استانا قالاسى ءماسليحاتىنىڭ كەزەكتەن تىس سەسسياسىندا ەلوردانىڭ جاڭا, بەسىنشى اۋدانى مەن بىرقاتار جوبالىق كوشەگە بەرىلگەن اتاۋلار بەكىتىلدى. جاڭا اۋدان نۇرا اتالادى. ءال-فارابي داڭعىلى مەن مانشۇك مامەتوۆا كوشەسى سول جاعالاۋعا كوشىرىلەدى. قازاقتىڭ باتىر قىزى اتىنداعى بۇرىنعى كوشە ەندى قارامەرگەن اتاۋىن يەلەنەدى. ال ماعجان جۇماباەۆ داڭعىلى مەن ونىڭ جالعاسى – №23-16 كوشە بىرىكتىرىلەدى.
استانا قالاسى اكىمىنىڭ ورىنباسارى ەسەت بايكەن قاتىسقان جيىندا اتالمىش اتاۋلارمەن قالالىق تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ تانىستىردى. ءماسليحات دەپۋتاتى گۇلجامال جاپاروۆا ۇسىنىستار ايتتى.
ول وسىنىڭ الدىنداعى سەسسيادا توقتار اۋباكىروۆتىڭ اتىنا لايىقتى كوشە بەرۋدى ۇسىنعان ەدى. اتالعان قىسقا كوشە «جەلەزنودوروجنىي» تۇرعىن الابىندا ورنالاسقان. دەپۋتات بۇل ماسەلەنى قايتا كوتەردى.
– توقتار اۋباكىروۆ مادەنيەت جانە سپورت مينيسترلىگى ۇسىنعان «تاريحي تۇلعالار» تىزىمىنە ەنبەگەن ەكەن. ءبىز مينيسترلىككە ۇسىنىس جاساساق قايتەدى, – دەدى دەپۋتات.
وعان جاۋاپ بەرگەن قالالىق ءماسليحات حاتشىسى ەرلان كاناليموۆ قازىرگى زاڭناماعا سايكەس ءتىرى ادامعا كوشە بەرىلمەيتىنىن, بۇل ماسەلە تۇلعا دۇنيەدەن وتكەننەن بەس جىل وتكەن سوڭ عانا قاراستىرىلاتىنىن ايتىپ, ءتۇسىندىردى. توقتار اۋباكىروۆ حالىق باتىرى بولعان سوڭ, كەزىندە قۇرمەت رەتىندە كوشە بەرىلگەنىن, ءماسليحاتتا سول كوشەنى كوشىرۋ ماسەلەسىن قاراستىراتىنىن ايتتى.
گۇلجامال جاپاروۆا ەلوردادا جۇماباي شاياحمەتوۆتىڭ ەسكەرتكىشى جوعىن ايتا كەلە, ورناتۋدى ۇسىندى.
– بۇل تاريحي تۇلعا عوي. جۇماباي شاياحمەتوۆ ەڭ كۇردەلى كەزەڭدەرى ەلدىڭ ەكونوميكاسىن كوتەردى. 1946 جىلدان 1954 جىلعا دەيىن ول, ستالين ايتقانداي, تۇڭعىش ۇلتتىق حاتشى بولدى. ونى «شىعىس قىرانى» دەپ اتايتىن. بۇل كىسى ەل, جەر ءۇشىن ءومىرىن قيدى. العاشقى يادرولىق سىناق بولعان كۇنى, 1949 جىلدىڭ 29 تامىزىندا سەمەي پوليگونىنا باردى. اقىرى ەلۋ جاسىنان ەندى اسقاندا مي ىسىگى اۋرۋىنا شالدىقتى. وسىنداي ءىرى تۇلعا ەسكەرتكىشكە ابدەن لايىق, – دەدى دەپۋتات.
ءماسليحات حاتشىسى ەرلان كاناليموۆ بۇل ماسەلەنى قالالىق مادەنيەت باسقارماسىمەن تالقىلاۋ كەرەگىن اتاپ ءوتتى.
– ءبىز رەسپۋبليكالىق ونوماستيكا كوميسسياسىنا ءارتۇرلى ءۇش قۇجات جىبەردىك. سونىڭ ەكەۋىنە, بىرنەشە كوشە مەن اۋدان اتاۋىنا قاتىستى جاۋاپ كەلدى. كوميسسيا وتىرىسى ءالى وتپەگەندىكتەن, تاعى ءبىر قۇجات سوندا قالدى, – دەدى ەرلان كاناليموۆ.
سەسسيادا كادر وزگەرىستەرىنە بايلانىستى استانا قالاسى اكىمدىگىنىڭ دەربەس قۇرامى بەكىتىلىپ, قالانىڭ باسقارۋ تاسىمىنە وزگەرىستەر ەنگىزىلدى. ءتيىستى باياندامانى قالا اكىمى اپپاراتى باسشىسىنىڭ ورىنباسارى جاناسىل شاۋكەنتاەۆ جاسادى.
