشين سونداي-اق ەنتەروۆيرۋستىق ينفەكتسيامەن سىرقاتتانۋشىلاردىڭ جايىنا توقتالدى. بيىلعى ماۋسىم-شىلدە ايلارىندا استانا قالاسىندا زەرتحانالىق تەكسەرىس ناتيجەسىندە راستالعان مەنينگيتتىڭ 80 جاعدايى تىركەلگەن.
«اگەنتتىكتىڭ اۋماقتىق دەپارتامەنتتەرى ەنتەروۆيرۋستىق ينفەكتسيانىڭ تارالۋىنىڭ الدىن الۋعا باعىتتالعان پروفيلاكتيكالىق جانە ەپيدەمياعا قارسى جۇمىس جۇرگىزۋدە» دەيدى ج.بەكشين. ونىڭ ايتۋىنشا, قورشاعان ورتا وبەكتىلەرىن – اشىق سۋ قويمالارىنىڭ, ءجۇزۋ باسسەيندەرىنىڭ, سۋبۇرقاقتاردىڭ سۋىن, اعىندى سۋدى مونيتورينگىلەۋ كۇشەيتىلدى.
سونداي-اق, باس مەملەكەتتىك سانيتارلىق دارىگەر اتا-انالارعا بالالارىن جەكە گيگيەنا ەرەجەلەرىن ساقتاۋعا, شومىلۋدان باس تارتۋعا, ساپاسى كۇماندى سۋدى ىشپەۋگە, ادامدار جاپپاي جينالاتىن جەرلەرگە بارماۋعا, سۋىق تيۋدەن ساقتانۋعا داعدىلانۋعا كەڭەس بەردى.
ايگۇل ۋايسوۆا
