ەلوردادا قر پرەزيدەنتى جانىنداعى ۇلتتىق كوميسسيا وكىلدەرىنىڭ قاتىسۋىمەن استانا اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ وتىرىسى ءوتتى.
نازىك جاندىلاردىڭ قۇقىقتارىن قورعاپ, ولارعا الەۋمەتتىك تۇرعىدان جاسالاتىن كومەكتىڭ جولدارىن وڭتايلاندىرۋ ماسەلەسى باستى نازارعا الىنعان بۇل شاراعا استانا قالاسى اكىمىنىڭ ورىنباسارى ەسەت بايكەن, قۇقىق قورعاۋشى, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى سالتانات تۇرسىنبەكوۆا, سونداي-اق داعدارىس ورتالىقتارىنىڭ باسشىلارى مەن ايەلدەرگە قاتىستى قوعامدىق ماسەلەلەردى شەشۋگە اتسالىسىپ جۇرگەن بەلسەندى ايەلدەر قاتىستى.
تالقىلاۋدىڭ باستى تاقىرىبى – كومەككە مۇقتاج جاندارعا الەۋمەتتىك جاردەم كورسەتۋ قۇرىلىمدارىن قايتا قۇرۋ بولدى.
«وتباسىنىڭ جاعدايى وڭالماي, مەملەكەتتىڭ الەۋمەتتىك جاعدايى دا وڭالمايدى. ال وتباسى ماسەلەسى الەۋمەتتىك ماسەلە, تاربيە ماسەلەسى, قاۋىپسىزدىك ماسەلەسى… سياقتى تاقىرىپتارعا سايادى. وتباسى ماسەلەلەرىنە, نازىك جاندىلاردىڭ ىسىنە ۇكىمەت ايرىقشا كوڭىل ءبولىپ وتىر, الايدا مۇنىمەن ماسەلە تۇبەگەيلى شەشىلمەيدى. سوڭعى كەزدەرى مەملەكەتتىك ورگانداردىڭ فۋنكتسيالارىن قايتا قاراۋ ماسەلەسى وزەكتى تاقىرىپ بولىپ تۇر. اسىرەسە, الەۋمەتتىك سالالارعا جاۋاپتى ورگانداردىڭ جۇمىسى ءالى دە جەتىلدىرۋدى قاجەت ەتەدى. مەنىڭ ويىمشا, اكىمدىكتىڭ جانىنان وتباسى جانە ايەلدەر ىسىمەن اينالىساتىن دەربەس ءبىر باسقارما قۇرىلعانى دۇرىس سياقتى. وتباسىلارداعى كۇردەلى جاعدايلاردىڭ كوپشىلىگى الكوگولگە, ەسىرتكىگە نەمەسە ويىنعا تاۋەلدىلىكتەن تۋىندايدى. جىنىستىق زورلىق-زومبىلىقتىڭ شامامەن 60%-ى الكوگولدىڭ اسەرىنەن جاسالادى. ەسىرتكىنى تۇتىناتىن جاستار دا بارعان سايىن كوبەيىپ بارادى. كەز كەلگەن ءجاسوسپىرىم ينتەرنەت ارقىلى تاۋلىك ىشىندە تىيىم سالىنعان زاتتاردى تابا الادى. مىنە, وسى ماسەلەلەردى شەشۋ ءۇشىن تۇتاس قوعام وسى تۇيىنگە نازار اۋدارۋ كەرەك» دەيدى سالتانات تۇرسىنبەكوۆا.
استانا قالاسى اكىمىنىڭ ورىنباسارى ەسەت بايكەن الەۋمەتتىك كومەك ماسەلەسىندە ەلوردادا ساقتالىپ وتىرعان تۇيتكىلدى تۇيىندەرگە توقتالدى.
– ءار جولى بىزگە كومەككە مۇقتاج ادامداردى انىقتاۋ قيىنعا سوعادى. وڭىرلەردە الەۋمەتتىك كومەك كورسەتەتىن ورىنداردىڭ بولماۋىنا نەمەسە ازدىعىنا بايلانىستى ومىرلىك جاعدايى قيىن ازاماتتار ەلورداعا اعىلادى. سول سەبەپتى استانادا 5-8 قىزمەتكەردەن تۇراتىن كوپتەگەن باسقارمالار بىرنەشە مىڭ ادامنىڭ ماسەلەلەرىمەن اينالىسۋعا ءماجبۇر. سوندىقتان كومەككە مۇقتاج جاندار تۇرعىلىقتى جەرى بويىنشا الەۋمەتتىك كومەك الۋىنا بارلىق وڭىرلەردە ءتيىمدى جاعداي جاسالۋى كەرەك, – دەدى اكىمنىڭ ورىنباسارى.
شاراعا قاتىسۋشىلار ايەلدەر ىستەرى جانە وتباسىلىق-دەموگرافيالىق جاعدايعا قاتىستى كوپتەگەن ماسەلەلەرگە قاتىسى وي-پىكىرلەرىن ورتاعا سالىپ, ونى شەشۋدىڭ ۇيلەسىمدى جولدارىن دا اتادى.
