استانا قالاسىنىڭ اكىمى جەڭىس قاسىمبەك سارىارقا اۋدانىنىڭ تۇرعىندارىمەن كەزدەسىپ, اشىق ديالوگ قۇردى.
كەزدەسۋ بارىسىندا تۇرعىندار ورتاق ماسەلەسىن ورتاعا سالىپ, شەشىلۋ جولىن ۇسىندى. كەزدەسۋگە باس قالانىڭ باسشىسى دايىندىقپەن كەلگەنىن سەزدىرىپ, ەلورداداعى الەۋمەتتىك ينفراقۇرىلىم مەن ينجەنەرلىك جەلىنى جەتىلدىرۋ باعىتىندا اتقارىلاتىن جۇمىستارىمەن ءبولىستى.
– حالىقتىڭ ساپالى ءومىر ءسۇرۋ سالتىنا قاجەتتى جولدار, اباتتاندىرۋ, كوگالداندىرۋ سياقتى وزەكتى ماسەلەلەر كەزەڭ-كەزەڭىمەن شەشىلەدى. جاڭا وقۋ جىلىنا ارناپ 13 مەكتەپ سالۋ دا جوسپاردا بار. ءبىلىم وردالارى سارىارقا اۋدانىندا دا قامتىلادى. سول سياقتى بىرقاتار مەديتسينالىق مەكەمەنىڭ, الەۋمەتتىك تۇرعىن ۇيلەردىڭ قۇرىلىسىن جوبالايمىز. كۇن جىلىنىپ, كوكتەم مەزگىلىنىڭ باستالۋىمەن جولدار, قوعامدىق كەڭىستىكتەر (ساياباقتار, گۇلزارلار, جەلەكجولدار) سالۋ ىسىنە كىرىسەمىز, – دەدى شاھار باسشىسى.
باس قالانىڭ اكىمشىلىك اۋماعى كەڭەيىپ, ءسان-سالتاناتى كەلىسكەن كوپ قاباتتى تۇرعىن ۇيلەردىڭ سانى ارتقانىمەن, اپاتتىق ۇيلەردىڭ ماسەلەسى تولىق شەشىلگەن جوق.
– تاعى ءبىر ماڭىزدى ماسەلە – اپاتتى جاعدايداعى تۇرعىن ۇيلەردى بۇزۋ. وتكەن جىلى توزىعى جەتكەن ۇيلەردەن 300-دەن استام وتباسىنى كوشىردىك. بۇل كورسەتكىشتى ءارى قاراي دا ساقتاپ, جۇيەلى جۇمىس جۇرگىزەمىز, – دەدى ول.
جەڭىس قاسىمبەك كەزدەسۋ بارىسىندا كوتەرىلگەن ماسەلەلەردى شەشۋدى قولعا الىناتىنىن, ءارى ورىندالۋ بارىسىن ءوزى ءجىتى قاداعالايتىنىن ايتتى.
ءارى مۇنداي ەركىن فورماتتاعى كەزدەسۋلەر قالانىڭ بارلىق اۋدانىندا تۇراقتى وتكىزىلەتىن, ونىڭ ىشىندە جەرگىلىكتى ورىندار – ەلدى مەكەندەر مەن شاعىن اۋدانداردا ۇيىمداستىرىلاتىنى بەلگىلى بولدى.
