قازاق تەحنولوگيا جانە بيزنەس ۋنيۆەرسيتەتىندە «ەكسپو-2017 – ايەلدەردىڭ ءبىلىم, عىلىم, ونەر, بيزنەس سالاسىندا جەتكەن جەتىستىكتەرى الاڭى» اتتى دوڭگەلەك ۇستەل وتىرىسى بولىپ ءوتتى.
جيىندا ەكسپو كورمەسىنىڭ مەملەكەت ەكونوميكاسىنىڭ دامۋىنا تيگىزەر اسەرى جانە كورمەنى وتكىزگەننەن كەيىنگى ينۆەستيتسيالىق جاڭا مۇمكىندىكتەرى تۋرالى ءسوز بولدى. وسى رەتتە حالىقارالىق كورمەنى وتكىزۋدە ەلوردالىق ستۋدەنتتەردىڭ بەلسەندىلىگى تالقىلاندى. ناقتى ايتقاندا, داياشى, قوناقۇي قىزمەتىن ۇيلەستىرۋشى, ەكسكۋرسوۆود-گيد سەكىلدى قىزمەت تۇرلەرى بويىنشا قۇرالعان ەرىكتى ستۋدەنتتەردىڭ دايىندىعى پىسىقتالدى.
– «ەكسپو-2017» اكىمشىلىگىمەن ارىپتەستىك جونىندە كەلىسىلگەن مەموراندۋم بويىنشا كەز كەلگەن ستۋدەنت ەرىكتى بولا الادى. ول ءۇشىن اعىلشىن ءتىلىن مەڭگەرۋمەن قاتار, قالالىق ينفراقۇرىلىمدى, ەلوردالىق مادەني ەسكەرتكىشتەردى جاقسى ءبىلىپ, ەكسكۋرسيالاردى جۇيەلى ۇيىمداستىرا بىلگەن ابزال. جالپى, ءبىزدىڭ باعالاۋىمىزشا كەڭ اۋقىمدى مۇنداي جوباعا مىڭداعان ستۋدەنتتەردىڭ قاتىسۋ مۇمكىندىگى بار, – دەيدى «EXPO&Women» حالىقارالىق ۇيىمىنىڭ ءتورايىمى سالتانات راحيمبەكوۆا.
ايتۋلى شاراعا قازاق تەحنولوگيا جانە بيزنەس ۋنيۆەرسيتەتىنىڭ ستۋدەنتتەرى, مينيسترلىك وكىلدەرى جانە بيزنەسقۇرىلىم جەتەكشىلەرى قاتىستى.
گۇلميرا ايماعانبەت
