ەسىل اۋدانىنىڭ اكىمى اسىلبەك ەسەنباەۆ وسى اۋداندا تۇراتىن 6-7 بالاسى بار كوپبالالى انالاردى «التىن القا» جانە «كۇمىس القامەن» ماراپاتتادى. قر پرەزيدەنتىنىڭ 2022 جىلعى 23 جەلتوقسانداعى №64 جارلىعى بويىنشا مەملەكەتتىك ناگرادالار 5 اناعا بەرىلدى.
– بۇكىل جاراتىلىسقا ءومىردى انا سىيلايدى. سوندىقتان دانا حالقىمىز «ءجاننات اناڭنىڭ اياعىنىڭ استىندا» دەيدى. سىزدەردىڭ جاس ۇرپاقتى تاربيەلەپ وسىرۋدە اتقارىپ جاتقان ەڭبەگىڭىزدى سوزبەن ايتىپ جەتكىزۋ مۇمكىن ەمەس. الەمدەگى ەڭ كەرەمەت ماماندىق – انا بولۋدى تاڭدادىڭىزدار. انا ءومىر, ماحاببات, جىلۋ سىيلايدى. ءاربىر وتباسىنداعى بەرەكە-بىرلىك ايەلگە بايلانىستى. كوپ بالانى دۇنيەگە اكەلىپ قانا قويماي, ولاردى جەتىلدىرىپ, جەتكىزىپ, دۇرىس ءبىلىم مەن تاربيە بەرۋ مەملەكەتىمىزدىڭ ىرگەسىن نىقتاۋدا وتە ماڭىزدى ءارى ول كوپ قاجىر مەن قايراتتى, شىدام مەن سابىردى, تاباندى ەڭبەكتى قاجەت ەتەدى. وسى ەڭبەگىڭىزگە قاراي ۇرپاعىڭىز سانالى دا تاربيەلى بولىپ ءوسىپ, ەلىمىزدىڭ دامۋىنا ۇلەس قوساتىن ازاماتتار بولىپ شىقسىن. مەملەكەت ءوز تاراپىنان وسىنداي وتباسىلارعا الەۋمەتتىك قولداۋ ءبىلدىرۋدى جالعاستىرادى, – دەدى اۋدان اكىمى.
«التىن القا» زەينەتكەر, بۇگىندە 65 جاستان اسقان ەلوردالىق كۇمىس كۇنىسوۆا مەن 38 جاستاعى رايگۇل ماتەەۆاعا بەرىلدى. ەكەۋىنىڭ دە 7 بالاسى بار. رايگۇل ماتەەۆا – شىعىس قازاقستان وبلىسىنىڭ تۋماسى. ەلوردادا تۇرعانىنا 15 جىلدان استى. 2021 جىلعى 5 اقپانداعى پرەزيدەنت جارلىعى بويىنشا «كۇمىس القامەن» ناگرادتالعان.
– ءوزىم شىعىستان بولعانمەن, شىمكەنتتىڭ كەلىنىمىن. ول جاقتا كوپبالالى وتباسى وتە كوپ, ياعني بالانى كوپ تۋعاندى قۇپتايدى. مەنىڭ دە 6 قىز, 1 ۇلىم بار. ەڭ ۇلكەنى 20 جاستان اسسا, ەڭ كىشىسى – 1,5 جاستا. ەكەۋى – ستۋدەنت, ەكەۋى – مەكتەپكە, ەكەۋى بالاباقشاعا بارادى, كىشكەنتايىم قاسىمدا. وتباسىن كۇيەۋىم اسىرايدى. ول جەكە كاسىپكەرلىكپەن اينالىسادى. ال مەن ءۇشىن جۇمىستىڭ ۇلكەنى – وسى بالالاردىڭ تاربيەسى, – دەيدى رايگۇل.
«كۇمىس القانى» 6 بالاسى بار انالار – 38 جاستاعى داۆريا اقىلباەۆا, 34 جاستاعى الەمگۇل اياس, 45 جاستاعى گاۋحار جارقىمباەۆا الدى. بۇل ايەلدەردىڭ كوبى – ءۇي شارۋاسىندا, كەيبىرى عانا قىزمەتتە.
ەسىل اۋدانى اكىمدىگى كادر ءبولىمىنىڭ باستىعى ينارا سەرعازينانىڭ ايتۋىنشا, ەلوردادا كوپبالالى انالار سانى جىلدان-جىلعا ارتىپ كەلەدى.
– 2019-2020 جىلدارى ەسىل اۋدانى بويىنشا 40-50 ادام عانا وسىنداي ماراپات السا, بىلتىر 107 انانى ماراپاتتادىق. بۇگىنگى ماراپاتتاۋ ءىس-شاراسى بيىلدىققا ءبىرىنشى رەت وتكىزىلىپ وتىر. الداعى ۋاقىتتا جىل بويىنا ءار اي سايىن كوپبالالى انالاردى تاعى دا شاقىرىپ, بەلگىلەرىن تاپسىرىپ وتىرامىز, – دەيدى ول.
