2017 جىلدىڭ جازىنا قاراي, «ەگەمەن قازاقستان» گازەتىنىڭ رەداكتسياسىنان زەينەتكە شىققانىما جارتى جىلعا جۋىقتاعان شامادا, قالالىق «استانا اقشامى» گازەتىنە شولۋشى قىزمەتىنە كەلىپ, بىرەر ايعا ءۇزىلىپ قالعان جۋرناليستىك جولىمدى قايتا جالعاستىردىم.
قازىر «استانا اقشامىندا» جاريالانعان دۇنيەلەرىمنىڭ ءوزى جيىرما باسپا تاباق كولەمىندە باسىلىپ شىعاتىن كىتاپقا لايىق بولىپ تۇر.
مەن گازەتتە قىزمەت ەتكەن كەزدە كوپتەگەن جاڭا ايدارلار قاتارعا قوسىلدى. سولاردىڭ بىرقاتارىن تىكەلەي مەن جۇرگىزىپ وتىردىم. ماسەلەن, «ۇلكەن قالا ءۇردىسى» دەگەن ارناۋلى بەت اياسىندا الەم قالالارىنداعى ەلدى مەكەندى كورىكتەندىرۋ مەن شارۋاشىلىق جۇرگىزۋدەگى ءارتۇرلى جاقسى جاڭالىقتار مەن ءتالىمدى تاجىريبەلەر تۋرالى وي تولعاپ تۇردىق. «شاھار شەجىرەسى» شەڭبەرىندە كونە اقمولا مەن تسەلينوگراد كەزىنەن بار قيلى نىساندار جايلى سۋىرتپاقتاپ سىر شەرتتىك. «تاريحي تۇلعادا» وسى كەنت پەن ولكەدەن شىققان بەلگىلى كىسىلەر تۋراسىندا زەرتتەۋ جۇرگىزدىك. وسى سىڭايدا قازاقتىڭ العاشقى جازبا اقىن قىزدارىنىڭ ءبىرى شولپان يمانباەۆا حاقىندا قالام تەربەۋ مەن ءۇشىن ەستەن كەتپەس وقيعا بولدى. مەنىڭ گازەتتە ساياسي شولۋشىنىڭ مىندەتىن اتقارعان كەزدەگى جۇمىسىم دا بىرازعا بارىپ قالىپتى. ولار اپتا سايىن دەرلىك «شارتاراپ» جانە «كورشى اقىسى» دەگەن اتاۋلارمەن ۇزبەي جارىق كورىپ تۇردى.
مەن كەلگەن كەزدە دە رەداكتسيا ۇجىمى سايدىڭ تاسىنداي تارلانداردان قۇرالعان ەكەن. باس رەداكتوردىڭ ورىنباسارى عالىم قوجابەك اراسىندا ءوزى بۇرقىراتىپ جازىپ تاستاپ تۇراتىنىنان بولەك, ۇجىمدى ۇياداي ەتىپ ۇستاپ, ءاربىرىن كەزەكتى جەرىنە ىڭعايىمەن جۇمساپ وتىرۋعا ابدەن توسەلىپ قالىپتى. جاۋاپتى حاتشى بولىپ جۇرگەن ورىنبەك پازىلوۆ گازەت ماكەتىن سىزىپ تاستاپ, بەتتى جۇرگىزۋدەن بوساعاننان كەيىن دەرەۋ قالام-قاعازىنا جۇگىنەتىن بەساسپاپ مامان رەتىندە كورىندى. قالعان جۋرناليستەر جۇراعاتىنىڭ قاي-قايسى بولسا دا, ايتىلىپ وتىرعان دەڭگەيدەن تومەن تۇسە قويمايتىن «سەن تۇر, مەن اتايىننىڭ» سۇرپىنان بولىپ شىقتى. جۇردەك جۋرناليستەر امانعالي قالجانوۆ پەن ازامات ەسەنجولدىڭ ەكەۋى دە رۋحانيات ساناتىندا جۇرگەنىمەن, جازۋ مانەرلەرى مەن تاسىلدەرى ءبىر-بىرىنەن وزگەشە, ءاربىرىنىڭ وزىنە ءتان قولتاڭبالارى بار. ال گۇلجان راحمانقىزىنىڭ ءبىلىم جۇيەسىنە قاتىستى جازعان كەز كەلگەن ماقالاسىنىڭ رەيتينگىسى ءاماندا جوعارى سىناپ باعاناسىنان تابىلىپ جاتاتىن. تەز جازىپ تاستاپ, كەلەسى تاقىرىپقا قينالماي كوشە بەرەتىن گۇلميرا ايماعانبەت ءوزىن ناعىز كۇي تاڭدامايتىن جورعا بولا الاتىنىن ەرتە باستان اڭداتىپ كەلەدى. قاشاننان «ءوز عاسىرى ءوزىنىڭ يىنىندە» جۇرەتىن, وزىنە ءوز دۇنيەسىن الدەقاشان قالىپتاستىرىپ ۇلگەرگەن ايگۇل ءۋايىستىڭ كوتەرىپ جۇرگەن ادامگەرشىلىك پەن ادامي قۇندىلىقتار توڭىرەگىن شيىرلايتىن ماسەلەلەرى مەن تاقىرىپتارىنا جۇرتتىڭ ءبارىنىڭ بىردەي «ءتىسى باتا بەرمەس» ەدى. ۇجىمعا بىزدەن كەيىندەۋ كەلگەن تولەن تىلەۋباي ەڭىستەن سالسا, توسكە وزاتىن, نە جازسا دا, تاپ-تۇيناقتاي ەتىپ جازا قوياتىن وتە ۇقىپتى دا زەرەك ىنىلەرىمىزدىڭ ءبىرى ەسەبىندە قۇرمەتىمىزگە بولەندى.
ءيا, ءوزىم قىزمەت ەتكەن جىلدارى «استانا اقشامىندا» شىعارماشىلىق ەركىنشىلىك انىق اڭعارىلدى.
مىنە, ءوز ءومىرىمىزدىڭ ساۋلەلى ءبىر ساتتەرى وتكەن سول «استانا اقشامى» گازەتىنىڭ جارىققا شىعا باستاعان شاعىنا دا وتىز جىل مەرزىم تولىپتى. بۇل اتالمىش باسىلىمنىڭ وردالى وتىز جىلدا ەلوردانىڭ دامۋىنا ۇركەردەي ۇلەس قوسىپ قانا قويماي, سونىمەن بىرگە قانشاما قابىرعالى قالامگەردى ءوز قاتارىنان ۇشىرىپ شىعارعانىنا كۋا بولا تۇسەدى.
مەرەيلى مەرەكە قۇتتى بولسىن!
سەرىك ءپىرنازار,
قازاقستاننىڭ مادەنيەت
قايراتكەرى, ءباسپاسوز
ارداگەرى
